【糖/虐/短篇】你的曖昧，是我殘缺的永恆: 十二年後的Canon in D #1

十二年後，我終於鼓起勇氣再次在她面前彈奏Canon in D。
就像《我的野蠻女友》的場面那樣。
 
認識她那年，我十八歲，她十六歲。
暑假，我跟阿南去她哥家裡打機，玩得正瘋，突然有人開門。
她哥以為是父母回來，連忙叫我們收拾東西拿出課本扮溫書。
開門的卻是她，看見我們三個慌亂的樣子，笑得花枝亂墜。
 
「阿哥，你哋係度拍戲？都升大學啦點解仲要溫書？」
「嚇死我，我以為阿媽返嚟。你今日唔係返學校咩？」




「學校爆水渠，所以咪返嚟囉。真係難得你會帶朋友返嚟玩。Hello，我係佢個妹呀，多多指教。」
她對著我和阿南，嫣然一笑。
 
她不知道的是，我們常常來玩，只是她哥永遠會挑家裡沒人的時候。
也許就是怕我們迷上她。
 
她這個秘密曝光之後，阿南開始常常找借口上去找她哥玩。
但他怕自己一個人動機太明顯，每次都找我陪他。
遇見她的次數越來越多，我越來越不敢和她對望，怕被她發現我臉紅。
 




阿南總是出盡風頭，狂搞爛gag逗她笑。
每次我都只能坐在一角，心情複雜。
直到某次偶然碰到她練琴，我才終於找到話題︰
「你……你都鍾意……巴哈？」
 
「咦？你都鍾意架？我屋企人好唔鍾意，成日話又重覆又悶！」
「其實唔會呀……佢嘅歌係巴洛克時期嘅代表，韻律有神樂嘅感覺，我覺得幾特別……咁你鍾唔鍾意巴洛克風格嘅其他歌？例如Canon in D？」
她終於露出比聽阿南搞gag更開心的笑容︰
「鍾意！我好鍾意架！你仲有無多啲果類歌介紹？」
 




我第一次那麼感謝我媽在我小學時逼我學彈琴。
其實我最討厭古典音樂了，懂得不比她多，那天回家之後卻一直上網查資料，去圖書館借書又去琴行買書，準備了一本自製琴譜。
兩天後，我約她在她家樓下的公園裡交收。
 
她翻著那本厚厚的琴譜，雙眼放光︰
「哇，好多我唔識嘅歌呀！多謝你！」
「唔、唔使客氣……係呢，點解你會鍾意呢類歌嘅？」
「你有無睇過《我的野蠻女友》？」
「韓國果套？電視重播果時我有睇過呀。」
「我果陣同阿哥一齊入戲院睇架。入面咪有一幕講女主角一路彈Canon in D，男主角一路送花俾佢嘅？我睇到好感動！其實我最想有人可以彈俾我聽，可惜無……咁唯有自己學琴囉！」
 
就在這一刻，我腦中突然響起音樂。
如果我可以為她彈Canon in D就好了。
我坐在白色的教堂裡，穿著踢死兔挺腰彈奏；她披著白色的頭紗拿著花球，在明媚的日光之中緩步向我走來……
 




六年後，這個願望成真了。
 
阿南準備要結婚了，找我做兄弟︰
「你都知我老婆鍾意果首咩D鋼琴曲，但我又唔識彈……一場兄弟，你可唔可以幫幫手？」
「梗……梗係得啦！無問題！無問題！哈哈哈！哈哈哈！」
我笑了，笑得肺有點痛。


其他集數/其他故事/最新文章︰http://bit.ly/39Ab0N3