《那天，我遇見一個奇怪女孩》: 第十四章

也是，在這裡空想亦無法得知真相。

我離開了KFC，然後撥了通電話給雪遙。

「喂？」

「楠...？做咩打俾我嘅？」

「哦冇...上次平安夜見唔到你...又唔見你返工......」





「想睇下你有冇咩特別事。」

電話的另一端，安靜了幾秒。

「冇事呀，我想用多啲時間溫書所以冇報更。」雪遙以平和的語氣說。

「咁你媽咪啲錢呢？你搞得掂？」

「有個親戚借咗俾我，所以暫時都冇問題，唔洗擔心！」





「親戚...？未聽你講過嘅。」

「佢......唔係成日聯絡嘛！」

「咁樣......」

「喂呀楠，唔講住喇！我仲有好多嘢未溫！開學再講啦！...拜拜！」

「喂...！」





還未反應過來，她已經掛線了，我只好把電話放回口袋裡。

坦白說，我有點懷疑雪遙所描述的事。

這麼久以來都沒聽過她有親戚，而且是能夠向雪遙借上一大筆金錢的人。

不過，雪遙沒上班好幾天也是事實，這樣的話，可以得出一個結論。

就是的確有某個人給了雪遙一些錢，解決了她當下的煩惱。

但究竟這個「人」，是誰？

左想右想也沒什麼頭緒，我輕輕嘆一口氣，唯有先回家再作打算。

畢竟假期之後有考試，也不能完全不溫習。





於是剩下的一星期，基本上我都宅在家中，除了吃飯都沒外出。

十數天的假期轉眼便過去，也迎來令人抓狂的考試。

假期完結前，我特意去了一趟醫院。

因為雪遙的身體檢查報告有結果。

只是看了結果之後，我並沒有通知雪遙。

「點呀你苦口苦面咁樣，同人哋嗌交嚟？」

「嗌咩交......你知我唔鍾意嗌交。」我躲開智恆的視線。





「咁你搞咩，成個人散發住一種頹廢嘅氛圍。」

「冇，有啲嘢諗唔明啫。」我托著頭說。

「咁你慢慢諗啦，我返去溫書。」智恆拿起斜孭袋，便離開餐廳。

「你都會溫書...真係世界變...」我碎碎唸著。

結帳之後，剛踏出餐廳便碰巧遇到雪遙。

「咦？咁啱嘅。」我微笑道。

「唔係啦，我專登嚟搵你。」

「咁突然？」





「因為之前平安夜放咗你飛機...假期又冇咩點見...」

「傻啦，好少事啫，我都冇擺喺心。」我摸摸雪遙的頭。

如是者，我跟雪遙一起步行回家，沿途我有意無意地問起她假期的生活。

「係呢你放假除咗溫書仲有冇咩做？」

「嗯......冇呀！瞓教囉，而家咁凍唔想出街哈哈。」

「都係。」我笑道。

「咁你呢？」





「冇嘅~本身約咗個女仔，不過俾人放飛機。」我閉上眼搖頭說。

「喂呀頭先先話冇擺喺心！而家又俾說話我聽！」雪遙噘起嘴來。

「我都冇話個女仔係你~」我得意洋洋地說。

雪遙有點驚訝，然後突然停下來看著我。

「下..！乜你原來仲有同其他女仔出街..？」雪遙有點嚇呆了。

「......噗...我都冇話個女仔唔係你。」

「車，嚇死人咩......」雪遙又繼續走著。

「你啱啱係咪呷醋？」我開玩笑問。

「邊..邊有..」她別過臉說。

就這樣你一言我一言地打打鬧鬧，令我暫時忘記那份身體檢查報告。

總感覺中五這一年過得特別飛快，好像什麼也沒做就到了下學期。

但事實卻經歷了不少，可能是人越大，時間流逝的速度也跟著快起來吧。

日子還是這樣過，只是今天以後，從此校園裡便少了一個朋友。

一個十分珍重的朋友。

雖然不太情願她離開，但這天總要來臨。

今天，是中六的Last day。

小息和午膳時間我沒有特意去找巧渝，因為我怕會在別人的課室裡大哭一場。

所以我通知了地理學會所有成員，在放學之後到操場等待巧渝。

歷年以來，所有中六生都會留在操場一起拍照、互相在對方的校服寫上祝福字句、一起暢所欲言，直到黃昏，甚至晚上。

以巧渝受歡迎的程度，估計未到放學她的校裙已滿是字海吧。

「條八婆終於走！好興奮！」智恆待三點十五分的放學鐘聲響畢，便連忙離開班房。

「興奮你又咁心急。」我也收拾書包站起來，看著智恆的背影說。

「因為終於唔洗見到..見到佢！梗..梗係心急。」智恆的語氣好像有點古怪。

「喂...你條仆街唔係..」

我上前抓住智恆，並察看他的表情。

此時智恆雙眼已經通紅，兩行淚水不停流下。

「佢終於..終於都畢業...」智恆用力拭去眼淚地說。

看到他這個樣子，我也很想放聲痛哭。

不過。

「唔好喊住先啦，留返啲眼淚一陣喊。」我搭著智恆說。

智恆點點頭，我們便繼續前往操場，並在沿途碰上了毒撚們和雪遙。

「你哋......」雪遙看到我倆後，先是有點意外，又欣慰地微笑著。

到達人山人海的操場後，我們環顧一周，很快便發現巧渝的身影。

「巧渝！」我喊道。

此刻巧渝正在跟別人合照，聽到我的聲音後馬上轉身。

「喂呀楠！！」巧渝揮手對我們笑道。

「咁快落咗嚟嘅？」巧渝興奮地說。

「呢條友囉，勁心急一打鐘就衝落嚟。」我用肩膊輕碰智恆。

「哦...？咁有我心！」巧渝拍拍智恆的胸口說。

「咦你...？喊完？」巧渝有點驚訝地問。

「邊..邊有喊......」智恆別過臉說。

「嚟啦我哋影相先！」巧渝拉著我們幾個，然後把相機交給別人。

看著巧渝真誠的笑容，那個樂天、熱情的少女也終於要迎接人生新一章。

「做咩望住我喺度淫笑？」巧渝看著我說。

「撚會對住你淫笑！」

「信你！係喇Miss Fung呢？冇佢唔齊人喎。」巧渝問。

我四周打量，發現Miss Fung正拿著一幅巨型橫額走來。

上面寫著「地理學會全體人員恭賀巧渝畢業！」

「嘩頂好尷尬囉...」雖則巧渝嘴上這麼說，臉上卻一副很滿意的表情。

「尷尬呀？咁唔好要囉。」Miss Fung拿開橫額。

「唔得！幅Banner咁靚！」

我們每人拿著橫額的一小角，巧渝則站在中央，拍下了最有紀念價值的照片。

拍照過後，氣氛稍為沉重下來，智恆率先開口說話。

「公開試要加油。」智恆緊握著拳頭說。

「一定會。」巧渝微笑道。

「巧渝...如果得閒嘅..多啲返嚟。」智恆忽然認真起來。

「咁客氣？唔似你喎。」巧渝雙眼開始泛紅。

「咳..係..係囉！我講下咋！....最好呢就...！唔好再俾我見到你！」智恆別過臉說。

「噗，呢個先係我識嘅智恆。」巧渝忍不住笑了笑。

「巧渝..可唔可以攬下你。」智恆問。

巧渝點點頭，便給了智恆一個深深的擁抱。

此時智恆眼裡的淚水慢慢滴下，相信他永遠不會忘記這個擁抱。

我和雪遙對視一眼，大家欣然地微笑著。

片刻後，巧渝緩緩放開智恆，並握著雪遙雙手。

「真心嘅，我哋唔係識咗好耐，不過同你做到朋友真係好開心架。」

「仲記得當初話過要一齊去日本旅行，雖然仲未去到，但遲啲總有機會嘅！」

「你係一個好女仔，要對自己好啲，知唔知。」巧渝感慨地看著雪遙。

「嗯！我會。」雪遙報以一個信任的笑容。

「同埋，唔好俾啲賤男Hurt呀。」巧渝還不忘瞄了我一眼。

我只好無奈地攤攤手，她倆則捧腹大笑。

「好喇，你又有咩同我講呀。」巧渝面向我說。

「嗯...畢業快樂！」

「食屎啦你咁hea。」巧渝生氣地說。

「講笑。」

「唔好笑。」巧渝雙手抱胸道。

我湊到巧渝的耳邊，悄悄說了一句話。

「......」她的臉漸漸紅起來，然後露出最真摰的微笑。

或許，哪天我們會在家中某個角落，無意間找到那件佈滿塵埃的白色襯衣，然後回想起那些年的一點一滴，再發自內心的笑起來。

有些過去，會埋藏在心底裡的某個位置。

有些說話，其實不用說出來，彼此也深深明白。

就算他朝在街上某處再遇，你我仍是好友。

這樣就很足夠。

其實我挺喜歡一句歌詞。

「一頁填上感慨，一頁記低所愛。」

「下半篇即將揭開。」

人去到某個階段，總要踏上新旅程。

沒有放不下的事，只有忘不掉的回憶。