為了實現媽媽遺願，我成為了女校男生: 公主抱

「妳行唔行到呀?微波爐?」
 
「行慢d囉，你趕時間嘅話可以走先唔洗理我」
 
「家姐，妳唔好死頂啦，我抱妳唔起架」
 
我慢慢扶住雪凝去校門，我右手拖起佢隻右手，左手扶住佢條腰，我成隻手將佢細細嘅手完全包實，佢冰冷嘅手慢慢開始變暖，係脈搏中，我感覺到雪凝心跳愈來愈快
 
雪凝頭髮嘅香氣、身上嘅氣味慢慢刺激我鼻內嘅細胞
 


莫非呢個就係身高25cm嘅距離?
 
因為雪凝佢真係行得好慢，所以我決定用呢一招：公主抱
 
左手兜佢背，右手托起佢對腳，佢下意識咁雙手攬住我條頸
 
「喂!!!」
 
「妳連行都行唔到，我抱起妳仲快啦」




雪凝望住我塊面紅哂
 
我係雪凝身邊細細聲講「心動呀bb豬?」
 
「你…你仲記得果日你咁叫我呀?」
 
「咁果日係同妳表白嘛」
 
「你叫表白咩?錫完我就走左去，我想應承你都唔得」


 
「原來妳果陣鍾意我呀?咁以後叫返妳做bb豬好唔好呀?」
 
雪凝面紅紅擰轉面咁話我「痴…痴線啦你，而家我鬼得閒鍾意你呀」
 
我抱住雪凝由6樓搭電梯去地下，再行去大門，而我呢個動作都引黎好多同學大叫
 
「差唔多到啦喎」
 
「到咩呀姐夫?」
 
「車囉!妳家姐咁樣點返屋企呀?」
 
「你兩個唔想再親密多陣咩?」