結咗婚十幾年，好似已經唔太愛。《相愛十年》: 耳語（四）
「好。」
他們行街市，他們行超市，買了幾舊姜，買了一盒無核青提。
阿朗捧着它們，思思挽着他的手，一路走回家。
她和他說東西又加價了，好像貴了一點點；他點頭，和她一起歎物價高企，即使他不清楚原先的價錢。
她煮飯，他們吃飯，他洗碗，全程很和諧。
和對方生活，說到底是舒適的。他們知道對方的吃什麼不吃什麼，進門出門前的小動作，糞便聞起來是什麼味道，長久的習慣締造出舉止自如的輕快。
「落街行吓好冇？」阿朗問。
思思明白：「好。」
於是，他們像拍拖一樣，下樓到處逛逛，二人都沒有說話。
是因為享受閒適嗎？恐怕不是。他們在心裏打了一份草稿，正默默練習，演講的時候要配合眼神、表情、動作，不可以有任何差池——即使，他們都感覺到對方的態度軟化，仍怕一旦有細節處理不好，就會前功盡廢。
行一行，又返回樓下公園，坐在那張長椅上，微風正好。
阿朗首先開口：
「係呢……我有啲嘢想講。」
「嗯？」
「你覺唔覺得我哋怪怪哋，好似同以前好唔同咁。」
「覺。」她看着他，坦白承認。
「其實，我覺得，我哋好似淡咗……或者唔係淡咗，但好似冇以前咁開心。」
「嗯。」
「啫係，我哋都……我哋都少講咗嘢，少傾咗偈，係呢一兩日先多啲。平時，都好似只係傾棉花糖咁……」
他回想，除了功課、興趣班、測考、冬季校服，只得訕訕地問好。
「好似係，連佢都覺得我哋唔太熟添。」
她自嘲於被女兒發現端倪；阿朗也笑：
「但係，我哋當然熟。」
「用熟唔熟嚟講我哋，好似有啲怪。」
他們已經很親，說不說話也有親厚情義，但確實不安於此，熟悉感正在剝落。
「都係。」
她深呼吸：
「我明你意思，我都係咁覺得——」
「嗯？」
她直直地看着他，像背誦課文一樣：
「我好唔開心——真㗎，因為我哋變成咁。但我唔想再咁落去啦，但係，我都唔知個問題出喺邊——你話，如果係喺以前，我會覺得都幾合理？但宜家，明明我哋都好好㗎……」
他見她已說不下去的樣子，順着手肘牽起她的手，替她補充：
「嗯，我哋係好好，過得幾好，個女又咁生性，又夠錢洗。係咪因為咁，所以覺得啲嘢永遠都只會繼續行落去……我意思係，冇太多進步空間，甚至有啲太習慣、太安穩？
變咗，好似好悶咁？」
他們達成共識。
她表達意願：
「嗯……但係呢，我真係唔想再咁。」
「我都唔想。」
「其實，我之前就想同你講，但係每次去到口唇邊，就講唔出咁……
我認我係有少少細膽，但係嗰陣時，我唔知你係點諗。我驚我同你講咗我唔開心，甚至同你講我覺得我哋……淡咗，就會番唔到轉頭，啫係——」
「係咪驚我唔係咁諗？或者，我都係咁諗，但係講咗，就番唔到轉頭？」
他忽然心寬，因為，他也有過這樣的思慮過程。
「係。」
「明。」
「嗯，唔係所有嘢講出嚟，就可以趨向解決㗎嘛，可能一講，連原本咁樣都冇埋呢？咁到時點？」
「我都係咁覺得。」
她有些不好意思地捽捽手指：
「我哋，好似、好似都幾廢。」
「係，垃圾。但係垃圾宜家識開口，係可回收㗎啦喎。」
他指着不遠處的三色回收箱；而她沒好氣地笑一笑：
「都擺咗成三十幾年啦——唔係嘅，個問題啱啱先有啫。」
「嗯。咁宜家我哋肯傾，你係想……？我係因為想解決，所以先想同你講出口，我唔想再係咁啦，我諗，我哋都好辛苦。真㗎。」
二人的語調平緩，聲線都是輕輕的。
她點頭：「嗯。
我啱啱咪話，之前想同你講嘅……但係最後冇講到嗰次。就係嗰日，嗯，我話嗰個學生同我表白嗰次。」
「係，我記得。」
他想起，那天她比往常熱情，笑容燦爛，像一次晴天娃娃顯靈的天朗氣清。
「嗰次呢，就係因為佢同我講完，我就覺得，其實，我好愛你。
或者係，你真係好愛我——哈哈，有啲肉麻添。」
這個太清晰的她，阿朗清楚知道，並且予以認識、擁抱、接納，未曾離開。
「係，少骨痹。」
「就係咁啦——我聽完之後，唔覺得會有人可以取代到你嘅地位。始終呢，我都太多謝你啦。」
她越說越小聲，很久沒有告白愛意，突然覺得有些難以啟齒；將目光投射到前面在玩「紅綠燈」的小朋友上，微笑。
「噢，對唔住。」
他摸摸她的頭。
他記起，當時他打斷了她，因為他生氣於他們陌生，而她卻與別人熟絡到被鍾情。
「唔緊要。所以嗰陣時冇講到。」
她的決心竟然在融化。
她補充：「我當時聽緊佢講，但係就只係得一種好攰嘅感覺，我只係諗起你，諗起你對我有幾好。」
「你都對我好好啊。」
「係唔錯㗎。」
「嗯……我嗰日唔應該發你脾氣，我諗多咗。」
「係囉，嚇到我唔敢講。」
「Well……雖然我就冇你咁正俾人媾，」只見思思笑着反了一個白眼，他說：「但係，我都有作出反思，都想改善……
我諗，我哋都有同一個感受，譬如我都會覺得我哋有嘢唔同、好掛住以前、記低對方嘅好，只係有啲無力。
咁耐以嚟，我番殯儀呢，成日接觸啲唔喺度嘅人，其實都幾令我珍惜生活，始終我都唔想瞓喺度等其他人化妝……咁但係，我好似——因為太有安全感？覺得呢一種平淡係唔會更改，有好過冇，好過大家連平淡都唔得。
所以，雖然珍惜生活，但係，就唔太珍惜……我哋。」
明明說珍惜生活、好好活着，第一個主觀感受是「好煩」，珍惜生活，卻沒有珍惜生活中身邊人的舉動，只在內心默唸、憂愁、後退。
「嗯，明白你意思。」
「但我想珍惜。宜家——或者係之前咁樣，我都唔太舒服。你呢？」
一切醞釀已久，終於不止困於無力腦袋中。
「我都係。」
「咁……就好啦。」
小朋友玩耍的歡快和老人家下棋的爭論忽然沒有了聲，他們只聽見自己的心跳，像已歷盡高山爬上了珠穆朗馬蜂，但無以為繼，只看着眼前美景卻不知是否應該原路往返——
說完了，之後呢？
「我想盪鞦韆，推我吖。」
思思站起，向阿朗笑笑。