晴。朗。: 9
第二天，我一起床就發現我被人壓住，動彈不得。一抬頭，才發現是沈宜晴！
“喂喂喂，唔好咁啦” 我叫道，似乎有人睡得很熟。
“唔好理佢啦，佢係咁㗎喇” 忽然一把低沉的聲音從我身後傳出，我連忙轉頭查看，發現竟是老闆和老闆娘！
“老闆？？？” 我驚叫，此時沈宜晴也驚醒了
“爸爸、媽媽，你哋做乜無啦啦上嚟啊” 宜晴問
“你唔記得你約咗我哋飲茶咩？” 他爸爸問
“係喎，咁我換衫先” 她進房間去了
尷尬的情況老是常出現。客廳只剩下我和她父母，空氣像是突然凝結了。這時，宜晴換好衣服出來了，說了一句驚嘆全部人的話：
“向你哋介紹，我男朋友，李皓朗”
明顯她的父母十分驚訝，我也十分驚訝，不解地望着她。
“落去飲茶啦” 宜晴首先打破沉默，一把拉着她母親出去了。正當我跟着出去的時候，老闆拉住了我，不懷好意地看着我笑
“你咁勁嘅，幾個禮拜就溝到我個女去到呢個地步”
“唔係啊老闆，你誤會咗喇”
“得㗎喇得㗎喇，年輕人，行啦” 他恥笑着我
2個大男人追上了前面的女人。不知為何，宜晴好像開朗了，說話都眉飛色舞。飲茶時，宜晴她爸不停地看着我不懷好意地笑，又特別關注我。唉，都是宜晴惹的禍……
“係呢，你哋計劃幾時同居” 宜晴媽媽突然問我，嚇得正在喝茶的我差點嗆死
“媽啊！” 宜晴害羞地說
“你哋都唔細㗎喇，係時候定個時間結婚㗎喇” 她媽媽續說
“媽，我哋相處多一陣先啦” 宜晴對這我眨眼笑
喝完茶，2位女士都去了購物，老闆拉着我來到了一個角落。
“勁喎阿朗，幾個禮拜就得咗” 然後拍拍我的肩膀
“哈哈” 我尷尬地笑
“尋晚肯定好刺激啦” 他暗笑
“我哋尋晚真係咩事都無㗎” 我澄清
“得啦得啦，年輕人身壯力健” 他說
這時，2位女士購物完回來了，一袋兩袋的真是讓人傻眼。
“哇買咁多？屋企擺唔擺得落㗎” 我問
“點會無位㗎？” 宜晴一邊點算著購物清單一邊說
“你買咁多點養你啊” 我無奈地說
“唔好耍花槍喇，今晚你哋自己食啦，我同你阿媽去二人世界，拜拜” 說罷老闆拉着老闆娘走了。
我和宜晴兩人在商場漫無目的地走著，我才記得今天晚上要帶個“女朋友”回家去。
“差唔多喇，去你屋企啦” 她說
“做樣都要買啲嘢上去掛” 我說
“晨早買咗啦，等你咩” 她揚起那袋剛買的東西，原來剛才去購物是買東西給我家人，真是細心。
“幾細心喎，估唔到” 我說
“梗係啦，我係你女朋友喎” 她說出這句話，為什麼好像有點怪……
“其實呢，我同你好似只係扮嘅關係，唔係真㗎喎” 我認真地說
“咁我又肯扮，咪繼續扮落去咯。你知唔知我媽咪見到你係我男朋友幾開心啊，又話你好生性喎” 她看着我說
“咁我生性係事實吖，但係咁扮落去唔係辦法嚟㗎喎。你估真係好似新垣結衣同星野源咁咩？” 我無奈地說
“點解唔得？我幫你做晒所有家務兼煮埋飯喎” 她鼓起腮子，不滿地說
“就算係咁，你仲要顧及咖啡店，唔好辛苦自己啦” 我說
“得啦，快啲行啦，一陣遲到就唔係幾好啦，男-朋-友” 她在我耳邊輕輕地說，使我有種酥麻的感覺
來到家裡，我和宜晴戰戰兢兢地坐下。宜晴一坐下就受到媽媽的連珠發炮。
“你哋點識㗎？”
“你喺邊度做嘢啊？”
幸好我早和宜晴夾好對白，才能一一擊破。突然，老爸問了一個問題。
“你鍾意我個仔啲咩啊？” 我和宜晴都呆住了，我連忙解圍說
“爸啊，咁急做咩啫”
“唔宜家問唔通等到結婚先問咩” 他向著宜晴微笑
“uncle都啱嘅” 宜晴一臉尷尬地說
我向宜晴打眼色，著她自救。
“其實，皓朗好細心，雖然睇落去好亂，但其實做事一絲不苟。仲有，佢好體貼，喺我需要嘅時候佢就會出現” 宜晴說
“噗哧” 此時一言不發的弟弟忍不住笑了出來。
“你笑乜嘢啊” 媽媽連忙望着他 “唔好意思啊，佢係咁嘅”
“哦，唔緊要” 宜晴臉紅紅地說
終於吃完這頓漫長的飯，爸爸叫了我到露台。
“仔，估唔到你終於都得咗喇” 他對著我說
“嘿，講呢啲” 我自豪地說
“你要好好對人啊，我睇得出佢真係好愛你” 爸爸說
“得喇，快手俾個媳婦你，生埋孫好唔好啊？” 我無奈地說
“咁我咪好快做阿叔？” 這時弟弟也過來了
“你快啲搵個女朋友啦” 我揶揄他說
“得喇，fresh grad仔無人會睇得上” 他裝作不介意的樣子
“我有個女仔同事都係fresh grad㗎喎，不如” 我露出一個不懷好意的微笑
“阿哥，入房傾” 弟弟邪笑著說
我打開Rachel的Instagram，翻出她的照片。
“哇正喎，你睇吓佢” 弟弟不停地讚嘆
“佢身材真係幾好㗎” 我說
“邊個身材好好啊” 此時，宜晴打開了門進來
“佢同事咯” 弟弟大叫
“睇過” 宜晴一手搶去電話，讓她看到了Rachel的樣子
“又幾大波喎，唔怪得知要同人星期六加班啦”
“哦，阿哥你衰喇” 弟弟恥笑我
“哇，點解你間房咁多巴士模型嘅” 宜晴驚歎地問
“阿哥以前係巴膠嚟㗎，成日追巴士坐” 弟弟未待我說話已經打斷了
“喂啊，唔好爆晒我啲嘢出嚟”
“佢試過因為見到靚車而爬學校牆出去影” 弟弟邊說邊笑
宜晴捧腹大笑，還不忘揶揄我：“對住啲巴士咁主動嘅”
此時，媽媽進來了。
“食生果啦”
我們全部人走到客廳，看到老爸正在看球賽。
“屌原來今晚有波睇” 我隨口對正在看著球賽的老爸說。
“文雅啲啦，宜晴喺度㗎” 媽媽叫嚷道
“怕咩啫，遲早都係我大嫂，習慣吓我哋屋企生活” 弟弟看着我說
“係咯係咯，無咩所謂㗎” 宜晴說
“唔好理佢哋啫，宜晴我哋入廚房” 媽媽拉着宜晴走進廚房
⸺⸺⸺⸺⸺⸺⸺⸺⸺⸺⸺⸺⸺
伯母把我拉進廚房，然後拿出2個芒果。
“宜晴啊，我教你點樣鎖住男人個胃” 伯母說
“吓？” 我不解地問
“想當年我都係靠一番廚藝先收服到你伯父，所以宜家要教你整皓朗最鍾意食嘅嘢－芒果布丁” 她說
“首先呢將一半芒果切粒，再用一半芒果榨汁，咁樣就會更加有芒果味”
“點解唔用芒果汁呢？” 我問
“傻女，芒果汁代替唔到新鮮芒果榨汁嗰種新鮮㗎” 伯母對著我說 “皓朗啊，好鍾意食芒果布丁，你以後要多啲整俾佢食啊”
“點解嘅？” 我問
“其實啊，芒果布丁係皓朗嫲嫲整嘅，嫲嫲成日同佢相處，皓朗好珍惜佢，但係嫲嫲過咗身，皓朗受咗好大打擊，你睇佢好似無乜嘢咁，其實佢一直放低唔到” 伯母認真地說 “雖然我都有整比佢食，而且跟足嫲嫲個方法同配方，但係都食唔返嗰種味道” 她續說
“哦” 想不到看似樂觀的他會有這麼一個故事。
“知道㗎喇，伯母。我會好好睇住佢” 我說
“皓朗有你呢個女朋友真係好喇，我都放心啲。啊！唔記得教你呢個竅門，花奶要7份花奶3份脫脂牛奶，咁先會好食” 伯母說著，拿出早已做好的芒果布丁，加上剛切好的芒果粒，端出廚房。
⸺⸺⸺⸺⸺⸺⸺⸺⸺⸺⸺⸺⸺
“有得食喇” 媽媽叫嚷道
我們放下正在看的球賽，來到餐桌。
“阿媽，啲布丁又好食咗喎” 我說
“係咩” 媽說
“仔，你有無揸車嚟啊？如果無就攞我架車車宜晴返去啦” 此時老爸說
“唔使啦uncle，我坐地鐵就得，好方便” 宜晴說
“一個咁可愛又靚嘅女仔咁夜自己喺條街咁危險，我車你返去啦” 我說
“哇，甜到漏啦阿嫂” 弟弟用雙手掩着雙眼。
吃完甜點，和兩老告別後，我帶著宜晴來到停車場。
“上車啦” 我說
這車已經有相當的歷史，由我小時候到現在，雖然硬件早已追不上新車，但感情卻非常深厚。
“架車應該有啲故事” 宜晴一邊看一邊說
“好耐喇，我細個坐到大” 我說
“以前我老豆好鍾意揸車周圍去” 我續說
“所以就識到你媽媽？” 宜晴問
“哈哈，可能係” 我一邊駕駛，一邊回答。
“呼⸺呼⸺呼” 打鼻鼾的聲音從宜晴那邊傳出，才發現她已經睡著了。
我把車停在一旁，然後從後排拿出長期備用的被子蓋在宜晴身上，以免她著涼。
“今日陪我周圍去肯定好攰啦” 我有點內疚地說
隨後，我繼續開車，盡量保持平穩讓宜晴睡得更舒服。不消一會兒，便到了宜晴的家。
“喂喂喂，靚女到屋企喇” 我小聲地在她耳邊說
“嗯？我喺邊啊？” 宜晴還有點睡意地說
“到屋企喇，返屋企沖個涼先瞓啦” 我說
“等陣！我唔記得同你講我架車有啲機件問題出現咗，你都知一個女仔去車房唔係咁……啫係……你明㗎啦？” 宜晴不好意思地說
“靚女都開到聲啦，可以拒絕咩？放低車匙，你咩都唔使理，快啲返屋企沖個靚涼，瞓個好覺” 我說
“知道喇，口甜舌滑” 宜晴哭笑不得地說
“快啲上去啦” 我一邊揮手一邊說
“得喇” 望見宜晴遠去，我才放下心頭大石，回到車上。
突然，有個人從後抱著我，說：
“多謝你”
那是宜晴吧……
抱完她小跑步地走了……
這是除了我媽以外唯一一個抱過我的女生吧，為什麼這個擁抱有點熟悉而且溫暖的感覺呢？
難度我動心了嗎？難度宜晴喜歡上我？
從來沒有戀愛經驗的我動心了？
啊啊啊啊啊啊啊！
我冷靜一下之後，鎖好爸的車。雖然泊在街上很大機會被抄牌，但是我還是泊了。然後到了宜晴車所在的停車場，找到了她的車，並且坐上去了。駛出停車場，才想起我放了一條項鍊在車上，打算送給宜晴的，幸好她沒發現。我連忙收好項鍊，然後繼續開車。