為了實現媽媽遺願，我成為了女校男生: 再一次表白(1)

我嘅生日非常平靜，因為我慣左冇人陪我慶祝，但我就愈來愈緊張
我點同雪凝表白好?佢生日果日係星期六，我同佢都要返學校補課，所以返放學都冇雪晴係到，咁就決定…星期六啦
 
“生日快樂!!!Jessie!!!!”一大班同學係課室同佢舉行生日會，大家都好開心
 
「喂!!你唔同Jessie一齊切蛋糕架?」Ivana奸奸地咁望住我
 
「我?」黑人問號中
 
「你都係五日前生日嘛!!過黎啦!!!兩公婆一齊切啦，拿，一齊拎住把刀，係…切落…唔好切到最底」我地兩個主角俾佢地玩得好開心，而雪凝就面紅紅咁對住我




 
「許左願未架你地兩個?」
 
「得啦…妳咪咁八」
 
「Jessie，一陣可能有特別生日禮物喎」
 
「邊…邊到有呀」
 
「俾d幻想，俾d幻想」Ivana拍拍雪凝膊頭同時，佢都望住我，佢應該知道今日我會同雪凝表白




 
放學後，我地兩個落車後慢慢行返屋企，當雪晴唔係到果時，我地都慣左搭電車一齊慢慢返去，老實講，我真係好鍾意搭電車，貪佢夠靜夠慢夠舒服，而且我地獨處果陣，我地係會早少少落車輕輕拖住手慢慢行(即係我捉住佢幾隻手指咁行)，當我同佢行到海邊之時
 
「喂…俾你隻左手我丫」雪凝微笑咁對住我
 
「有咩事要斬我左手落黎?」我伸出我隻左手
 
「合埋眼丫」
 
我照雪凝說話去做，合埋雙眼，斷估佢都唔會搵個蛋糕拍落我塊面到掛




 
佢幫我除左我手上果隻g-shock，幫我戴返起另一隻錶，我feel到，係一隻機械錶。
 
機械錶…莫非係…
 
「得啦，打開眼丫」
 
一睇隻錶，我呆左，係爸爸送俾我果隻蘇聯軍錶，我見到時呆左唔識反應，而眼淚慢慢流出黎
 
我將隻錶放係耳邊，錶入邊嘅聲音話我知，佢復活了，”咔察咔察”嘅聲音返黎了
 
「多…多謝妳呀…爸爸返黎啦…我終於搵到果個人啦…你見到嗎?」我已經開始講唔到野
 
「隻錶…我幫你整返好…希望你…」
 




雪凝未講完呢句說話，我已經同佢重演5年半前一幕
 
我雙手捉住佢，拉埋我身邊，將我個咀緊緊貼實佢個咀，又係差唔多一分鐘，我感覺到佢心跳同5年半前一樣，愈來愈快。直到佢不斷拍我心口。