由O Camp組爸組媽變左做真正既夫妻: Chapter 66

「吓阿哥你淨係錫姐姐就得㗎啦？我又要！」原來妹妹喺度呷醋。

「最多一齊Kiss囉！」Claudia對住妹妹講。

「講笑咋，我除咗有阿哥、又多咗個錫我嘅Claudia姐姐！妹妹好幸福！」

聽完妹妹咁講，我同Claudia不禁望住對方偷笑。覺得妹妹真係大個咗。而世伯伯母見到妹妹就好似多咗個女咁，將妹妹視如己出，愛屋及烏！

「阿哥啊媽咪話要叫我哋返去啦喎！」妹妹突然叫我。



「係呀你聽日係咪要練波啊！」我問妹妹。

「嘻嘻，我邊會咁衰做你同Claudia姐姐嘅電燈膽啊！」妹妹對我同Claudia講。

「係啊我都要幫小朋友改功課啦，返到去好Wtsapp我啦！Angela啊得閒再上嚟姐姐屋企玩啦，嗱呢啲玩具同衫衫你就拎走就得㗎啦！」Claudia對住我同妹妹講。

聽完Claudia咁講，我就知佢要回復返工作模式，做返一個要趕工作嘅幼稚園老師，同埋等佢享受返同父母嘅家庭樂。同時，我同妹妹就要做返孝順嘅仔女，返去父母嘅身邊。

於是我同妹妹就同世伯、伯母告別，而Claudia就俾咗我一個Goodbye Kiss，搞到妹妹好葡萄，用一個鄙視嘅眼神望住我。



返到屋企之後，爹哋媽咪就喺度睇電視。見到我哋兩個返到屋企喺度好開心咁樣。

「爹哋媽咪我哋返嚟啦！」我同妹妹異口同聲地向爹哋媽咪請安。

「你地兩個終於返嚟啦？」爹哋媽咪問。

「係呀，姐姐送咗好多嘢俾我呀！」妹妹話。

「你開心啦又食又拎！」我挪瑜妹妹。



「你不斷Kiss姐姐啦！」妹妹又串番我。

「好啦好啦你地兩個唔好嘈啦！快啲去沖涼啦，啊仔記得去洗衫呀！」爹地話。

於是我即刻走去換衫沖涼，洗埋啲衫就入咗房。入到去就自動自覺向Claudia大人報到我既行蹤。其實好多人都以為做男仔就要一五一十報告自己行蹤比女朋友聽，搞到自己冇晒自由。但係我會選擇將自己嘅行蹤話俾心愛嘅女人聽，因為我想同你講，如果你同我一齊，我一定要你對我放心。

「B，沖完涼啦？」Claudia問。

「係呀啱啱洗完衫！你做好晒啲嘢未？」

「做好啦！聽日有啲咩做啊？」

「當然係約你去街啦！」

「嘻嘻，你人細鬼大啦！聽日陪我去一個地方啦！」



「係咩地方？」

「唔話俾你知！等你心思思！聽日你就知㗎啦！我瞓先啦早唞！你都早啲瞓啦！唔准打機啊！」

「知道啦老婆大人！」

Claudia就off左，突然間車隊群組又有通知。我打開一望，原來係Johnny架Altezza終於整返好，可以隨時落得場。

我：「你架車終於整返好啦？」

Johnny：「係呀可以隨時出得街啦，啱啱攞返架車同Joey兜咗一轉。」

Steven：「嘩你咁快比阿嫂揸啦！你唔記得佢上次撞過咩？」



Johnny：「買俾佢練下車囉，總之唔好搞到甩尾就得！」

Wyllis：「老老實實你架車改咗好多嘢喎？」

Johnny：「都唔係改好多姐，勇哥嗰部掃把佬先改得多。」

我：「我包圍都冇換，只係換咗個CE28鈴。裏面就Upgrade左好多嘢。」

Donald：「你部嘢有冇400匹啊！」

我：「差唔多啦！始終喺香港渣都唔使咁大馬力，平時仲要做家庭車。」

Johnny：「明㗎啦勇哥，你要車Claudia啊嘛！」

我：「你講咗去邊？」



Wyllis：「奧斯卡話聽日食飯，叫埋班女人出嚟啦。」

大家都叫好，我就話要問Claudia。結果就係比佢哋恥笑，話我係老婆奴。不過我就係要尊重返我老婆！吹咩！

講完之後，睡魔又急call我，係時候就要瞓覺啦！唔知Claudia個傻妹又比啲咩驚喜我呢？