交友app嘅萬事屋: 重新開始
重新開始
？/？/？？
今日係返到嚟香港隔離嘅第一日，我一直都冇覺好瞓，除咗係因為時差嘅問題，亦都係因為佢，Sofia，我到而家都唔明白究竟係咪我做錯啲咩啊，唔通我真係做得太多，定係佢男朋友叫佢離遠我呀，我諗唔明諗極都諗唔明，我只不過係一個好重視朋友嘅人姐，我甚至連自己嘅嘢都可以唔理去幫咗佢先，乜我咁樣有做錯咩，由細到大都係咁，見到有啲咩唔公平嘅嘢或者有啲咩發生係我朋友身上，我一定會企出嚟，我唔明白點解我哋要粒聲唔出企喺度俾人蝦，我哋唔係應該要反抗咩？
係我太無聊嘅時候，一直都喺度煩緊呢樣野，想搵人傾偈嘅時候又冇人得閒，有啲人就忙住溫書，有啲人連我嘅訊息都冇睇，其實可能係我嘅生活圍繞着佢太多，其他人都忽略晒，而家到我想搵人哋，都唔會理我啦。當我玩玩下手機嘅時候就見到交友app嘅廣告，咁我就諗，橫掂而家都冇人理我㗎啦，不如就下載落嚟玩吓囉，起碼都可搵吓人傾吓。我諗我應該唔會俾人呃掛，咁之後一上到去見到乜嘢標題都撳吓啦，其實都同一兩個人傾過偈，不過都係講啲好日常嘅嘢時事，當我以為可以傾落去嘅時候，下一日佢哋就離開咗，咁日復日每日都係咁之後我就遇到Hebe，同埋其他所有人。
咁就係喺見完Miki之後，我就開始諗返Sofia，好似又返返去啱啱返嚟香港嗰陣時個狀態咁，今日係12/5/20 ，我嘅一日同平時冇乜唔同，之不過今日阿爸阿媽都要OT， 所以就唔先煮佢哋飯，如是者，我見好似返嚟咁耐都冇飲過嘢，見今日兩老都唔喺度，就自己一個走咗去海旁吹下風，買咗少少酒，我自己酒量就普通，仲要係嗰啲飲一兩啖就成塊面紅晒，因為得我自己一個，所以就聽下歌啦，咁啱就播到張學友翻唱嘅「李香蘭」「夜放縱，告知我難尋你芳蹤，回頭也是夢，仍似被動，逃避凝望你，卻深印腦中」
唉，所以話有時話音樂係可以帶給人感觸，跟住我又犯賤，係到睇返個相簿，諗返起以前點樣相處同埋所有經歷，咁眼角不禁留下幾滴眼淚，我向住個海大嗌「而後你嘅我唔會再理，唔該唔好再搵我，屌你老母死臭閪」
最尾嗰句好似嗌得大聲咗，側邊啲人喺度望住，不過今晚都飲咗唔少，好似有少少醉意。 突然間手間短訊鈴聲一響，係三十路姐姐搵我，佢問我啲嘢我自己都唔知自己搭咩，又係到hea 覆，跟住我諗佢察覺到我唔喺好對路，跟住佢就講啦：
「阿銀你搞乜鬼啊，好明顯係到hea 覆緊我姐，係咪有啲咩心事呀？」
「有冇心事，梗係有啦屌。」
「嘩！點解個態度180度咁轉，你係咪飲咗野？」
「係咯，你又知我飲咗嘢，嘻嘻嘻，冇嘢啦咁，又唔係飲得好多，不過仲行到路，返倒屋企嘅。」
「點啊咩事啊，做乜突然間自己出去飲酒？ 睇嚟今次到我做樹窿。」
「唉，冇啊諗返起以前啲野。」
「講嚟聽吓啦。」
之後我就全部野同佢講晒⋯⋯跟住佢就話：
「你其實好在意吧⋯⋯」
「講唔在意係假嘅 但係我一直都覺得我唔唔係鍾意嗰隻囉，我個種在意係擔心佢好 佢唔會唔會唔掂㗎，佢會唔會又唔開心㗎」
「咁咪即係在意囉，你鍾意佢，我覺得」
「我受夠啦，點解永遠都係我付出，冇人為我付出」
「。。。付出唔好望回報」
「就係我付出得太多⋯」
「你覺得難受，係因為覺得唔受重視」
「受到嘅傷害都好大，可能你咁講都啱嘅，」
「你當佢係朋友，但你覺得佢唔當，因為佢唔重視你，所以你傷心，難受，負面」
「係，我覺得自己放低左，但係其實未」
「未囉，好明顯」
「我自己根本就最清楚，我想逃避，我想上網識下新人，其實玩交友app呢件事根本就唔會幫到啲咩。」
「無錯，你其實都係喺到分散自己，唔好太過在意呢件事啦！」
「我知道自己呃緊自己，我以為咁樣會好受啲，其實唔係⋯⋯」
「其實呢件事先係你最介意，在乎既，心情上仲差吧。」
「係呀，你講得一啲都冇錯，亦都無謂再呃自己」
「係，其實我係你，我會選擇講曬出黎，結果得2個，一係就和好如初，比以前更好，一係就無左個朋友。」
「佢會聽咩，我真係唔知⋯」
「睇下佢係咩人，我從來都好珍惜我自己朋友的，我覺得傾開左會好啲」
「但係我真係好怕受傷，我寧願呃自己呀 我真係踏出唔到個一步⋯⋯算啦，我下年都轉校，都唔知仲有冇機會可以見到佢。」
「人生係咁㗎啦，跌跌碰碰，見識得多就會成長㗎啦。」
「 話說我仲記得，嗰一日走之前 佢仲着緊校服嘅時候，諗住問佢同唔同我影一張相 佢到嗰陣時都冇覆我⋯⋯ 跟住就我就開始明白，其實可能由頭到尾都係我一廂情願 當佢係friend呀」
「難聽啲講句，可能係，我講件事你知，你唯一可以做嘅就係裝備自己，將自己變得更好。」
「我因為佢，放棄左幾多野，叫自己去遷就佢，為咗嘅，希望可以同佢friend啲，希望佢唔好咁孤單。佢一開始男朋友轉左校嘅時候，佢成日都唔係好掂，我曾經同人講過呢啲嘢啊，不過佢就話，有時做friend嘅唔需要計較咁多，咁樣只會大家唔舒服，但係我依家想講嘅係 究竟佢有冇當過我係friend？」
「可能無，衰嗎我咁講⋯」
「唔會，你只不過係講事實，一樣我一直都唔敢面對嘅嘢⋯」
「可能我講既都係錯既，平常心面對啦！」
「我唔敢希望你講嘢係錯，我寧願你講句嘢係啱，可以俾我放低。」
「18歲仲有無限可能，唔洗擔心啦。」
「我唔知呀，我淨係知道我真係受傷啦，心很累⋯⋯ 都唔知我第時轉左校仲敢唔敢去識人，唉」
「無事嘅，眼訓嗎？」
「都唔知瞓唔瞓到⋯⋯ 頭先我上面講嘅嘢，一講嘅時候我個心真係好痛，好耐冇試過咁痛啊。」
「你中意佢，肯定，唔係一般朋友。」
「但係咁又點啫，佢已經有一個好愛佢嘅男朋友，佢亦都好愛佢男朋友，可能佢想同我劃清界線掛。」
「原來佢有男朋友，你唔係話佢男朋友轉左校，我以為分手了。」
「係呀佢男朋友轉左校，我以為分手了，原來我誤會左。」
「我明白了，你放手啦，講真的，唔好比自己再沈落去！」
「同埋呢我唔知你記唔記得啦，我亦都係個故到講過，我知道我阿叔有病嘅時候呢，嗰陣時呢真係好低迷，但係佢從來都冇問過我咩事。」
「其實唔洗講喇，唔好講清楚喇我覺得，早啲抖啦，都唔早啦，返屋企未啊？」
「返咗啦，頭先一路行一路同你講，你聽日都要返工，同埋我個心同個人都好攰啦 我諗我都係瞓先，再搵你啦，早唞啦」
其實同人講吓真係好似好啲，終於有人做吓我嘅樹窿，睇嚟今次之後，真係攰啦真係要唞吓，我諗都時候要放低啦，係時候要面對現實，唔可以再玩交友App逃避。不過喺呢度都遇到唔少事，聽到好多野，有心up嘅，有悲傷嘅，都會有開心嘅，輕鬆嘅。 我諗都係時候重新出發，下一次我上交友app嘅身份，唔會再係未成熟成日亂咁諗嘅我，可能得閒上去做吓樹窿幫下人都未嘗唔係一件壞事。
經過咁多樣嘢發生咗之後，同埋喺交友app聽咗咁多嘢之後，阿銀佢已經有所成長，開始識諗，唔會再自己亂咁諗，其實有冇拖拍都係順其自然啦，隨緣啦。
下邊呢一首係阿銀好鍾意嘅一首日文歌
佢哋歌詞就好似形容緊發生過嘅所有嘢。
呢度係其中一段 -白日 -King Gnu
誰かのために生きるなら
如果是為了甚麼人而活的話
正しいことばかり 言ってらんないよな
是沒辦法竟說些＂做正確＂的事情的吧
どこかの街で また出逢えたら
如果能在某處的街上相遇的話
僕の名前を 覚えていますか？
還能記得我的名字嗎？
その頃にはきっと 春風が吹くだろう
到那個時候一定 吹拂著春風的吧
真っ新に生まれ変わって 人生一から始めようが
蛻變為一個全新的自己 重頭開始再一次人生吧
阿銀係到祝大家武運昌隆
天佑我城。
交友App嘅萬事屋 第一季
完。