為了實現媽媽遺願，我成為了女校男生: Christmas Ball (1)

今晚係christmas ball嘅晚上，老實講，我真係第一次參加christmas ball，以前都係以搞手同工作人員身份參加
 
我打開衣櫃，揀左件香檳色嘅伴娘裙，同埋對兩吋半高嘅白色高踭鞋出黎，見到對鞋，總係覺得爭少少野咁，其實世界上有邊個女仔唔想好似灰姑娘咁著玻璃鞋?不過要真實存在先得架嘛
 
“叮咚”屋企嘅門鐘響起左，然後就聽到雪晴嘅大叫
 
「姐夫!!!你好有型呀!!!」
 
我走出去望一望阿風，佢著住套西裝，係有馬甲果款，三件裝，加埋牛津鞋，同平時嘻嘻哈哈嘅佢係完全唔同
 




「你…完全唔同哂…」
 
「呢套衫?我姐夫教我咁著嘅…」佢邊講邊R頭，好似有D尷尬咁樣
 
「雖然有D唔慣，但係妳今晚係我partner，所以唔可以失禮妳嘅」
 
「你普通西裝咪得囉，我又唔係咁重視」
 
「咁我第一次出席…要隆重D嘅」
 




「家姐，妳地玩得開心D啦~我呢D 小朋友留係屋企打機得啦」
 
「妳乖乖地呀」
 
「家姐今晚妳返唔返屋企呀?」
 
「返呀!!」
 
我地兩個搭的士返學校，沿途已經有好多友校同學黎緊
 




「BB豬呀…」
 
「嗯?」
 
「不如我考車牌，下年我車妳黎Ball好唔好?」
 
「要你浪費錢買車，唔好啦，留返d錢仲好啦」
 
「我爸爸部車仲係到，不過舊就舊左d，但係我好鍾意」
 
「爸爸部車?泊左係邊呀?」
 
「泊左係契媽屋企」
 
========================================================/




我同雪凝算係早到場果批同學，入到hall，已經見到d椅已經蓋上絲絨布，小食已經準備就緒，現場有小花檔，俾各男性買花向心儀女性送上鮮花或者宣示主權
 
「妳地真係好重視喎」
 
「每年好多同學都打扮得好靚，就係為左今日」
 
「識男仔好時機?」
 
雪凝微笑咁講「奶奶日日都楝係學校門口，又命令訓導處同體育老師係山到周圍巡，所以我地學校先俾人話佈下結界，雄性生物一踏入就會化灰嘅傳說」
 
「契媽都係擔心妳地安全者，妳睇，我一樣咪攻到入黎」
 
「係囉，我咁樣就俾你呃左返黎囉」
 
「bb豬呀?」




 
「嗯?」
 
「我未送聖誕禮物俾妳喎」
 
「唔洗啦，你係我身邊就係最好嘅禮物啦」
 
各位男士，千祈唔好信呢句說話，呢句係最普通嘅level 1，輸經驗情竇初開嘅小男孩，第一次中招一定係中呢句
 
我拉住雪凝出去會場一邊，當時已經有好多同學返到
 
「今次到妳合埋雙眼啦」
 
「神神怪怪架」雪凝好聽話咁合埋雙眼，然後我係西裝袋中拎出一個長長嘅盒，正當我想打開幫雪凝戴起條鍊果陣，又聽到我地班同學嘅招牌叫聲
 




「“eeeeeeeya~~~~~~~”好sweet呀你地兩個」
 
雪凝下意識打開眼望下佢地，我亦以一個無奈眼神望返佢地
 
「呀!!!唔好意思!!!阻住哂你地添，拜拜」我懷疑緊佢地係咪黎搞破壞
 
雪凝低頭望一望我雙手，再望住我
 
「你…幾時買架?」
 
作戰失敗!!!
 
「上次我捉埋阿妹同妳行街果陣，佢暗示過呢條鍊好襯妳，所以第二日我就去買落黎」
 
「唔…下次唔好聽佢講啦，又要你用錢」




 
「買野俾我嘅bb豬，有咩所謂呢，咁妳鍾唔鍾意?」
 
「只要係你送嘅野，我一定鍾意」
 
我幫雪凝戴起左條鍊，真係好襯佢，然後我地就手拖手入場