【甜/真人真事】我是他的常餐情人: 二十六

第26章 一塌糊塗
我沖入廁所，佢嘅遺留物隨着我嘅行走而滴落沾濕大髀，其實我應該明白早係佢問我有幾多SP嗰一刻開始我就應該體會到我係佢心目中係個點樣嘅人，佢嘅女朋友係大家閨秀唔會同佢玩刺激嘅玩意，佢嘅所有刺激幻想只能夠發洩係佢唔在意嘅我身上。

我問自己係咪能夠接受留係佢身邊，呢個隨時佢想要嘅時候就不分場合咁佔有我，唔需要顧忌我係咪願意，發洩完之後亦都唔需要給予我任何嘅關顧嘅人，明明我有更加多正常又或者會善待我嘅選擇，而我偏偏唔去珍惜佢哋，咁樣嘅關係只係徒增我嘅煩惱。
其實自細無論係睇書或者睇戲都會教導女仔要遠離唔識尊重自己嘅人，要自愛，但係寫出嚟容易嘅事往往做起上嚟萬般艱難。而飛蛾嘅天性就係愛撲火。

我係洗手間一邊清理自己一邊就越覺得委屈，望住鏡入邊嘅自己衣衫不整而佢只需要解開皮帶，就可以為所欲為。咁樣恰恰就好似我哋嘅關係咁樣，我一塌糊塗而佢永遠都光線整齊唔需要付出任何嘅感情。

我從來都冇奢望過可以完全佔有佢，我亦都冇諗過要破壞佢現有嘅關係，但係SP呢樣嘢唔通真係連一絲嘅溫柔都唔可以有咩？咁點解佢係得到我之前要瞞騙我扮到好似人哋接近我佢會呷醋等我有過幻想？又點解以前係無數個夜晚陪住大家可以談天說地，而有咗親密關係以後，我哋嘅關係竟然不進則退？



我有特登裝扮成撇脫嘅樣子，我同佢講我搵SP越唔上身就越好，唔通咁樣都唔足以令佢放寬心？
我知道佢覺得假如兩個人接觸得越多就越容易產生感情，咁我已經無法克制自己，而你到底係怕產生感情定係我死纏不休？