《 這裡不是香港，這裡是852區！ 》－6月21日 更新章節：美好結局: 計劃始末

　　一直在前座的人，竟然是元將！
 
　　「你唔係第一日話被洗腦完之後，就冇再登入喇咩？點解…」
 
　　「因為我根本無被洗腦囉，啲戲好唔好先？」
 
　　元將沒有等我提問便主動解說。
 
　　原來他向我求救，只是配合行動，在「城市狙擊」推出後引導我登入。他比靳紅更早覺醒，這些年來一直裝著普通新人類般生活。
 




 
 
　　「所以你呢九年黎都係做戲？我地既友情都係假既？」
 
　　「又唔可以咁講，我地既經歷都係千真萬確，我真心當你朋友。只係自從知道你既身份後，我就要更加唔可以放棄你，同時支援佢地，加快『城市狙擊』既開發。」
 
　　元將雖然雙目無神，但那開懷的表情卻是現實裡從沒表現過，至少這九年間我是第一次看見。
 
　　或許在其他覺醒者面前，他才能找尋到真實的自己。
 




 
 
　　那麼現在只剩下于嶽巴與那墨鏡少女，根據于嶽巴所說的計劃，他們該是同夥。
 
　　假若二人確實是特工，而我主動追問，不就暴露他們身份？
 
　　但鋅爺所言非虛的話，那特工明顯就在編故事，什麼特殊編碼、遊戲漏洞都是假的。恐怕是要我繼續遊玩，協助政府找出鋅爺他們吧。
 
　　我內心還在掙扎是否該主動追問，靳虹已經解決我的煩惱。
 




　　「哥，其實我同你見過兩次，提你救醒哥，仲打招呼歡迎你架。」
 
　　原來墨鏡少女就是我的妹妹。現在回想起來，那身型的確有幾分像靳虹，只怪她覺醒後我們便開始疏遠，對妹妹的印象也不及肥環清晰。
 
　　「咁于嶽巴即係你地既人啦？」
 
　　我一臉無奈地向鋅爺提問。如我所料，他亦是覺醒者，主要目的是確保我繼續進行遊戲。
 
　　至於他所說關於特工的事，除了開發組關於遊戲漏洞所有陰謀外，其他全都是真的。
 
　　于嶽巴這樣做，亦是因為需要從政府角度出發，試探我對於事實真相的信任度，看看我會否盲目相信政府的一切。
　　
　　太好了，現在所有謎團都已解開，只剩一個我需要面對的問題。
 
　　




 
　　鋅爺看到我稍為放鬆下來，心情也變得開懷。
 
　　「哈哈哈…聽完成件事既真相後有咩反應？」
 
　　「我只有一件事唔明，我地而家生活得好好地，點解要反抗？點解要推翻？根據你頭先所講，原本既舊現實世界，舊人類根本就錯漏百出，點解要咁做？」
 
　　我真的不明白，既然新世界被他們說得如此完善，為何還要刻意破壞？是外星生物的模擬實驗又如何？至少我們都是活生生、有血有肉有感情的人類！
 
　　我和楊玉環之間的愛就能證明這一切！我相信我們便是彼此的鎖與鑰匙！
 
 
 
　　「點解？好有趣既問題，八年前你冇咁問，但而家反而問我，係因為你呢八年你對呢個世界多左認同？係！你講得冇錯！人類係有好多缺點！但正正係因為呢啲缺點，人類先會不斷發展，不斷改進，而唔係單純跟程序、跟規矩生活，生出黎做五十年野然後去死既活體機器！」
 




　　「咁推翻左又點？以前有咩好？」
 
　　「靚仔，你係咪比個新世界荼毒左呀！知唔知咩叫自由呀！舊時我生活既香港的確好多不公平事，生活雖然辛苦，每日就係返工搵錢，但至少開心！好記得我老豆係2014年終於儲到錢買樓上車果種開心既感覺，雖然只係屯門一間豆潤咁細既屋，要成三百萬，仲要供足三十年，但至少呢啲係我地自己親手賺返黎既野呀！而唔係好似你地咁…咳…咳…！」
 
 
 
　　「鋅爺，其實除左你之外，冇人知道以前香港係點…」
 
　　鋅爺越講越激動，元將回頭提點他，只是效用不大。
 
　　「我未講完呀！飲酒對身體有害又點呀！開心時飲酒，失戀時飲酒，想笑就笑，想喊就喊，幾實在！講粗口又點呀！只係抒發感情既助語詞！好過你地班跟程序走既新人類咋！你老母個仆街仔，講極都唔明！」
 
　　「鋅爺唔好勞氣，你鬧佢老母即係鬧你自己個女，小心身體…」






　　元將又再回頭提醒鋅爺，順便讓他情緒稀為平伏。
 
　　「呀係喎…啋啋啋再講過。知唔知點解我特別導你去筲箕灣？因為果度係我長大既地方，即使去到2017年，好多區經歷過重大改變，當金舖藥房多過七仔、商場全部都係大集團倒模式經營、通街都係連鎖品牌既時候，果度仍然保留住舊區小店既街坊感覺。」
 
　　說到這裡，鋅爺雙眼開始冒紅筋醞釀淚水，似乎回憶起小時候令他懷念的情境，只是我永遠不會體會到。
 
　　「總之你係我個孫，你就要明白大家辛苦所做既一切。今次我地入到黎影子世界，班特工冇可能跟埋黎阻頭阻勢。連你個妹都明，點解你仲係諗唔通？」
 
　　對鋅爺的質問，我坐在車內不發一言。
 
 
 
　　其實我是完全相信鋅爺所說的話，但是如果覺醒了，那我對楊玉環，也會像靳虹對我那樣冷淡嗎？有血緣關係的兄妹都尚且如此，何況我們…？
 
　　我不想放棄楊玉環，不想放棄現在的生活。但自己的外公、妹妹與好友都這樣說，我該怎辦？




 
　　「我好亂…我咩都唔知，可唔可以比我落車靜下？我聽日係咪搵梅姨就可以入黎？」
 
　　「都好既，你要記住，我頭先勞氣都係因為關心你咋衰仔，我唔想你做啲對唔住你阿媽既野。另外你入黎已經過左四十分鐘，安全起見一個鐘內記得登出，我解左你個選項架喇。虹，比佢係度落啦。」
 
　　鋅爺又變回那位慈祥的老頭子，其實我對他沒有反感，只是在楊玉環與他們之間掙扎。
　
　　「鋅爺，放呀哥係度落真係冇問題？你唔驚佢亂諗野或者冇登出而比系統發現？」
 
　　「放心啦，你望下周圍除左車之外人影都冇隻，可能佢真係想冷靜下呢。靚仔，我講得有冇錯呀？」
 
　　我向他們點頭示意。
 
　　於是靳虹在龍翔道近九龍塘觀景台的行人天橋附近讓我下車，在車門關上前，鋅爺最後再向我道別。
 
　　「靚仔，你好好諗清楚。呢度有得食，有得住，安穩直到老死，咁就係自由？」
　
　　這句話以後，他們三人便和那台黑色私家車一起絕塵而去。
 
 
 
　　我看著龍翔道車輛往來不絕，反覆思考鋅爺的話。我只想過平靜生活而已，為何偏偏有如此重要又麻煩的身份？
 
　　現在社會一切正常安穩繁榮，何必徒添風浪，硬是要把852區弄得翻天覆地呢？
 
　　但是換個角度，既然靳虹也覺醒了，我應該跟她一樣，捨棄所有東西，認清眼前的真相。
 
　　那爸爸呢？他又是過著怎樣的生活？的確爸媽二人是很幸福，恐怕那只是裝出來的吧。忽然覺得爸爸其實很可憐，而如果我不覺醒，也只會和他一樣可憐。
 
　　當我在迷惘時，後方突然傳來年老聲音的邀請。
 
 
 
　　「喂，後生仔，係下面食塵咩，上黎坐啦，呢度風景好好多架。」



https://www.facebook.com/cfruitall