【甜/真人真事】我是他的常餐情人: 四

第4章

自從嗰晚之後，我同佢嘅交流就只限喺Project Group，係公司唔同邊嘅我哋想要見唔到對方其實好容易，唔知道到底佢係後悔定點，我自己都覺得自己太貪玩太衝動，就將一個大家心目中嘅好仔拉入一個犯禁嘅局面，以後仲有好多一齊做嘢嘅機會，應該點樣相處..作為一個乖仔嘅佢又會唔會同我玩呢個遊戲呢？

唔經唔覺就到咗星期五，呢個星期連我都忙到唔記得去煩惱我同Issac嗰場唔知係咪錯誤既酒局，因為之前幾次合作同Issac嘅帶領，Project比起Target嘅進度要快好多，大家都諗住去食個飯慶祝，
「Denise我地幾個去打邊爐wo你去唔去？」隔離Team Martin問，佢同我同期入公司，係Issac嘅下屬，都叫做斯斯文文幾唔錯咁，平時有咩gathering都會叫埋我。
「梗係去啦！」我眼尾望到Issac行過，..
「喂你唔洗OT咩？」
「癡線啦Happy Friday啊嘛..」其實我之前出於私心成日都留底同Issac一齊做嘢，搞到好似好忙成日要OT咁，我啊頭見我咁抵諗都交多咗一啲需要同隔離Team對口嘅嘢我做，我同佢就係喺之前段時間慢慢熟嘅，
「咁就得啦！做咩成日係公司對住啲無聊嘢姐！」Sara，都係我個同期兼我拍檔，算係我公司最熟嘅女仔。



七點既前兩分鐘，我岩岩好做完Report，sd完email我就收拾d野準備走，隔離Team都蠢蠢欲動，向佢既方向瞄左一眼，居然發現佢都準備走，

「行得未？」Sara行過我個位叫我走人。
行出公司門口先發現都幾多人去，
「喂！我地兩條Team既老細都去wo，張單有著落啦。」Martin係我耳邊靜靜雞講。
「吓？Johnson同Issac唔係去左同女朋友撐枱腳咩？」雖然前幾次公司gathering都有人帶埋另一半黎，都唔係未見過佢女朋友。
「老細話見今日難得齊人不如一齊食喎。」
好地地食餐飯又變左公司聯誼，最煩既係佢居然都去。
「Denise?Denise?做咩發吽逗啊，唔舒服？」Martin拍一拍我叫我起行。



身邊既Sara同Martin係咁係隔離吱吱喳喳，我唔知點解有啲煩躁感。明明唔想對住佢先放工搵其他野做下消磨時間，點知又無端端無左個喘息機會。

打邊爐既地方就係公司10分鐘左右既路程，我半dup低頭咁行，眼尾睇到佢地team 嘅人同佢有講有笑咁，等我反應過黎佢已經行到我地面前，
「呃..Issac你今晚居然蒲頭嘅。」其實其他人都知道Issac幾錫我哋班後輩，我又之前同佢一齊OT，都唔可以扮唔熟，
「哦，見大家今個星期咁辛苦，你哋可以當我唔喺度咖我負責埋單嘅姐。」佢笑笑口咁對我哋講，好似一個親民嘅好上司，差啲令我覺得好似當日發生嘅所有嘢都係我幻想出嚟嘅虛妄。
其實我都幾想當佢唔喺度，到底呢個彬彬有禮嘅人定當日溫柔又撩人嘅先係真嘅佢呢，
「喂！你陪姐姐坐！不醉無歸。」我一手橋住Martin，或者從頭到尾都只得我一個無端端自找煩惱。
Martin好似意會到咩咁淡淡一笑，安排好座位，大家又嘻嘻哈哈咁開始傾計，其實唔出聲既人反而最心水清。



打邊爐個店面唔算大，我地一行人入去已經霸左人地3張枱，我拉住Sara，佢個fd Keith,Martin佢幾個坐埋一邊，
Keith係Issac Team嘅同事，健康陽光型偽ABC，同我哋都叫幾好傾，仲好似對我頗有興趣。成晚係咁係我旁邊撩我吹水，打邊爐飲咗兩杯我就紅到上面，酒過三巡加自己心情煩躁飲多幾杯。我除低外套，微微低領既裙已經足夠比Keith大飽眼福，佢都係咁望住我。
「Den，你就嚟走光啦。」飲得唔算少既Keith開始口沒遮攔
「係咩？」我拉一拉好個領口，見到佢更加眼前一亮。
「你望住我做咩啊~」半醉嘅我把聲帶小小嗲。
佢見我就嚟挨住佢，左手都若有似無咁輕輕搭住我。佢既外形的確係幾吸引亦都好識玩。
我地細聲講大聲笑，輕輕一望，發現Issac喺度望住我，比我發現左之後好尷尬咁另轉頭。
「唔理你啊！去洗手間先！」俾佢望一望我發現自己好似玩得有啲過火，都係扮去廁所先。