那一天我成為了練習男友: 【XIV】新居

仆街，點解佢會知我住邊架。

我冇問出口，因為我知問嚟都嘥氣，佢點都會有方法可以將我死死地壓入佢嘅五指山下...

但我係一個徹頭徹尾嘅屋邨仔，佢冇理由都係住屋邨掛。

「係咩，咁你搬咗去邊啊而家？」

「海典灣。」





屌你，你搬咁近做乜鬼啊...

話說雖然唔係話特別靚嘅私樓，但我都覺得真係不錯了，對於我而言，呢度都已經係遙不可及嘅一棟樓，淺水灣就更加唔使講。

最大問題係而家我哋本身由唔知幾多個站嘅距離直接縮短至10分鐘內，咁我咪冇藉口偷懶唔陪佢...

「是但啦，你搬屋咪幾好，唔駛再長期依賴uber，老老實實搭下交通工具啦。」

「到頭來你都係要係度挖苦我，我搬過嚟呢區你唔係應該要開心先係架咩？」阿月嘟起自己個嘴望住我。





講真，百感交集且無言以對，係說不出的苦...

你話開心，係嘅，至少去搵佢果陣，唔使再長途拔涉咁闖入淺水灣呢啲偏遠又高級嘅地方。

但係咁樣一來佢會好易刮到我出嚟，變相我基本上冇得偷懶，呢樣野就係幣處。

人生好難啊～

「我地行啦，再唔行天黑啦。」我說。





下一站，恒安。

好快就去到要落車嘅站，亦都係我平時唔踩單車搭mtr嘅目的地...

「落車啦阿月，仲坐係度做乜，想去烏溪沙呀？」

「我第一次搭鬼知咩，咁惡。」

阿，語氣重咗添，應該係今日太攰了。

始終好耐冇試過好似今日咁過。

「月B唔好嬲我啦～」緊係嚟個原地求饒先啦。

「BB聲好難聽呀！再諗過啦！」





「咁呀，月寶？」

「謂呀咁咪一樣，再諗啦！」

於是我一路行一路改，佢就一路否決我嘅提議。

行咗差唔多十分鐘先行到去海典灣，真係有夠遠，睇嚟要研究下啲巴士路線，日日咁行會癲。

「你上唔上嚟坐下？」

「不了，我想返去抖下，今日好攰。」

「咁好啦，有啲嘢比你。」





佢攞咗一張卡出嚟。

「咩嚟架？」

「我屋苑嘅住戶證，等你之後嚟唔使綁手綁腳。」

「但係...」

「唔好但係啦，我比咗你就係啦，又唔係逼你嚟，叫你袋著姐。」

我點頭，然後準備轉身離去。

但我眼見佢要攞住咁多袋嘢上去，又唔忍心要佢自己一個拎住上去。

我即刻用佢比我個張卡嘟，打開屋苑嘅大門。





「我幫你攞埋上去啦。」

「好呀，唔該你...」

環保屋苑果然命不虛傳，的確係幾舒服。

佢住係最高嘅28樓，我估個海景應該會幾靚嘅。

「叮」隨住𨋢聲響起，我哋終於到達目的地。

走到門前，見到佢用指紋開鎖，感覺都幾新穎，雖則指紋開鎖已經唔係啲咩新潮既野，但我都仲係用咁傳統嘅鐵閘，同層嘅人都係。

「入嚟啦。」





「好。」

我係門前除鞋，講咗聲打攪晒，就行咗入去。

「擺啲嘢係度得啦。」佢指一指客廳嘅角落位。

我打量咗客廳一週，心諗呢度實在太正，地方寬躺，設計都係好典型嘅時尚設計，仲有張私人吧檯，外加海景露台。

This is absolutely my dream house damnnn!!!

「你去梳化坐低先啦，我斟杯水比你飲。」

「哦，話說阿雪呢？」

「佢唔會嚟呢邊架，佢係果邊定點工作。」

「明白。」說罷我就行咗去梳化到坐低。

「surprise!」

係我坐低嘅果個moment，有兩隻手出現係我膊頭。

「嘩！」我即刻嚇到彈反起身。

「咦，呢個唔係我個寶貝女嚟嘅？」

有個中年人突然係梳化後面彈咗出嚟。

「Daddy？你點解係度架？」阿月大呼。

Daddy？即係佢老豆？

Shit 咁快就要見家長？我未準備好喎...

「做咩未問過我就帶個男人返屋企阿？」

仆街，唔係認真嬲掛？

「呢個係我...男朋友嚟架，你就個男人啊！」

喂等陣先，你唔好同我講你老豆唔知呢單嘢喎。

佢不斷咁上下打量我，莫名其妙地感受到好大壓力。

「靚仔得嚟又幾高，唔...仲幾結實添，好啦，我個女就交比你啦。」

閘住先，咁快？？？

「其實呀，我係...」我望一望阿月。

佢用一個凌厲嘅眼神望住我，並做出一個割喉嘅動作，意思應該係如果我爆響口嘅話，佢會毫不猶豫咁殺咗我...

「你係？」

「我係凌希神啊uncle，好高興認識你呀。」

「哦…...咁我叫你神仔啦，過嚟陪uncle傾下計先啦。」

「咁就緊係好啦。」我再望一望阿月，見佢鬆咗一口氣，證明我冇get錯佢嘅意思。

我之後一定會同你算帳，要我同你一齊呃長輩？實在係太過分啦。

今日已經要瞞住我阿媽走堂陪你玩，而家仲要扮你真男朋友呃埋你老豆，我簡直係大逆不道啊...

等我仲以為練習男友呢件事係你屋企嘅意思添...

而家謎團又多咗一個...