那一天，有女仔嚟咗男校讀書: 第九章:過去(第一節)

估唔到小倩係因為呢個咁嘅原因而避開我...
小倩真係喊咗好耐，喊到天都就黑，但我一直攬住佢，一直安慰佢，就算路人不斷用奇怪嘅眼光望住我哋，但係我都冇諗過放開小倩，因為，我覺得宜家我正正係小倩嘅「庇護所」。
小倩已經喊到好攰，過咗一陣，小倩嘅喊聲冇咗，取而代之嘅係一片寂靜。
「小倩?」我嘗試叫佢
試咗幾次佢都冇反應
我將小倩微微推開，只見我件衫幾乎完全濕哂。
原來小倩攰到訓着咗，咁我宜家點算?
我又唔想咁快嗌醒佢。
我諗到個好老土嘅方法---用公主抱抱佢返屋企。
但係我又冇乜做運動，又唔係大隻，點抱佢?




不過我見小倩咁纖瘦，應該唔係好重掛。
我試咗一次抱起佢，雖然仲未成功，但係發現咗佢原來好輕，得大約45kg，咁睇嚟我離成功又近咗一大步。
試多幾次之後，就成功咗。其實我都唔知點解會成功...
雖然有啲辛苦，但係都算值得啦!
抱到去佢屋企樓下，我已經筋皮力盡，我搵咗張長櫈坐低，喺過程中盡量唔嘈醒佢。
「咦？」坐咗一陣之後，小倩喺我懷裏醒來
「我嘈親你?」
小倩坐咗起身，捽一捽眼之後問
「點解我喺度?」
「傻妹!你頭先喊喊下無啦啦訓着咗呀!」




小倩好似宜家先記返起頭先發生咩事，佢望一望我隻錶
「原來咁晏㗎啦?唔好意思呀！阻住你溫書!」
「唔緊要啦!你快啲返屋企先啦!」
「咁聽日見啦!」

(待續...)