為了實現媽媽遺願，我成為了女校男生: 三個飯盒?

「雪凝呀!」
 
「係!」
 
「點解雪櫃有三個飯盒嘅?妳地兩姊妹唔夠食咩?」
 
「呀….媽咪呀…」天生唔識講大話嘅我，仲諗緊點答媽咪之時，雪晴已經幫我答左
 
「媽咪，我地學校今年黎左個6呎高嘅男仔黎讀，同家姐同班，係家姐個小學同學」
 




媽咪聽到後都呆左一呆
 
「男仔喎，去女校到讀?」
 
「女校男生，歌仔都有得唱啦」
 
「雪凝妳同佢拍拖呀?幫佢煮飯?」
 
俾媽咪咁問一問，我立即擰頭「唔係呀!只係佢屋企冇人煮飯，我地先幫佢準備飯盒」
 




「冇人煮飯?佢屋企唔開飯架咩?」
 
「媽咪，果個男仔爸爸係佢同家姐小學四年級果時過左身，媽媽係兩三年前過埋身，得返個做空姐嘅家姐一齊住，家姐見佢日日食學校D屎，咪煮埋俾佢囉」
 
「四年級果時…呀…程逸怡同程逸風兩姊弟丫嘛!」
 
「媽咪妳又識佢?」
 
「妳小學時有家長會架嘛，我記得有次出席活動，有個同學冇家長黎，只係有個著校服讀中學嘅家姐做代表，所以我地D家長走去問佢咩事，佢就眼紅紅咁話媽媽要返工養家，爸爸就過左身」
 




「咁家姐而家咪想日日煮埋姐夫果份囉」
 
「衰妹，呢D野係學校咪亂講呀，一陣人地誤會就麻煩」
 
「媽咪~妳計定要幾多酒席啦」
 
媽咪已經無視佢個細女，繼續問我阿風嘅事，我都如實答哂出黎