《呼一口氣》

  孤寂，包含住孤獨同寂寞嘅意思，耐孤獨又有獨立同獨特嘅意味。
 
  一個星期三嘅夜晚，浩賢去左join 朋友吹水，佢班朋友夾band，佢就望住佢地夾band，同佢地食枝煙、吹下水。
  浩賢都係一個所謂嘅band仔，識彈結他，有自己錄下野，但冇正式夾過一隊band。而同呢班band 就係因為錄音而識嘅。
 
  夾完band，成兩點幾，佢地幾個人落樓下些粉食啲野，吹陣水，就散band了。
有一個番上band 房訓，3個一齊坐車，浩賢自己一個行出大馬路搭通宵車。
 
  安靜嘅大馬路周不時只有3、4架車經過；數盞嘅街燈射出暗暗嘅黃光；巴士站對面嘅公共屋邨只剩下寥寥嘅燈火……
  浩賢一個人企喺巴士站等車，佢望一望九巴嘅apps，攞枝煙，點一點火，一啖白煙從佢口中呼出。




「當煙花燦爛完以後，能如何期待白晝」。精彩時刻嘅過後，淨低嘅，就係孤單嘅感覺。
  「孤單」、「孤寂」、「孤獨」，呢幾個詞語喺浩賢嘅腦海出現。佢發覺，回想起，原來自己由細到大都係「孤獨」、「獨特」、「寂寞」嘅一個。
 
  細個出世，佢就係屋企嘅獨生子，直至去到8歲先有個細妹，不過即使有個妹，相差8年好難冇generation gap 。
  浩賢屋企，喺所有親戚入面算係讀得最多書，最有錢嘅一家，而浩賢亦係最細個嘅一個，啊！唔係，佢仲有個細佢一個月嘅表弟。
  浩賢同所有表哥表姐至少都相差4-5年，有啲成10都有，記得佢5,6歲嘅時候，有個表哥已經考緊會考，甚至乎有個表姐已經讀緊U 。浩賢好少機會同啲表哥表姐玩，細個嘅時候真係大時大節先有得見。唔知係咪哥哥姐姐真係好吸引，定抑或係因為好少機會見？浩賢好中意同啲表哥表姐玩，好次見親佢地都好唔想佢地走，佢仲記得佢表姐嘅花名叫「廁紙人」。每次親戚去完佢屋企食飯，啲親戚走曬大家講完拜拜之後，屋企再次變得寧靜。
  因為浩賢喺一眾親戚入面係最細個嘅，所以大家都好錫佢，可以話係集萬千寵愛在一身。而因為佢屋企都算係知識份子，加上屋企都有啲錢，所以屋企送左佢入私校讀書，私校入面，佢應該都算係特別嘅一個。
 
  私校入面，個個都係有錢仔女，屋企唔係醫生律師就係做生意，而浩賢嘅雙親都只係打工仔同喺普通小學教書嘅老師。大家嘅家境唔同，自然好多野都埋唔到堆。
 




  幼稚園嘅時候，浩賢有兩個best fd ，一個叫阿亮，一個叫阿匡。佢地兩個都好受老師歡迎，浩賢同樣希望喺老師面前突出自己，想老師喺入班面前讚下自己，但佢偏偏老師從來都唔會留意佢。
  當時啲同學好中意喺麥當勞開生日會，邀請全班同學去，大家必然要做嘅就係送禮物，浩賢當然會送，大家都好重視嗰份禮物，某程度上嗰份禮物代表緊你嘅家境，你嘅地位。
 短短3年，浩賢大大話話都參加左呢生日會六七次。每次生日會嘅ice break game ，佢都唔enjoy，對當時嘅佢黎講，未至於係討厭、恐懼，但至少唔係enjoy 。
  浩賢讀嘅係一條龍學校，幼稚園直升小學甚至中學。幼稚園3年都係同一班同學，但去到小學就唔係，佢將幼稚園嗰8班，total 200幾人大兜亂。
  小一嘅時候，浩賢被分左去一班新嘅班，同兩個best fd 拆開左，同班嘅，只有兩個唔熟女同學。
  浩賢比老師欽點左做班長，因此喺班上面都引黎幾個同學嘅結識。同班嘅仲有兩個班長，男女各一。好多老師都成日揾呢兩個班長做野，浩賢負責嘅，就係每日放學負責交下野去office，摘下名咁。小一小二，浩賢都係班長，不過都只係做下二打六野嘅班長，一個成績一般嘅班長。
  小學三年級，佢有啲唔同。冇班長做了，無業人士，冇職位，老師成日屌鳩佢，試過比老師喺成班同學面前將佢個file掉落地，班入面冇人想同佢玩，浩賢都唔知點解。佢成績係差，但佢亦唔係搞事嘅人。
  有一次，個老師調完位，同浩賢講「你知唔知點解我要調你去嗰個位？因為我唔想上堂嘅時候見到你。」
  小學五年級嘅時候，再次去到新嘅一班，佢認識嘅同學都係唔多，一個？兩個？
佢特別唔中意上數學堂，因為個老師好悶，佢因為上堂好悶，而對住個老師講咗句「閪窿」，當然佢都唔知呢個係粗口。




當時黎講，喺佢學校黎講係好大件事。試過有同學講個「妖」字比個第二個同學聽到，個同學就好大聲咁話：「啊——你講粗口，我話比老師知」。
  喺一眾嘅老師眼中，浩賢係一個成績差、講粗口、課外活動唔出眾嘅學生。
佢成日比老師眾，個個lunchtime 都比人捉去罰抄，除左嗰一兩個叫fd 啲嘅同學之外，其他同學都視佢為異類，甚至乎，老師都會針對佢，經常同家長投訴佢。
  視藝堂嘅時間，個老師當住全班講一句野：「有冇人願意同張浩賢一組呀？冇人牙？咁你自己檢討下。」
浩賢好唔中意上視藝堂，因為佢覺得好唔好受。
  小學六年級，小學最後一年。個個都講緊派位，講緊成績。不過，其實佢浩賢嘅同學唔需要諗，只要成績唔係太差，基本上都可以直升一條龍嘅中學。不過對浩賢呢啲成績差嘅人黎講，佢就要煩喇。
  同學bully 佢，孤立佢，project 分組基本上唔會有人主動同佢一組。某程度上，佢好似已經習慣左。同學恰鳩佢，佢唔會同老師講，佢會只會發洩，佢對住佢地講句「屌你老母」，舉下中指。有一次，佢舉中指比個搣時見到，同左佢屋企講，佢屋企打鳩佢。
  如佢班同學所願，佢升唔到上一條龍嘅中學，離開左呢個社群，離開左呢個階級。
  由小一至六，浩然嘅成績表都有一句評語：「天資聰穎，唯未有努力」
 
  浩然去到一間平民得黎又唔平民嘅學校。
 
  中一嘅佢被編到去「精英班」，學校以學習為名，清洗為實，喺「精英班」推行「普教中」。
  浩賢出身於名牌小學，對於一間好睇重學業成績嘅學校黎講，會幾重視佢，而佢嘅班主任都睇好佢，分配班上嘅一啲職位比佢。當浩賢得知自己被編入「精英班」，而又比老師分配職位，佢感到開心，亦覺得自己比其他人叻。
  浩賢喺學校、老師嘅圈子中出左名，原因唔係成績好。佢個個星期都欠交功課，個個星期甚至乎每日都比老師留堂。佢成績除左科學，其實都一般，唔突出（喺精英班嘅世界唔考頭十已經叫差，係一種無形嘅壓力），而佢科學嘅突出，係低分嘅突出，上學期5次test冇次合格（精英班用英文讀記好多vocab 係其中一個原因，當然啦，可能都只係一個藉口）。




至於佢喺班上嘅交友，佢係出名嘅，但真正交到心嘅亦只有幾個，某程度上佢係一個唔起眼嘅人，當然啦，呢啲平民學校冇咁階級主義，冇乜人會bully 佢。
  喺「精英班」，老師有一個經常會講嘅話題就係到底大家出年會唔會被踢出精英班，而大家亦care呢個問題，大家潛意識都唔想。考慮到底你會否被踢出有幾個因素嘅。
一· 平均名次，最好係頭80名內
二·以英文學習嘅科目（英文、數學、科學）成績如何（英文水平）
三·操行
 
  浩賢嘅平均排名一向都係80名以外，around 100-130嗰啲，加上佢科學成績差到仆街，大家都以為佢中二應該升唔到「精英班」。點知，佢喺學期尾嘅考試，晚晚温到四點，科學温左個74分番黎（中學黎講算係高分），大家都O撚曬嘴。結果，比佢升到上「精英班」。
  中二，對於浩賢黎講係最開心嘅一年，佢好中意番學，喺呢一年佢完全感受到乜野叫青春，嗰種係家嘅感覺。
  浩賢中二嘅成績都唔係好架喇，都係排around 100嗰啲啦，欠功課呢啲例牌野黎，佢仲日日比英文搣時罰抄，罰到出曬名，不過無論同學、老師都冇因此而排劑佢，反而因為咁仲多左話題，浩賢對佢地嘅感情仲深左。喺班入面，佢係一個風頭人物，亦係領導群之一。
  熱鬧過後，得到嘅卻係失望。浩賢嘅懶根累事。學期考試前嘅佢走左去彈結他而唔温書，當然啦，唔温書呢啲野都唔係咩新鮮事。最癲嘅係應該係佢自己都估唔到，佢竟然可以懶到唔想做份卷而空左成part ，基本上係交白卷。呢條嘅懶根，呢份白卷，唔單止令佢冇得留喺精英班，更加令佢要留班。從此，就同呢「家」人分別……
  留班嘅佢，去到新嘅一班，大家當然會留意下佢，甚至乎會特別留意佢。
佢第一日行入去個課室，佢好驚，佢驚人地會笑佢，佢一個人安靜咁坐喺位度唔出聲。
好彩嘅係嗰班都有幾個留班嘅同學，令佢即時喺班上面可以有個依靠。
  頭一兩個星期嘅小息，對浩賢黎講係最開心嘅時間。基本上佢每個小息都會走過去對面課室揾番佢班死黨，入到去人地課室，一班人嘻嘻哈哈，講下粗口，簡直係忘我。
不過天下無不散之筵席，鐘聲一響，佢就要離開，番番去自己嘅課室，坐喺自己嘅座位上，熱鬧過後，佢卻感到失落。




「上帝閂左一道門，會為你打開另一道門」，佢漸漸漸融入呢個新嘅環境，佢同嗰班佢本身好睇唔起嘅同學成為好朋友，唱K、食飯，同呢班朋友更加延續至中三。不過人生總係充滿波折，快樂、美好嘅時光，總係短暫，人生總係有變數。
  中三嘅時候，佢識左一個女仔，呢個女仔人見人愛，係眾所周知嘅女神，浩賢兩年前已經中意佢，不過當時大家唔同班唔同級，浩賢無從入手因此放棄左。但估唔到竟然能夠同佢同班。
  有得必有失，浩賢本身玩開嘅嗰班朋友並唔係幾中意佢嘅女神，覺得佢唔拍拖淨係收兵。由於大家唔係太啱傾，浩賢要接近女神，自然少左同班朋友一齊玩。
  浩賢一步一步咁接近女神，佢地越行越埋，係人都知浩賢追緊女神，每日買早餐、食飯、放學都一齊，佢地受盡大家嘅冷眼，大家都覺得女神只係收兵，浩賢只係做兵。經歷左大半年，女神正式比浩賢私有化，令眾人大跌眼鏡。
  升到上高中，浩賢被編去普通班，而女神就分左去「精英班」。
女神去到新嘅一班，朋友唔多，但識左個死黨。而浩賢可以話係零朋友，都有一兩個傾得埋嘅，但可以話係hi bye fd黎。對浩賢黎講，番學嘅意義就係拍拖。
  浩賢喺班上甚至係學校入面絕對係一個異類，但佢好enjoy 呢個標籤。班上嘅同學全部唔係讀書就擦鞋，佢對於呢種填鴨教育讀死書以至班上嘅擦鞋文化非常不屑，基本上每日番學就係拍拖、打機、訓教。當大家都諗緊點搏個5**入8大，佢卻喺度彈結他。
 
  高中嘅三年，終於過左。離開佢討厭嘅學校，佢入讀自己喜愛嘅音樂科，點知，呢個又係另一個轉捩點。
  呢科嘅音樂，並唔係佢理想中嘅音樂，佢同呢科格格不入，亦同身邊嘅同學溝通唔到。喺學校嘅環境，30人嘅課室，再次令佢感到孤獨，「自己一個」嘅感覺，更顯強烈，每日番學，並唔知為乜，只知道每日生存嘅意義，係為左佢嘅女朋友。而喺呢刻，佢嘅女朋友決定同佢分手。呢件事，令浩賢徹底崩潰。
  浩賢唔想番學，因為番學呢件事唔能夠令佢得到安全感。佢每日都出去揾朋友傾計、食飯，見到朋友，佢個人係開心左嘅。然而，當佢地道別嘅時候，佢再次感到失落、孤獨。
  浩賢冇番學，佢唔想日日喺屋企鳩坐，於是佢去左番part time，揾到嘅錢，佢用黎去旅行。
  浩賢一個人去到機場，坐喺登機閘口前，望出停機坪，佢估唔到第一次一個人去旅行，係因為失戀而導致；佢曾經好想同女朋友去嘅日本，而家竟然係一個人去。
 
  而家嘅浩賢報左名讀一間新嘅學校，然而，武漢肺炎加上反送中運動，社會一切都停止，氣氛沉重。浩賢只能夠等待……




 
  煙頭燒到盡頭，浩賢呼出最後一啖白煙，將煙頭掉落地，走上巴士……