《疫戰都市》-《這個殺手不太濫》: 第七章 - 霸氣總統

位於國會大樓的前地，這個月多了大批群眾聚集。人們大聲疾呼，要求政府大幅降低口罩和藥物等價格，有些飢餓的民眾則希望糧食局開倉派發食物和生活必須品。可惜政府遲遲未能回應民眾訴求。今天他們從媒體得知，一直對事件無動於衷的總統今晚將發表講話，對事件表態，所以憤怒的群眾均希望第一時間得知結果，以決定下一步行動。

在尚武集團的辦公大樓內：
「金不換，休息過後冇咩大恙嗎？」太保進入驗身室對金不換說。由於金曾經被敵人以武器擊中昏迷，太保遂安排他作詳細身體檢查。
「依D小傷，算得乜野，只可惜成批貨被人搶走，都怪我辦事不力，好對唔住。」金不換說話時放下測試儀器，展現出一身橫練肌肉。
「今次嘅損失其實唔算嚴重。」太保示意手下離開，接著說：「依班號稱銀翼幫嘅恐怖份子我留意咗好耐，佢哋最近喺甲城冒起得好快，我估背後有人為佢哋撐腰。你有冇睇到匪徒嘅容貌？」
「我……睇唔到。」金不換說，眼神有點猶疑。
「冇問題，膽敢太歲頭上動土，今晚就係佢哋死期。我收到情報通知，依幫人今晚會喺國會大樓嘅前地出現。」
「但係國會大樓前地屬於政府重地，而且最近有大批市民聚集，一個唔小心恐怕會傷及無辜。」
「依個冇問題，我已經佈下埋伏，你只須配合我捉人就可以，我要抽出佢哋嘅幕後支持者。至於國會大樓嘅問題，到時政府內部自然會有人配合我。」




「政府點樣配合？我唔明白。」
「你估私人護衛隊點解可以名正言順咁殺人？有冇聽過『機關』依個組織嘅名？」
「『機關』……就係嗰個專門替政府收集情報同做事嘅秘密組織？」金不換以銳利的目光望向太保。
「係。唔怕話你知，我就係『機關』嘅負責人，嚮依個時代，財富係由權勢同力量建築起嚟嘅。」太保點起雪茄後說。

這個晚上，國會大樓前地聚滿群眾，當中有人叫囂，亦有人焚燒總統肖像和假人。
「哈哈，原來我哋嘅總統做咗縮頭烏龜，計我話最有總統架勢嘅算係狂龍。」體格強悍的鐵仁說。
「喂喂鐵仁，你咁講係咪當我哋飛燕姐冇到？」說話的人是平仔，一個身材瘦削，專門充當跑腿的角色。
「你班人一人講少兩句得嗎？幫會係屬於兄弟一家人嘅，唔存在馬房制度。你哋睇，總統好似要出現啦。」一身古銅色肌膚，人如其名的黑柴說。





在大樓前翼被探射燈照亮的巨型露台上，總統被四個人稱四大護法的保鏢包圍下現身。四大護法全部一律身型高大，且西裝筆挺，看起來既不像總統助理，也不像官員，反而令人覺得這屬於總統的貼身屏障，有點不自然。
「等咗咁耐，睇嚟大家都有D攰。你哋令我想起我年青嘅時代，一味嚮度等機會。」總統笑著說。
「總統係咪飲大咗？」鐵仁說。
「但我可以話俾大家知，等咗咁耐，我最後選擇咗創造機會，依個亦都係我畢凡今天能夠成為總統嘅原因。」總統說話時揮舞著手臂，然後對著攝影機鏡頭說：「一個國家要點樣解決醫療同糧食問題，講起嚟簡單不過。」
現場傳來一陣喝倒彩的聲浪，不過這聲浪被畢凡的一下叫聲打斷：「安靜！」
「依個國家咁多年嚟不斷受到疫情拖累，單單喺甲城依十年嚟就已經有超過六份一嘅人染病，依個數字仲未計匿藏起嚟嘅黑市居民。我哋嘅社會非常重視醫療制度，對於會癱瘓醫療機構嘅疫症一向零容忍，講到底我要向邪惡病毒說不。問大家一個十分簡單嘅問題，當你哋肚入面有寄生蟲時，你哋會點做？」畢凡說。
「飛燕姐，條友又唔知要玩咩把戲，不如我哋拉隊走人啦！ 」說話的是相貌標緻可人的花拉FLORA，她與五十嵐飛燕是銀翼幫的美女二人組合。
「有媒體喺度直播整個講話嘅，我估佢玩唔到咩花樣出嚟。」五十嵐說。
隔了一會後，現場又傳來畢凡的演說：「冇錯！正常嘅人都會搵個醫生，去除寄生蟲。只有蠢嘅人先會建議一日食多兩餐飯。根據可靠數字指出，近年嚟嗰D嚴重暴力事件，約七成都係來自貧民區嘅平民同埋黑市居民，佢哋貪得無厭，手段凶狠，係清一色嘅暴徒！」
「講夠未呀？狗UP當秘笈！」說話的是李老闆，專門負責幫會的情報收集工作，平時愛戴鴨舌帽。




「為咗防止甲城日後嘅罪案，我哋要隔離恐怖份子與及佢哋嘅合作伙伴。我今天正式簽署咗行政命令，甲城四周將築起高大圍牆，我哋要將暴徒同疑似恐怖份子全部驅逐同隔離嚮甲城之外嘅地方，首選係大西北嘅沙漠地區，政府會嚮嗰度開設禁閉式集中營，依班人會長期配戴手帶，接受醫療監測。依個措施會立刻解決甲城嘅醫療同糧食問題，更可保障市民安全。我，正正就係你哋要搵嘅醫生。」 畢凡繼續說下去。
「總統係咪神經失常呀？」鐵仁說。
「我敢講我今天所做嘅，絕對係空前絕後。」畢凡以此話作總結。

話畢，照在巨型露台上的探射燈突然熄滅，大樓前地立即一片漆黑。與此同時，在遠處忽然傳來兩下搶聲。鐵仁和黑柴應聲倒下。
「有狙擊手！大家快走！」五十嵐高聲說。