為了實現媽媽遺願，我成為了女校男生: 你問我答(5)

「咁而家隻錶點呀?你戴住左喎，我見佢郁緊添喎，有冇野想同果位做班長嘅同學講呀?」Joanne已經睇穿左我同雪凝之間嘅關係
 
「佢係上個月幫我用一切方法整返好，所以…..雪凝BB!」
 
「係!!」雪凝眼濕濕咁望住台上嘅我
 
「好多謝妳，多謝妳令到我爸爸返黎我身邊，妳果晚同我講果樣野….我會應承妳。」
 
雪凝例牌又係到喊
 




「喂呀!!!你整喊左Jessie啦死人頭」Ivana係位到大叫
 
「咁你點樣報答Jessie呢?佢幫你整返好隻錶喎，你地兩個原來小學果時互相鍾意對方」
 
「咁我娶佢囉好未?洗唔洗學我爸爸咁係畢業典禮求婚?」我咁樣講，已經間接向全校宣佈雪凝係我女朋友
 
“eeeeeeeeeya~~~~~~~”
 
「咁唔怪之得你兩個經常孖公仔咁出現，睇黎個傳聞係真」Joanne眼神果下都好奸，我都以微笑作回應
 




「爸爸離開果時講過，話媽媽好鍾意聽佢唱歌先瞓覺，由拍拖時開始已經係，所以，爸爸係醫院時用力教我唱幾首歌，叫我每晚負責氹媽媽瞓。」
 
「你爸爸真係好錫你媽媽」
 
「自從我冇左爸爸之後，成個人每日返學都扮笑扮開心、唔讀書去逃避一切，令到自己升中去左間好差好差嘅學校到讀，我中一二果兩年，係警署常客，我認我以前係好多黑底朋友，雖然係咁，我都繼續每晚都唱歌俾媽媽聽，氹佢瞓，無論我幾錯都好，點樣同人打架打到一身血都好，返到屋企，媽媽都會原諒我，屋企就係一個保護所，但係去到我中二果年下學期，我同家姐連最後可以保護我地嘅地方都冇左。」
 
「發生咩事呢?」
 
「果年媽媽照顧我地兩姊弟，心力交瘁，自己有腦腫瘤都唔知，到確診時已經係末期，好快媽媽都離開左我地，短短五年時間左右，我由一家四口，變成兩姊弟相依為命。媽媽離開前講過，將來大個仔，識到女朋友之後，要好似爸爸咁樣唱歌俾媽媽聽咁氹女仔瞓覺，而姐夫就要唱俾家姐聽氹佢瞓」
 




講到呢到已經好多同學喊緊，包括Joanne
 
「當我同家姐收拾媽媽遺物果陣，我地見到佢一封信，給20年後的自己，信上寫，因為屋企冇錢，唔可以係自己最自豪嘅母校升大學，希望將來可以生個女，幫佢完成願望，家姐一睇到之後就喊到收唔到聲，因為佢覺得自己幫唔到媽媽，果時家姐已經升大學。所以唯一希望就放左係我呢個細仔身上。」
 
「所以你就發力讀書?」
 
「但係談何容易?我地向以前拉我嘅警察幫手，果陣我仲係警司警誡緊…佢地係我中三果年，要教育局幫我換學校，家姐間大學就無條件收留我地兩姊弟，等我地兩間屋可以放租儲錢。當年每日都有反黑組或者普通警車送我返大學Hall到，然後家姐同學同埋教授幫我補習，幫我追返進度，喂MIT教授幫我補習呀喂。果幾年我真係星期一至五日日係Hall到溫書，最多星期六日去跟班大學生打下波，冇咩娛樂，似坐監多」
 
「但你家姐畢業後呢?」
 
「幾年後，家姐畢業，佢一直都想找尋自己夢想，佢曾經都想放棄 ，因為擔心我呢個細佬，但係我都同佢講『唔好後悔，我大個架啦，放心自己做自己鍾意嘅事』於是佢就去考空姐，仲竟然成功….然後仲識到個副機師男朋友，天冇眼」
 
銀幕中播出家姐制服長腿黑絲相，全場大叫“好靚女呀!!!”
 
無可否認家姐真係好靚嘅…..當佢唔D人LM果陣…..




 
「咁嘅垃圾都有人要…所以各位同學唔洗怕嫁唔出」
 
突然空氣又轉冷，果時有部747係天空中飛過