【喪屍】《逃城》: 醒來

一覺訓醒出現係一個了無生氣嘅城市。四處都係一種不知名嘅生物——暫時稱呼佢哋做喪屍。究竟發生左咩事？又要點先可以逃離呢個地方？

半個鐘前，我係一間睇落係醫院病房嘅地方訓醒，淨係覺得頭好痛。呢度係咩地方？點解我會係度？我訓之前做緊咩？我係邊個？我竟然一啲記憶都無。 

周圍一個人都無，四周圍靜到，根本唔似一間運行中嘅醫院。而且呢間醫院連燈都無開，四周又靜又黑。我輕輕咁打開左病房嘅房門，想知道究竟宜家係咩情況，同搵下有冇其他人。係行出左兩步之後，就見到走廊遠處有一個人影。

「⋯⋯嗨？」
我好細聲咁試探一下對方嘅反應，結果，對方聽到之後瞬間抬頭望著我，但無比到任何回應，反而姿勢奇怪咁向我衝過黎。一陣不安湧上心頭，我即刻跑翻入最初訓醒間病房，閂門，背靠房門深呼吸，試圖冷靜落黎。 

啪啪！啪啪！




幾秒之後，身後就突然傳黎拍門聲，嚇到我個心就快跳出黎，有種無形嘅壓迫感，令我緊張到幾乎停止呼吸，好似對方下一秒就會破門而入然後殺左我。而拍門聲亦一直無停止落黎，對方持續穩定咁拍門。係我驚左一陣之後，發現對方除左拍門，似乎無其他舉動。 

我努力嘗試冷靜落黎，深呼吸幾下之後，鼓起勇氣另轉頭，透過房門嘅嗰塊玻璃，想睇下對方究竟係咩黎。

雖然有住近似人類嘅外表，但仔細望多兩眼，就發現佢對眼只有眼白，亦比正常人瘦削，兩邊臉頰笠曬入去，而且淨係機械式咁拍門，點睇都唔係正常人類。 

記起頭先佢都係係我出聲之後先發現我，感覺佢係對聲音特別敏感，但視力應該麻麻⋯⋯正係我對現狀束手無策嘅時候，我突然諗到，如果呢個地方仲有佢呢種生物，咁好可能會被佢嘅拍門聲引誘過黎，到時我就會被困呢間病房⋯⋯ 

為左避免陷入困境，我決定要先將門外面嘅生物制服。我吞左吞口水，做好心裡準備之後，就將房門打開少少，佢即刻伸手入黎。佢對手上面有大大小小嘅傷口，無癒合到，亦唔係流緊血，就好似屍體俾人劃左幾刀咁。果然唔係人類⋯⋯擔心接觸到佢啲傷口唔知會發生咩事，我攞左最近張病床上嘅被，包住對方嘅手，再將佢拉入黎，同時閂翻道門。對方雙手比我捉住，掙脫唔到，但身體仍然作出想撲向我嘅舉動，而且擘大口好似想咬我咁。





好似好兇狠，但實際攻擊力似乎有啲弱。有啲似喪屍，但同電影小說入面嘅喪屍比，簡直不堪一擊。我衝前將佢推倒，用張被將佢成個人包住之後，綁起附近張床嘅床腳度，成個動作只係用少少力，佢就完全反抗唔到。綁好之後，我試探性咁放手行開，佢果然完全掙脫唔到，雖然仲係擘大口同想衝過黎咁，不過一啲威脅性都無。 

我鬆一口氣，亦有翻少少信心，準備再次出去探索呢間醫院。唔知道附近會唔會仲有喪屍，不過佢哋好似主要會被聲音吸引，我都係選擇躡手躡腳咁行，盡量唔發出任何聲響。 

沿住走廊一路行，行到另一間病房門口，突然諗到，會唔會有人同我一樣係病房訓醒？