《疫戰都市》-《這個殺手不太濫》: 第五十一章 - 絕命之戰

在飛機上，當巫尚權知道真相後，勃然大怒，同時估計自己已經失勢，為保安全，目前只剩下投奔敵國一條路可行。
「立即改變航線，我要去鄰國，只有喺嗰度我先至可以東山再起！」太保向機長傳話。
當機長收到指令後，立即改變航線飛往鄰國，以逃避來自甲城的通緝令。
「陶美瑾，想捉我，除非我死先過妳啦，哈哈！」
另一邊廂，當金不換和五十嵐飛燕殺死烈火後，為防止東窗事發，必須先發制人，以控制大局。二人一起來到飛機前方準備對太保施行偷襲，此時金不換望向窗外，卻發現了不對勁的地方。
「發生咩事？」五十嵐飛燕問道。
「飛機突然改變航道。」金不換回答。「我估計太保想投奔敵國，以佢依家嘅財富同人脈，要翻身絕對唔難。」
「咁我哋仲有咩方法可以阻止佢？」
「我諗太保依家警覺性高咗，睇嚟要好似對付烈火咁偷襲佢恐怕唔易。不如妳先去機長室脅持機長，逼佢維持原有航道。我去會議室搵太保商量往後嘅安排，藉以拖延時間，然後睇準機會出手。」
「好，就咁決定。你要小心，唔好露出馬腳。」




「我會見機行事，妳自己都要小心。」金不換跟五十嵐話畢，便獨自沿樓梯走上飛機艙頂層的會議室跟太保見面。

在會議室內，只見太保跟幾名助手在談話，但卻不見雷鳴的蹤影。
「咦，爹地，點解要改變航線？」金不換向太保查問。
「我收到消息，原來陶美瑾仲未死，依家仲做埋代總統，睇嚟佢目標係要對付我。」
「點解會咁？爹地唔係已經一早計劃好咩？」
「一早計劃好嘅野，都一樣會發生意外，就睇你識唔識得控制.......」
「咁你係咪已經有一套後備計劃呀？」
「後備計劃？講得好，我已經安排咗人去防止發生任何劫機事件。」
「爹地咁講係咩意思？」金不換突然寒毛直豎。




「唔駛再做戲啦，乜你睇唔出雷鳴唔喺度？」太保話畢，便把雪茄直接在桌面戳熄。

單獨潛入機長室的五十嵐飛燕發現除了兩位機長以外，裡頭還多了一人。
「五十嵐小姐，上次妳不辭而別，仲記唔記得我呀？」說話的人是雷鳴。