那一天，有女仔嚟咗男校讀書: 第十六章:暑期旅行(第九節)

今日嘅行程比較鬆動。我同小倩去咗一間喺日本有人氣嘅美式舖頭食早餐。我哋試咗嗰度嘅招牌菜---班尼迪克蛋鬆餅(Eggs Benedict)，鬆軟嘅麵包配上火腿、水波蛋、沙律菜，形成咗一種清新、獨特嘅味道同口感。流心水波蛋帶有一種難以形容嘅味道，蛋黃在口中爆開，蛋汁不斷流出，不斷衝擊我嘅味蕾。呢一個早餐係我喺今次東京之旅最心滿意足的一餐。之後我同小倩去咗全日本最大嘅機鋪，入面有十六個以上嘅VR遊戲，我見小倩對VR有興趣，加上我又想體驗下用VR打機嘅感覺，所以就計劃咗呢個行程。我哋喺入面試咗好多遊戲，雖然價錢唔平，但係絕對值得嚟呢度玩個夠。晏晝飯我哋去咗「CoCo壹番屋」食，雖然香港都有，但係喺日本食自有另一番風味。食完之後，我哋周圍行下街，買下嘢，輕輕鬆鬆就過咗我哋今次東京之旅嘅最後一個下午。夜晚我哋食完飯之後，我帶咗小倩去東京都廳展望室睇夜景，東京嘅景色盡收眼底。我哋絕對唔會浪費喺東京嘅最後一晚，睇完令人目不暇給嘅夜景之後，我帶小倩去「思い出横丁」---一條集合日本美食嘅街道去食宵夜。我哋嚟到東京之後都好少食日式串燒，所以我哋揀咗一間居酒屋。入到去，店員見我哋唔俘係本地人，就即刻攞咗本英文嘅餐單俾我哋，好彩有英文，如果唔係就有排都未嗌到嘢食。我嗌咗一啲牛肉同豬肉串燒，當然唔少得燒雞皮，小倩就嗌咗燒番薯串燒同甜粟米。燒雞皮同粟米首先出現喺我哋面前，雞皮燒得啱啱好，油份唔會過多，而粟米就非常鮮甜，表面少少燒燶嘅粟米更有一種特別嘅香味。之後嘅牛肉同豬肉都鮮嫩多汁，番薯超級甜。
我哋離開居酒屋後，我問小倩
「今晚係最後一晚喇，仲有咩想做?」
「冇喇，不過真係好唔捨得...」
「我都係...下次我哋再嚟日本!下次我哋去北海道!」
「好!一言為定!」

(待續...)