那一天，有女仔嚟咗男校讀書: 第七章:聖誕節(第一節)

聖誕節假期啱啱開始，一份份網上功課已經接踵而來，我連抖下嘅機會都冇...
今日係聖誕節正日。我終於做曬啲功課，可以感受一下聖誕節嘅節日氣氛。
下晝大約一點鐘，突然間有人打俾我。我本來心諗:難得可以瞓晏覺，邊鬼個打嚟阻住我瞓覺呀?
一見到原來係小倩打俾我，我個人即刻變到好精神
「喂?銘仔你得唔得閒呀?」
「我冇乜嘢做呀」
「咁啱啦，我哋不如一齊出嚟食個聖誕大餐呀?」
「好呀!喺邊度等?」
「就喺你屋企樓下等啦!」
「ok，一陣見。」




就係咁，我同小倩就開始咗第一次「約會」今次我特登帶咗多啲錢，希望一陣間嗰間餐廳啲嘢食唔好咁貴啦。
我同小倩好快會合咗，之後再搭巴士出尖沙咀。
因為我哋都係食咗晏晝飯先出嚟，所以我哋諗住行咗一陣街先去搵餐廳。
結果我哋經過一間戲院嘅時候，小倩突然話有套戲想睇，所以我就陪咗佢睇。
我本身對呢套戲冇乜興趣，但係有得同小倩睇戲喎，我梗係唔會錯過呢個機會啦!
睇完套戲之後(好彩冇瞓著)，望一望隻錶，原來已經差唔多六點。我哋兩個都開始肚餓。

(待續...)