【甜/真人真事】我是他的常餐情人: 二十四

第24章 坐立難安
經過左啱啱一役其實我有啲矛盾，佢因為我琴日同keith食飯唔覆佢message咁對我，結果唔夠半日又要重演，佢明明討厭我同佢哋相處但係又主動叫我一齊食，又唔知佢要玩乜。

「你想食咩啊？」Martin好溫柔咁問，

「求其喺樓下食得啦。」大多數時間我哋lunch都係喺樓下嘅茶記搞掂，

「你哋啲女仔唔係鍾意食得特別啲嘅咩？」Isaac忽然出聲。

「呃…唔使啦我趕住返上去做嘢。」行到去茶記落完order，我又開始坐立難安。



「開心~可以同den姐連續兩日食飯。」keith例牌又喺度講埋啲無謂嘅嘢，我望向Isaac，果然佢塊面開始黑。

「咁你咪得閒又約下我囉。」我特登係佢面前咁樣講。

「咁係咪聽者有份先？」Martin都興致勃勃咁講。

「一於等project完咗萬歲Isaac哥啦。」我扮到好自然咁講。

其實佢都係特定時間先會諗起我姐，咁又何必係其他地方同我有公事外嘅交集呢，都唔知道佢叫我過嚟食飯做乜。



「啱啱俾我搞完就忙住招惹第二啲男人。」佢低頭send咗個message俾我。

「平時我叫你陪，你唔係話公司好忙唔得閒咩？我搵人陪唔係好正常咩？」其實唔單只係琴日佢由得我同keith食飯，好似之前咁我想佢陪下我佢都有千千萬萬個理由推搪，人哋都定性左係SP，我連升級做FWB啲嘅機會都無，既然唔係朋友又點解要管我呢啲嘢呢？

等左一陣都唔見佢回覆，咁睇嚟佢係真係費事花心思係我身上。我再一次提醒自己，佢只不過係覺得佢嘅專用玩具俾人整污糟咗，就算佢唔鍾意我，佢都唔容許人哋玩。