由O Camp組爸組媽變左做真正既夫妻: Chapter 37

到左第二日，我晨早起左身梳洗換左套運動look。見到爹哋係廳到睇緊報紙

「早晨爹哋！」

「少有喎阿仔你咁早起身！」

「冇啊去跑步啊嘛！想Keep Fit啊嘛！」

「好啊！不過以前星期日叫你都唔會起身！係啊我今日同你媽咪妹妹返約左爺爺佢地啊！你自己食飯啦！」



「咁而家早起咪得囉！我走啦拜拜！」

我就落左屋企樓下邊用AirPods聽歌邊等Claudia。。。。

跟住有人無啦啦kiss我一啖。。。肯定係Claudia啦！見到佢皮膚白裡透紅得黎又粉粉地，成浸童顏少女味出晒黎。


我地見到大家就不斷係到笑，因為我地都係著白色T同adidas 黑白間條運動長褲，只係對鞋唔同

「早～晨～啊～勇B！」



「早晨啊晴B！」

「係咪第一次同本小姐跑步呢？」

「係啊！同埋我都係第一次呢到跑步咋！」

「咁今日我地就跑海邊啦！兩個鰂魚涌公園來回。不過你唔好跑咁快喎！我驚追你唔到！」

「你放心喎我唔會丟低你既！」



「你試下丟低我！」

「我唔會既放心！我地不如做下熱身先！」

「好啊！」

我地去埋一邊，之後各自做熱身。

見到Claudia能夠做出好多種高難度既動作，睇得出佢運動神經一定好好。

「你得未啊？」

「OK啦，隨時跑得！」



「輸左呢要請早餐啊！」

「好啊你鐘意啦！」

我地兩個就開始跑，不過唔知係咪太耐冇跑過所以一開始跑得比較慢。而Claudia就同我平排一齊跑。話時話佢體能真係好勁，可以拍得上我。果然DGS出黎既校隊體能唔係裝假狗，係真材實料。

有時覺得用跑步呢個方式慢慢觀看呢個世界，都係一件唔錯既事，而且又可以減下壓排下毒都幾好架！

而今次第一次係港島區跑步（HKU除外），呢到同沙田嗰邊真係完全兩個世界，有陣維港吹黎海水味同美好既景色。但係同心愛既人跑步，就係最開心既事啦！

我地跑左一個鐘頭就停低左，我哋都跑到滿頭大汗。見到Claudia跑完之後香汗淋漓，睇上去比之前更加迷人。唔知係咪做完運動嘅女仔係特別吸引嘅呢？雖然我跑得快過Claudia少少，不過最後我都請佢食早餐。

「喂你以前係咪跑開步架？咁快既你！」

「使乜講！所以叫你唔好harsh我地啲女仔啊！」



「我點會Harsh你啊！我只會錫到你燶姐！」

「哈哈！算你啦！你跑步都唔慢啊！」

「不過我好耐都冇跑啦！所以會慢少少！你以前跑開邊到架？」Claudia問。

「我一般都係由屋企出發沿住城門河跑到中大來回，或者沿住大埔公路跑到出九龍。我試過最癲由屋企跑入埋上水。」

「你真係痴線，我最多都係呢到或者運動場咋！咁你平時星期日有咩做架？」Claudia問。

「以前就打下波同陪屋企人囉！而家我會陪晴B你架！」

「好啦！我哋不如去附近嘅茶餐廳食早餐啊！」



唔知點解我覺得Claudia好貼地，通常我以為依家啲女仔係會淨係識食貴野！所以我覺得自己好幸福有呢個女朋友。

「呢到啲早餐幾多人食喎！」

「係呀我平時好鍾意嚟呢度食架。有時星期六日會同爹地媽咪一齊喺度食早餐！」

「咁以後就由我陪你食啦！」

「使鬼你陪呀哈哈！不過如果你煮比我食嘅話我都唔介意嘅！」

見到佢滿頭大汗，我就拎張tempo紙巾俾佢。流汗既女仔係特別吸引既！

「抹乾啲汗呀如果唔係會感冒呀！」

「唔該你啊BB！我哋食乜嘢啊？」



「不如我哋叫個早餐A同早餐B啦！早餐A係火腿意粉，而早餐B係牛尾湯通粉！想要邊樣？」

「好啊！我要飲熱檸蜜！」

我地就於是叫咗個早餐呢度早餐B再加杯熱啡同熱檸蜜。

「有嘢食啦趁熱食啦！」

我就扮到個保母咁佢吹凍啲嘢食。。

「餵你食啦BB ！」

「好啊我都餵你食嘢啊！」

我地咁就互相餵大家食嘢，結果食咗成粒鐘。食完之後，我哋就返到屋企樓下。

「係呢BB你今日有咩做啊？」我問Claudia。

「不如我哋今日拍下拖仔過下二人世界啊！」

「好啦今日係我哋嘅第一日去拍下拖仔啦我哋！」

「我要返去沖涼先喎！之後就換衫出嚟啦！」

「Good Idea！我都返去換衫先！今日我哋第一日拍拖所以要着得好睇啲！」

「咁一陣見啦我哋！」