香港都市傳說：一筒歸西: （八）恐懼的緣由（４）

「痴線，你講真定假呀？」
 
韋洛聽到阿榮的故事，感到難以置信。
 
「邊有得假啫，我相都影埋啦！」
 
的確，阿榮手上的照片便是最好的證據，但這種希奇古怪的事情實在不容易令人相信。
 
「輝仔間屋恐怖到呢，又臭又核突，我都唔明當時點解會夠膽行入去。」
 




阿榮回憶起當時嘔吐大作後，好不容易才恢復冷靜，然後他聽到屋外傳來陣陣吵鬧聲。
 
「好臭呀，咩事呀？」
 
「哇，仆街，好核突呀！保安呢？快啲叫人報警！」
 
阿榮隱約聽到屋外已經變得混亂，他知道一旦警察到來，他肯定會惹上不少麻煩。雖然輝仔不是阿榮殺的，但很難確保不會被人誣陷。
 
而最重要的是，一旦警察接管這案件，輝仔的慘況可能會被封鎖，不能報導出來。屆時阿榮即使想告訴別人或找別人求助，很有可能也不會得其他人信件。
 




於是，阿榮強壓下心中的不安，馬上把現場的情況拍下並上傳到雲端。
 
之後警察來到，阿榮想當然地被邀請協助調查。
 
據說開初時，警察有意無意地想逼阿榮承認是他殺死輝仔，但現場發現的證據及阿榮所說的所有事情，經調查後都一一證明阿榮是無辜的，結果扣留了48小時後便被釋放。
 
見到韋洛和阿邦，已經是輝仔死後第三天的事情了。
 
「但係咁大件事，我唔見新聞有報嘅？阿邦你有無留意到有咁嘅新聞？」
 




阿邦搖了搖頭。
 
「我出返嚟之後都有睇返啲新聞，其實有報導㗎，不過......你哋自己睇啦。」
 
阿榮拿出了一本筆記簿，內裡把這兩天關於輝仔自殺的報導都整理好了。
 
「你哋睇下個地址，無呃你哋。」
 
阿榮指著報導上的地點，的確是輝仔居住的地方。
 
但是，標題和內文，卻有點奇怪。
 
「啲標題咩事，『一名男性在家死亡 懷疑欠債自殺』，『男性於屋內自縊 警方表示沒有可疑』。最尾呢個報導先痴線，『男性留下遺書自殺 警方調查後證實沒有可疑』。輝仔無啦啦點會有咩欠債，我哋早幾日打牌先講嚟緊要去邊度玩，留咩遺書自咩殺呀！」
 
阿邦看到新聞的標題，怒不可遏。




 
「你哋睇啲新聞，全部都無相嘅，九成啲差佬封鎖晒消息，佢哋講咩啲記者咪寫咩囉。傳統媒體唔報得，不過網上面啲討論區已好多人提出質疑，仲有相流出。」
 
阿榮打開了某幾個討論區，內裡刊登了一些鄰居的證言，和一些應該是由鄰居從屋外拍進屋內的照片，雖然有點模糊，但仍可隱約看到遍地麻將和腐肉。
 
「咁你做咩唔將啲相畀傳媒或者放上討論區？」
 
韋洛看著眼前的照片和討論區的主題，已不再懷疑阿榮的說話。
 
「我原本都想，但如果我將啲相放上，啲人肯定知道係我，到時啲差佬肯定會嚟搞我，隨時又捉我返去坐48個鐘。輝仔講咗下一個係我，我唔想畀班差佬浪費我啲時間，到時我咩都唔做死喺差館入面，分分鐘無人知仲大鑊。」
 
韋洛和阿邦點了點頭，認同阿榮的說法，只是面對這種離奇古怪的事情，他們可以做些甚麼？
 
「不如我哋去黃大仙廟上注香，可能拜下就無事呢？」
 




「咁求奇得唔得㗎？」
 
「咁一係我哋去搵個師傅幫手驅鬼，深水埗嗰邊好似有個師傅唔錯㗎。」
 
「啲師傅會唔會呃人㗎，依家啲師傅唔係性交轉運就係白撞呃飯食。」
 
「屌，你乜都唔信唔駛玩啦，等死囉。反正又唔係我。」
 
「食屎啦你，我死咗下個咪你囉，你點都走唔甩㗎！」
 
就在兩人爭吵期間，韋洛則繼續專注地看著阿榮的手機。
 
「你哋唔好嘈住，我發現咗啲嘢！」