《疫戰都市》-《這個殺手不太濫》: 第十五章 - 叛逆

在銀翼幫的地下水道大本營內，鐵仁和狂龍坐陣其中，各自整理手上武器。鐵仁以恭敬的口吻向狂龍說：「飛燕姐講過日常補給品同裝備需要我哋去添置，因為佢、平仔同花拉呢幾日都有任務在身。」
狂龍把目光移向鐵仁，一臉疑惑地回應：「經過上次國會大樓一役，我方人馬損失慘重，目前根本無法維持裝備補給依種工作，加上你又有傷勢在身，嚮咁嘅情況下，佢又會有咩特別任務呢？」
「飛燕姐同政府接頭人收容咗國家級貴賓。」鐵仁輕聲地向狂龍補充：「聽講係總理陶美瑾。」
「係咩？佢經常嚮幫會內另組圈子，並且行蹤飄忽，自己外面有接頭人，又唔向班兄弟公開，你唔覺得奇怪咩？」
「飛燕姐都係為咗我哋班兄弟著想唧，況且上次都係佢識嗰個接頭人救過我一命。」
「咁又點呀？唔通佢咁做就可以隨便收容一個來自機關嘅殺手咩？」狂龍反質問鐵仁，並將五十嵐飛燕私底下約會金不換的情節和盤托出。
「真係咁？照你咁講佢到底有冇引狼入室？」鐵仁說，期間以疑惑的眼神看著狂龍。
「我知你對我忠心耿耿，我想你幫我辦一件事。」

在地下研究所其中一間用作實驗的房間內，五十嵐飛燕跟司馬亮談起金不換的事。




「好多謝你能夠幫忙，佢依家情況點樣？」五十嵐問道。
「經過藥物治療後佢仲需要多D時間休息，等身體復元。」司馬亮一邊回應著，一邊以儀器替金不換檢查身體。
五十嵐對金不換展現出親切笑容，同時間司馬亮向五十嵐使了個眼色。
「你好好咁喺度休息，唔駛擔心。」五十嵐看著受傷的金不換，心情無限感觸。
「我冇事，妳唔需要為我心煩。」金不換說。
二人離開房間後，在房門外輕聲討論。
「以一般人嘅體質而言，中咗依種毒早已經死咗，佢能夠順利克服有一半係依靠佢嘅毅力，另一半........」司馬亮率先開口。
「你究竟發現咗D咩？」五十嵐追問下去。
「我懷疑佢係接受過基因改造嘅馭者。」
忽然，從引水道出口傳來了一陣騷動，該處是研究所的緊急逃生門所在地。




「拜託你留嚮度照顧佢，我出去睇下到底發生咩事。」五十嵐說畢，便轉身離開。

在通往緊急逃生門的走廊位置，平仔正和鐵仁互相責罵，各不相讓。「到底咩事令你哋忽然吵起嚟？仲有，鐵仁點解嚮度出現？」五十嵐上前了解情況。
「佢嚮度放咗個裝置，監視我哋嘅一舉一動。」平仔回答，目光移向五十嵐飛燕。
「呢個地方嚮我上次受傷嘅時候嚟過，係我自己搵上門嘅。要怪就怪飛燕姐收容咗不明來歷嘅人，狂龍哥唔放心嘅緣故。」鐵仁說畢，便轉身繼續設置儀器。
「既然狂龍唔相信我，佢大可以嚮大本營時向我提出，點解要做埋D咁嘅野？」五十嵐說話同時，目光放在監視裝置上。就在此時，監視裝置發出一連串低沈響聲。
「呢個係炸彈！你哋快走！」五十嵐大叫道。