【甜/真人真事】我是他的常餐情人: 十五

第十五章 做你條女都幾悶

Issac係一個典型獅子座男人，對於想得到嘅嘢會想方設法咁去得到，對新事物好快上手，佢嘅興致亦好快消亡，係我太快被攻陷太垂手可得嗎？我見過一句說話，其實女仔最怕就係突然而又不負責任的喜愛，遇見得多就會覺得愛開始變得廉價。或許係佢心目中我只係配得上呢種廉價嘅好感。

我望住佢心不在焉咁睇住CCTVB，明明佢就唔係一個會睇埋呢啲電視劇嘅人，我望實佢等待佢那怕講乜都好我都會舒服啲，望到就嚟可以燒穿佢，佢又若無其事咁起床笠返件睡袍，我無辦法唔想像到底佢對女朋友，應該話未婚妻到底係咪咁，佢嘅熱情可以咁快消失，咁同佢一齊咁耐嘅啊嫂會得到啲咩，佢好似當我透明人一樣，過咗一陣佢見我一路眼甘甘咁望住佢，終於太唔自在地擰轉頭問我望咩。

「睇下你有冇嘢想同我講。」我期待又近乎卑微咁望住佢。
「咁你想傾咩」咁又係，我哋兩個除咗公事以外又有啲乜嘢可以傾？佢亦唔會有幾想了解我。
「你以前會同上完床女仔講啲乜嘢？」
「無架男人通常會訓返個回魂覺」佢仲拎起張被襟好，但正常嚟講係咪應該打開張被歡迎我呢？


「你今晚唔走咩？好夜囉喎」我都唔知道點解佢忽然咁冷淡好似想趕我走咁，我微微側身抱住佢條腰不發一言，過咗一陣就係佢準備掙扎開嘅時候，我落床執起啲衫入洗手間著，出到嚟默默拎起個袋回頭望咗佢一眼

「走啦？」「仲唔走咩你都唔理我。」佢尷尬一笑
「其實做你條女應該都幾無聊。」係臨開門嘅時候我講咗一句
唔需要留低聽佢嘅回覆，反正唔會係我想聽嘅嘢，我亦都唔係佢條女。

突然間有啲淚意，送自己上門得到片刻嘅溫存之後就知情識趣咁樣落樓走人，我仲幻想過呢種係好感係鐘意。
我諗住打俾阿熙，忽然間想喺佢身上攞到一啲那怕係一丁點嘅溫暖，不如用阿熙覆蓋佢留底嘅氣味，咁樣我或者可以安心入眠。

我祈求一個熱吻，卻沒有發生