《疫戰都市》-《這個殺手不太濫》: 第三十章 - 人類復修計劃

「你講嘅野係真嘅？」金不換表現出難以置信的神情。
「你爸爸其實係機關嘅第一號殺手，綽號人中虎，化名『高城府』去結識你媽媽，目的只為接近你外公，因為你外公，亦即係我爸爸嚮當時係世界頂尖嘅基因工程學研究者。」段連城雖難掩悲慟心情，仍堅持說下去。「有冇聽過『人類復修計劃』？」
「未聽過。」金不換說話時以右手按壓著左邊肩膀的傷口。

「嚮二Ｏ二Ｏ年，邪惡病毒全球肆虐，當年各國政府最初以為疫情受控，可惜病毒經過多次洗牌變種導致人類幾乎滅亡。最後由聯合國牽頭嘅科研組織決定實行一項構思大膽嘅計劃，佢哋組織咗一隊科學家同志願者，利用最新嘅基因工程技術，執行一項『人類復修計劃』。呢個計劃透過改造人類嘅基因，將邪惡病毒嘅傳染性同致命性壓低。由於個計劃實行到一半嘅時候遇上問題，所以就擱置咗。」段連城說。
「呢樣野同我身世有關？」金不換反問。
「呢個計劃嘅構思係想將人類細胞改造到好難被邪惡病毒入侵，起初吸引到多國政府同財團支持，反應非常理想。當時由於我爸爸係基因工程學嘅專家，所以就被政府招攬去成立一隊團隊，利用一D改造過嘅基因，移植到人類幹細胞，再將成功插入基因嘅幹細胞移植到人類身上。由於第一批參加實驗嘅志願者佢哋身體全部都出現排斥，最後所有志願者都陸續因為患癌而死亡，個實驗被迫停落嚟，後來我爸爸唔想一切努力付諸流水，所以秘密進行第二期嘅實驗，佢將改造過嘅基因重複修正，並且調整埋另外幾組唔同嘅基因，令到細胞受體能夠產生強大力量去抵抗排斥。最後佢將經過調整嘅幹細胞移植到我身上。後來我成功獲得免疫能力，同時身體亦間接得到一種異能，一種可以提昇個人力量、準成度同體質呢三方面嘅超能力。」
「個計劃跟我媽有咩關係？」金不換忍不住打斷了一下，並且整理思緒。

段連城繼續說下去：「由於第二期嘅實驗無論嚮成本投資、風險控制同埋時間管理都有好苛刻嘅要求。咁樣嘅運作方式根本冇可能將計劃實行。於是佢將實驗結果公佈，希望能夠重新吸引各國嘅大財團參與投資。當時我妹，亦即係你媽媽亦都有份參與研究，佢曾經多次講學，而高城府每次都有參與，嚮對方嘅熱烈追求之下，雙方情投意合。高城府為咗籠絡我爸爸，更加幫佢搵財團投資第三期嘅研究，令我爸爸能夠加快研究進度。高城府為咗更快得到回報，仲特登搵咗一D人類胚胎代替幹細胞進行測試，結果俾我妹研究到新一代嘅基因改造藥物。但我爸爸始終唔係好相信呢個人，可惜發現得太遲，冇阻止我妹邀請佢加入研究團隊。原來高城府接近我家人嘅目的係為咗奪取研究成果，佢嚮偷竊研究所嘅電腦資料時被我爸爸發現，爸爸就係為咗保護數據而被佢出手殺死。殺咗人後，高城府本來仲想搶埋研究成果，即係唯一嗰支基因改造藥物，咁啱佢被我妹及時發現制止，但係當我妹知道佢殺死咗爸爸之後，一時激動成支飲咗，而高城府亦都逃離現場。可惜我妹已經一早同對方珠胎暗結，最後仲生咗你。」




在二人說話的同時，房間外面一直有人潛伏偷聽，二人完全感覺不到半點氣息。由於強者有耳聽八方的本能，能夠無聲無息地逗留，証明此人的功力殊不簡單。