高富帥轉校生睇中我？！: 咩關係都冇

我地兩個都嚇左跳，成十年冇見，大家都變晒樣，估唔到咁都撞得返。我地相認完，回過神先發現全班都喺度望住我哋。我尷尷尬尬咁dup低頭，不過屑到佢一路望住我，直到行到去佢個位，即係我後面。



屙屎玲清左清喉嚨，跟住講:「好啦，歡迎完插班生，而家處理班務。」佢講完就擰轉喺度寫黑板，於是我開始聽到同學開始喺度議論紛紛「佢地識㗎？」「猛料喎，摺妹吳雪晴幾時變到咁高招溝左個男神返嚟？！」



以為自己細細聲講，實則我聽得一清二楚。如佢地所講，我係個摺妹，突然間變左全場焦點，你叫我如何自處？我膽怯咁向左擰轉頭，未擰晒已經望到陳詩婷同楊麗雅凶神惡煞咁睥住我。明明我咩都冇做過，只係同個插班生講過一句嘢，我而家更加相信同男神打交道最後係會瀨屎上身。





唔知點算嘅我，淨係識喺度臉紅，將個頭dup得越低，用門牙咬住支筆，係我緊張嗰陣嘅慣常動作。



突然，有人將口烘埋落我右耳邊，用幾乎係咬到耳仔嘅距離，細細聲咁講:「好耐冇見啦喎，懵丙晴。」無錯，就係坐我後面新嚟嗰個。





聽佢語氣我已經知佢笑緊，佢講完隔左兩三秒先肯將個口離開我耳邊。唔洗15秒，我隻耳已經紅晒，熱到可以蒸熟隻蛋。於是同學嘅竊竊私語就更大聲了:「都話佢哋有嘢㗎啦！！」「吳雪晴原來會溝仔㗎！！」「男神唔會就咁比人搶左吓話？！」



「鈴鈴鈴鈴鈴...」鐘聲解救左我。到左第一堂嘅x1，同學都會去唔同班房上堂，熱烈嘅討論終於得以平息。我快速咁攞左本經濟書同文具，就即刻拉住張欣欣衝出班房。「喂！洗唔洗行咁快！」張欣欣比我扯住去到女廁，氣喘吁吁咁講。我已經冇心情理佢，擰開水龍頭用水洗臉，令自己嘅臉儘快降溫。「嘻嘻，其實你地兩個係咪有嘢？」「一場姊妹，同我講啦！」



「唔係你諗咁樣，一言難盡，遲啲先同你講。」目前對我嚟講，平靜落嚟先係最重要，絕對唔可以比歐諾宏影響我一陣嘅小測。





好彩我對自己嘅情緒控制唔錯，冷靜返落嚟，份小測都全部識做。唉，嚟緊嘅日子點算？究竟佢會做啲咩？嚟緊嗰三堂我都一直喺度做緊呢啲搵唔到答案嘅猜測，心不在焉咁過左兩個鐘，終於到左小息。



當我返到嚟課室，踏入左課堂一步，就見到前面嘅陳詩婷同楊麗雅撓住手欄住我。



「吳雪晴，你同插班生係咩關係？」陳詩婷首先開口。我抬左吓頭望住黑臉嘅佢，又dup低頭怯怯哋講左句:「我地咩關係都冇，唔該借借。」點知當我諗住行另一邊返位嗰陣，楊麗雅又擋住左我:「你唔講就唔洗指意返位！」



平時水火不容、成日敵對嘅佢地，而家竟然坐埋同一條船對付我，我真係第一次覺得自己咁鬼大存在感。





我開始唔耐煩，忟憎咁講:「我咪話左咩關係都冇，你地咁好奇點解唔自己去問插班生？」「咩關係都冇？！你呃我啊？」



我開始頂唔順喇，唔發火當我病貓？！我加重語氣對全佢地講:「我再講多次:冇。你地煩夠我未？」



就係呢個時候，後面有把男聲大大聲咁講:「邊個話我地咩關係都冇？」