《疫戰都市》-《這個殺手不太濫》: 第九章 - 美瑾

「總統閣下，總理陶美瑾求見。」總統秘書在大門通報。
「跟佢講話我今日好忙，冇時間見佢。」畢凡說。
「總統閣下，總理已到，依家喺大門外……」總統秘書說話時面有難色。
「總理今日到底有咩貴幹？」畢凡向著陶美瑾說，面上的表情顯得十分不耐煩。
「總統閣下，到底咩事我國必須頒布緊急法？」美瑾說。
「總統差D被恐怖份子行弒，同黨在逃，依個理由夠唔夠充分？」
「總統閣下，另外我希望你能夠公開明確解釋一下國內醫療物資同糧食嘅價格問題，依方面早於成立聯合政府時已講明係屬於國家內政，係歸入我嘅代表黨處理，你依家重組醫藥及糧食局，又任用一班體制以外嘅人事加入國安局，咁係咪有D......」
「濫權，係咪？」畢凡直接打斷美瑾的說話。
「總統閣下，行使咁樣嘅權力係需要國會三分之二嘅議員同意先可以執行，仲有興建甲城圍牆同埋有關隔離平民嘅法案係唔可能以行政命令通過。」
「講得冇錯，但一旦國家頒布緊急法後，總統就係政府權力機構嘅唯一掌控者，我只須喺臨時指令外加上緊急法依項條款，我係唔會受到權力制約嘅。名義上，我更加係軍方最高指揮者。」畢凡一派囂張地道。





銀翼幫部份隊員先後逃離國會大樓前地。黑夜中，眾人從地下水道入口來到一個秘密地方，這裡被銀翼幫人稱為大本營的地點，實際上是收藏軍火和武器的倉庫，加上地底能隔絕手機的追蹤，故此一班成員便以這裡作為集合和藏身的位置，如今，五十嵐飛燕和花拉幾經辛苦背著鐵仁走到這裡。
「我哋要去邊？」花拉說。
「跟我嚟。」五十嵐說。
經過一段迂迴的路線，二女合力把鐵仁救往一處地下室，花拉說：「原來地下水道大本營有路通往依度。」
「依家救人要緊，希望妳唔好向其他兄弟提起有關依間密室嘅事。」
「明白。我收到李老闆嘅加密通訊留言，佢話平仔被警察捉走咗。」
「吓？咁李老闆佢依家點？」
「李老闆話佢成功走甩，但懷疑被人跟蹤，所以暫時唔敢返大本營。」





在地下室內，鐵仁被一位看起來像醫生的人搶救著，經過三小時後，那人放下手上的手術工具，向著五十嵐說：「依位兄弟嘅身體果然夠硬淨，佢總算撐過咗。」
「多謝教授，鐵仁今次能夠執返條命都係全靠你仗義幫忙。」五十嵐道。
「哈哈，原來我司馬亮平時嘅研究仲可以應用嚮救人方面。」教授說。
「花拉，麻煩妳留喺度照顧鐵仁。」五十嵐說，待花拉回應後與司馬亮進入另一房間。

「依家咁嘅情況，我相信我哋要嚮第二度避一陣風頭，往後嘅行動要改變策略。」五十嵐向司馬亮說。
「冇問題，咁當然係安全至上，妳都唔好為死去嘅兄弟過於自責。」
「我知道。」說話同時五十嵐垂下頭，然後面露痛苦神情。
「妳又出現副作用。快D吞咗依粒藥丸，佢能夠減輕妳體內增幅器對身體嘅負荷。其實，對妳嚟講報仇真係比健康仲緊要嗎？」
「我需要力量。由於我唔係一個馭者，所以一定要通過改造先可以擁有跟佢哋一樣嘅力量。」





在總理辦公室內，美瑾正與黨友開會，商討如何罷免總統的方法。此時，隸屬智囊之一的文治求見。
「大家散會。」美瑾說，接著與文治單獨會面。
「罷免總統依一著行得通嗎？」文治說。
「好可惜，總統已於三十分鐘前宣佈解散國會。依家只能等待軍方表態，我哋任何罷免舉動都可能成為總統製造剷除異己嘅藉口。講返起嚟，你嘅接頭人有冇最新消息？」美瑾憂心忡忡地說話，面上那倦容仍舊留下昔日美麗動人的神采。
「司馬教授已經跟特別行動隊伍成員聯絡上，經此一役，我哋損失咗一名特攻，另有隊員被捉。」
「想唔到螳螂捕蟬，黃雀在後。除非盡快搵出『機關』嘅犯罪證據，否則軍方可能會宣佈支持畢凡依隻老狐狸。」