鬧鐘一响，我就回到了過去⋯⋯: 4.3 讓未來過去也有掛念憑據
「你係邊？我到左啦！」
「做乜唔覆Message？」
「我等緊你呀，成半個鐘啦！你黎唔黎到都出句聲！」
「唔好無反應，你咁樣我會好擔心。」
「你做緊乜？係咪訓著左？電話又唔著，Message又唔覆。」
「你快D覆我啦，你唔覆我我會一直亂諗野。」
面對著阿玲傳來的SMS，我才發現自己今次做了一些不可挽回的事，我不敢打開自己的語音留言信箱，也不敢回覆阿玲的SMS。
懦弱的我，打算把這件事留給2012的自己解決，老實說，如果因為要救在2018年的小綠，而傷害2012年的阿玲，這件事值得嗎？
對於這問題，2018年的我會有甚麼答案？2012年的我又會有甚麼答案？我不知道，我甚至不知道自己現在究竟算是2018年的白映雄，還是2012年的白映雄。
我拿起了電話，直接撥打Gibson的號碼。
「喂，我而家上你屋企？」我對電話另一端的Gibson說。
「你今晚唔係約左阿玲咩？佢搵你搵到黎我呢邊。」Gibson答。
「你點答佢？」我問。
「我咪照實答佢我唔知囉。咁我真係唔知丫嘛。」Gibson說。
「我上到黎再同你傾啦。」我說完就掛了線。
我從小巴站前面的天橋走回沙田中心，穿過沙田中心後，進入沙田廣場再走回火車站，
我登上了開往穗禾苑的小巴，向著火炭半山進發，小巴下車後，我按下我一早知道的密碼，但門沒有打開。當然了，那是2018年的密碼，怎麼可能打開2012年的豐年閣大門？
我拿出電話打算打給Gibson，同一時間，有住客從豐年閣內出來，於是我立刻掛線，把握機會進入大廈內。
進入Gibson家中，我簡單地和伯母打過招呼後，就直接走進Gibson的房間內，發現他正在用PS3玩Winning Eleven 2013，對，是2013，每年都是這樣的，早在2012年的七月，Winning Eleven 2013就推出了。
「喂，你快D覆下阿玲啦，頭先佢又打左兩次黎搵你。」Gibson沒有回過頭來，說。
「我唔知點覆佢好。」我答。
「你平時唔會咁嫁喎，有野要瞞住阿玲嘅話，你實一早作好晒故仔再搵我夾嘅。」Gibson操控他手上的Master League拜仁，用C朗拿度剛剛入了一球。
「『喂，要唔要試下挑戰用蘇格蘭贏世界盃？』」我突然想起，這個Gibson究竟是2018的Gibson，還是2012的Gibson，所以我說出了暗語。
「好喎，等我贏埋呢場先！」Gibson答。
「我係話用『蘇格蘭打世界盃』喎！」我重覆一次暗語，確認他明白。
「我同你兩個人用一隊丫嘛，黎啦。」Gibson說完，用眼神示意我自己拿起放在一旁的控制器。
「好好，咁打咩難度？」我為了確定面前這個Gibson是2012年的Gibson還是2018年的Gibson，我再一次問。
「Professional囉，兩個人用一隊難玩好多。」Gibson答。Professional是只有Winning Eleven才有的難度，而我們暗語中所提的實況足球，難度是由一至五的。
「都係唔打啦，講另一個問題，我係係六年後返黎嘅。」我說，這一刻我已經完全肯定，我面前的這個Gibson，是2012年的版本。
然後我簡略地對Gibson解釋了一下關於六年後小綠會死，然後我籍著「黑夜不再來」回到2012年這件事。
「你覺得點？你覺得我今次做得夠唔夠？救唔救到小綠？」我問。
「救唔救到小綠我唔知，但係一定會傷害到阿玲。」2012年的Gibson答。
我一時語塞，的確，在2018年的我，從來沒有考慮過2012年阿玲的感受，我想救小綠，我想更改更多的歷史，但換來的，是對我未來妻子的傷害。
就好像戴卓爾夫人簽署中英聯合聲明時，希望自鴉片戰爭以來的中英瓜葛會結束，殖民地歷史會告一段落，但她應該沒有想過會換來對香港人有如此深的傷害，甚麼司法獨立、廉潔公正、繁榮安定全部都在20年內枯萎淍零。
同一時間，我的iPhone 5再次響起，來電顯示著阿玲的電話。
「你仲係唔肯Save電話Number？」Gibson問。
「咁記得丫嘛。」我答。
「記得，同將佢Save低，係兩樣野黎。你快D聽電話啦，擔心死阿玲啦。」Gibson說。
我拿起電話，正打算接聽的時候，阿玲掛線了，電話上多了一個未接來電。再等十幾秒後，我再收到一個SMS，顯示我有十三個語音留言還沒有收聽。
我鼓起勇氣，解鎖了電話，再在未接來電那個阿玲的電話上按了下去，電話響了還不到一秒，阿玲就接聽了。
「你去左邊呀？做乜唔聽電話？擔心死我啦！」2012年的阿玲連珠爆發地對電話筒說。
「我有D急事要做，要去救一個朋友。」我不想在這刻對阿玲說謊，但也想不到要如何對2012年的阿玲解釋這件事的始末。
「咩朋友？咩事？點解要熄電話？」阿玲又再連續問了三個問題，從電話筒的這一端我也感受到她的憤怒。
「唔知點開始講，你知唔知咩係『黑夜不再來』？一個鬧鐘，可以幫人回到過去嘅。」上次我問這個問題時，我無法確定阿玲是裝傻還是真的不知道。
「咪陳奕迅一首歌囉！仲有果套戲《十二夜》嘅主題曲囉，點呀，明明你自己都幾鐘意套戲。」2012年的阿玲給了我一個和2018年的阿玲一模一樣的答覆。