《疫戰都市》-《這個殺手不太濫》: 第二十六章 - 最接近死亡的男人

「到底件事係點樣發生嘅？」為司馬亮一行人引路的何大義一直摸不著頭腦。
「我哋通天門以前一向叫做快閃黨，直至我丈夫死咗，我為咗紀念佢先至同組織改名。呢個人當年係太保嘅金牌殺手，有一次快閃黨上下出動，想打太保旗下物流運輸車隊嘅主意，佢竟然為咗保住物資而攻擊我哋，我丈夫就係被佢一槍斃命嘅。」天娜帶點激動說。
豈料五十嵐飛燕竟替金不換搶先求情：「我估所有野都係一場誤會嚟，佢之前同太保做野，咁做只係為咗履行職責，一切都係逼不得已，況且依家佢已經同太保冇任何瓜葛。對於妳丈夫嘅死我深感抱歉。」
「的確係我做嘅.......我無話可說。」在命運操弄之下，快閃黨的名字令金不換憶起自己如何被太保利用，被迫走上絕路，加上情況緊急，索性放棄自辯。
「誤會？講得幾動聽，佢哋利用運輸車走私毒品同軍火，我丈夫只係為伸張正義對抗罪惡，竟然被佢哋假借盜竊嘅名義即場殺死，我講過要手刃仇人，親手將兇手嘅頭顱割落嚟，以祭祀丈夫嘅亡魂！」天娜說。
「妳丈夫確實係我殺，但我從來都冇走私毒品同軍火，到底呢個消息係點嚟？」金不換問道。
「你仲想唔認？我哋曾經嚮尚武集團運輸車嘅貨物裡面搵到暗格，入面確實係有毒品同埋軍火，我相信銀翼幫都有同樣發現。」天娜說。
由於銀翼幫亦找到相同發現，在缺乏理據去幫助金不換洗脫嫌疑之下，五十嵐飛燕與花拉二人亦一時語塞。
「只要交佢出嚟，你哋大可以隨時離開。」天娜說。
「我相信呢個後生仔嘅為人唔差，只係一時誤信太保，亦即係尚武集團老闆巫尚權嘅說話，為虎作倀。如果閣下能夠放佢一馬嘅話，佢就可以挺身而出，幫我哋指控太保，一舉將呢個機關嘅幕後主腦抽出嚟，我想石先生在天之靈亦樂見其成。」美瑾決定開口為金不換求情。




「說話有力，果然係領袖人材，對唔住，可惜我今日唔能夠賣帳。」天娜說。

現場氣氛如箭在弦，而擁有特殊能力的高手並非只得金不換與段連城二人。站在後排的五十嵐飛燕在司馬亮的治療下，傷勢亦已迅速復原。現在她雙手已暗中從背後取出六把燕尾飛鏢，等待適當時機，蓄勢待發。可是她出奇的沉默反倒引起金的注意。
為避免五十嵐飛燕因救自己而有所犧牲，金開口說道：「你哋快D離開，等我一個人留低。」
此時，段連城竟說出令在場人士愕然的說話：「金不換其實係我已經離世親妹所生嘅仔，係我唯一嘅親人，我願意代佢償命。」
金不換當場呆住，一直以來，他以為自己是名自小跟隨段連城奔波的孤兒，卻萬料不到原來跟他還有著血緣的關係。
站在天娜旁邊的天罡星忍不住回應：「段先生，自從傳出閣下被殺後，依家你突然又死而復生，活現人前，我真係好難解讀你每一句話背後嘅動機。」
「放肆！唔准對段先生無禮！」天娜立即訓斥下屬，但卻堅持自己的主張：「冒犯咗前輩，但係我哋通天門一向恩怨分明，對於前輩嘅建議我哋唔能夠接受。」

眾人說話同時，位於背後的升降機忽然一直向下降至地底，當升降機停下，閘門自動打開，內裡竟出現一幕令眾人意想不到的情節：一言堂的賈士圖及其一眾手下以半自動步槍脅持著兩名人質。




「通天嫂，我哋又見面啦！點解妳冇看管好妳兩名細路呢？好在佢哋遇上我哋一言堂，總算係不幸中之大幸，兩個小朋友跟媽媽打個招呼先！」賈士圖說。
「小金，小英，賈士圖你想點！」天娜說。
「通天嫂，如果妳唔想白頭人送黑頭人嘅話，就拎陶美瑾同姓金條靚仔同我交換！嘿嘿。」賈士圖說。