今天是愚人節，她跟我開了一個玩笑。: 58

頭部遭受一下重擊後，我回到那個白光一片的地方裡。

神托著腮坐在我面前，很疑惑地看著我。

「你輸了。」他冷淡地說。

「嗯。」我點點頭。

「你通過唔到審判。」





「嗯。」

「你知唔知意味著啲咩？」

「唔知。」

「意味著你放棄咗一個可能可以令嗰個女仔重生嘅機會。」

「嗯。」





「你知唔知同一個考驗，佢已經通過咗考驗，幫你換到重生嘅機會？」

「嗯。」

「你唔在乎？你唔心痛？你唔想同佢再續前緣？」

「嗯。」

「點解？」





「因為無可能。」

「你竟然係神面前講無可能？」

「如果你真係神嘅話。」

「咩意思？」

「我一開始嚟到呢度，你就質疑我嘅認知，然後透過加插楊薇嘅回憶令我崩潰，最後美其名係審判，其實係折磨。」

「呢度根本唔係理想國，而你，都唔係神。」

「你係咪撞壞咗個腦？」他疑惑地看著我。

我也站了起來，走過去。





「如果呢度真係理想國，點解我同楊薇嚟到呢度之後會一直都只有痛苦，無平安。同埋點解審判係咁樣，唔係審判前世，而係審判愛，仲要有一堆條件，真係好無聊，愛唔係遊戲，呢啲係神會做嘅嘢？仲有，如果真係有神，點解世界上仲會有咁多苦難嘅人？」我蹲在他面前，振振有詞地說。

「嗯！？」

他看一看我，便手捂著嘴，然後開始大笑起來。

「哈哈⋯⋯好⋯⋯好。」

笑著笑著，他突然換上一副很認真的樣子，不停地在點頭。

「唔～～你答對了！！！！」

他說罷，便變成了魔鬼的樣子，露出詭異的笑容。





「果然，都係差啲啲⋯⋯哈哈。」

笑著笑著，他便消失了，然後楊薇慢慢出現在我的眼前。