那一天我成為了練習男友: 【XII】小辣

本身優哉游哉嘅一日就係咁被毁滅。

做完份野之後就訓唔著，有種莫名被支配嘅感覺⋯⋯

「喂⋯⋯喂！你耳殘㗎？」阿月好大聲喺我耳邊嗌。

「你咁大聲唔殘都難啦，咁惡做咩啫。」

「我叫左你五次啦，想問下你食乜咋嘛。」





我默默將自己隻手伸入褲袋入面，只係得返一張可憐嘅二十蚊紙咋陰功...

「淨係夠買包咋...」我好無奈敢講。

「日日食唔厭架咩。」

「厭唔厭都冇得揀架喇，得返張二十蚊咋。」

「得啦快啲行喇我請你啦，當係多謝你之前送我返屋企啦。」





佢都開到口咁講我都無謂拒絕佢啦，於是就咁跟咗佢出學校門口。

至於另一邊廂......

「咩話，你話條友出學校食飯？你係咪眼花咋。」阿基好大聲咁問。

「點會睇錯，條友偷偷摸摸咁樣同佢嘅尹小姐出咗學校門口呀。」芷琪答。

「平時叫佢一齊食都唔去，而家竟然走去陪女？吾係好兄弟嚟嘅。」





¬¬¬

以前都未試過係中午時段行過出嚟，原來都係咁多人架。

我以前成日以為貴嘢一定係少人啲，而家諗諗下，其實應該係得我呢啲少數人係真係完全負擔唔起啫。

「點呀你有咩頭緒呀。」阿月問我。

「我跟你啦，我真係無特別想食嘅嘢呀。」

「你係我男朋友嚟架嘛，點可以咁冇主見架！」

而家試用期都已經咁認真，究竟我做吾做到架。

「唉，我知啦，不如就譚仔啦。」





「Let"s Go!」

我以為佢會因為係大小姐而無食過譚仔添，睇嚟係我諗多咗姐，佢係唔識搭交通工具所以淨係搭uber啫，未去到連平民食品都未食過階段。

實在係鬆一口氣。

譚仔雖然都好多人，不過我哋都係等咗5分鐘左右就入都去。

由於充滿住飢餓感，我哋好快就落咗單。

我叫咗個清湯嘅墨丸米線，最主要有兩個原因。
一嚟叫一個送係最抵，然後就係因為我食唔到辣。

呢個可以話係人身最大嘅污點，比阿基笑咗好耐...





至於阿月就叫咗個魚腐雞肉麻辣小辣加一份皮蛋同一份豬耳，凍奶茶。

首先條友食咁辣我已經覺得痴線，佢重要叫多兩個小食，未免太過奢侈，不愧為千金小姐，我自己食一定唔會咁叫。

「嚟譚仔食清湯咁廢都有嘅，你唔係唔食得辣掛希神？」佢以一個好扭打嘅眼神望住我。

我好巧妙咁盡量避開佢嘅視線，因為我唔想承認呢個鐵一般嘅事實，亦係我對於自己最失望嘅其中一點。

求下你唔好在啤我啦...

我係等嘢食嘅過程中都冇乜點出聲，費事比佢有機會疾我。

話咁快啲嘢食已經嚟到，我望住自己碗嘢，再望佢個碗，係好明顯嘅紅白色對比，對於我來講算係一個大大嘅挫折。





「要唔要試下我個碗阿希神？」佢以一個極為諷刺嘅眼神望住我。

我猶疑咗好一段時間，但最終因為堅持唔想比佢睇死我，於是我鼓起勇氣接受挑戰。

我用自己嘅筷子係佢個碗到夾咗一株米線，慢慢咁放入自己個口到。

頭5秒覺得冇乜特別，點知過多咗無10秒，後勁令到我條脷瞬間麻痺，仲要係咁咳。

情急之下我忍唔住飲咗佢成杯奶茶。

「你唔食得辣咪講囉我又冇逼你食，你係咪傻架？」佢一路笑一路係度講。

「淨係做ptbf我已經覺得自己真係傻咗啦，你仲問埋晒呢啲問題。」

「乜嘢ptbf呀！係練習男友阿，唔好亂咁改命！搞到低級晒啦！」





「我都係想盡返男朋友嘅責任氹下你開心姐，咁惡做咩姐。」我扮到好唔開心咁，以緩解佢嘅怒火。

「原來係咁呀，對唔住呀我仲咁惡，你肯為我咁做我其實都唔應該咁對你嘅...」

原來我演技已經去到咁爐火純青，真係太犀利啦。

「無事阿我都唔會介意嘅，係工作嘅一部分嚟架麻，食嘢啦，同埋對唔住呀，擅自飲咗你杯嘢飲。」

我留意到佢聽到我強調係工作嘅時候，眼神明顯顯露出不悅，但係我唔認為自己有講錯啲乜，因為我哋嘅關係的而且確係用金錢堆砌出嚟嘅。

對我嚟講，佢係上司，我係下屬，就係咁簡單。

「你再係咁講嘢嘅話我就加緊塞我啲米線落你到，睇你點食。」

「對唔住月大人！」

諗返比小辣支配嘅恐懼，再食嘅話真係會小命不保。

睇嚟呢段微妙嘅關係只會越踩越深，其實咁樣真係好咩？

「你做咩係度放空呀，再唔食凍啦。」

「咁我唔客氣啦。」

究竟我係度做乜嘢。