由O Camp組爸組媽變左做真正既夫妻: Chapter 10
我哋玩吓唱吓， 原來已經係凌晨三點幾。。。見大家開始有啲睡意，於是開始散場
我：「好啦各位咁我哋到時U見啦，喺度再提大家到時帶返我哋件隊服啊！同埋記得著拖鞋同波鞋啊！因為我哋到時會跳舞同埋會落沙灘架! 呢個好緊要好緊要好緊要好緊要！好緊要所以要重複講三次！有咩問題大家再係個group度問我同組媽呀。仲有仲有記得帶好防曬物品啦！」
Claudia：「係呀係呀我哋個電話廿四小時為你地服務架！拜拜啦各位」
我諗我講完佢地都唔會聽，已經將我地既說話已經拋諸腦後。
我：「係呀有冇人要過海或者返Hall架？我可以車埋你地架？」
跟住佢哋話唔使，仲喺度講：「唔阻你同組媽happy啦我哋自己搞掂得架啦！」
Claudia：「你哋返去要小心啲呀！大家如果返到去嘅就wtsapp我地啦！記得要注意人身安全啊。」
我同班組仔組女Say goodbye左之後，就同Claudia Miki返咗去langham到拎返架車。
上到車，Miki即刻同我講：「Aaron，你可唔可以車我去加多利山啊？我要搵我男朋友啊！」
Claudia：「你唔返屋企訓啦？」
Miki：「係呀今晚去佢到打牌啊。所以唔使車我返屋企啦！」
我：「ok！咁我車你去加多利山啦！」
Miki：「好啊唔該你！係呢我係到住左咁耐都未見過你既？」
我：「我都係呢排先搬過嚟住咋。第一個喺度識個朋友就係Claudia啦！」
Claudia：「係啊，係估唔到世事會咁啱囉！咁你之前住Hall定係出面啊？同埋你以前住邊架？」
我：「我之前住大圍架。之後入大學都抽唔到Hall住。所以咪一直被逼要揸車返學。不過近期我屋企人調左去港島呢邊返工，為咗方便啲咪搬咗過嚟呢度住囉。」
Miki：「你屋企都幾大犧牲喎。」
我：「都係架都幾大犧牲架！」
Claudia：「不過講起沙田我都好耐冇去過啦！搵日不如帶我地一齊去行下啦！」
Miki:「帶埋我帶埋我！」
我：「好啊好啊！沙田，大圍都幾多嘢行架。下次帶你去食雞粥啦！」
Claudia：「好啊好啊！不過你請喎呵呵！」
Miki：「唔爭在請埋我啦！」
我：「好！」
Claudia：「係呢咁你由細到大都住係大圍架？」
我：「我係新界原居民嚟架嘛所以咪由細到大都係到住攞。」
Miki：「咁你咪有個啲所謂嘅丁權囉？」
我：「係架。可以有塊地起三層高嘅屋呀。」
Claudia：「嘩做你哋原居民咪好着數？」
我：「係呀呢啲係我哋嘅福利架！你恨到唔恨到架啦算把啦！」
Claudia：「唓好叻咩？」
Miki：「等你間屋起好左再帶我地去搗亂下！」
我：「遲d先算啦！到加多利山啦。」
Miki：「我打比我男朋友叫佢落黎接我先。」
加多利山，係一個明星住宅區，哥哥同劉華都住係呢到
我離遠見到有個好高同大隻既男仔，個樣鬼鬼地。著住件藍色A&F背心，黑色短褲同踢人字拖。之後我問Miki係咪佢男朋友
Miki點左頭，跟住叫我將架車駛去個男仔前面
佢即刻落咗車，跟住同個男仔而係到擁抱
「BB！I miss u !!」
Miki男友：「Baby I miss u too！咦Claudia你都係到啊？」
Claudia：「係呀因為我哋今日一齊食飯吖嘛！咁啱佢要來搵你所以咪車埋佢過嚟囉！」
Miki男友：「原來係咁，唔該晒你！咦隔離個男仔係？」
Claudia：「話呢個係我O Camp個partner同新鄰居黎架。頭先係佢車我哋兩個嚟架！」
Miki男友好nice咁握住我隻手：「Hello 我叫Leon啊，係Miki男朋友。係呢點稱呼你啊？」
我：「我叫Aaron啊，多多指教！」
Claudia：「喂咁你地咪係郭富城同黎明。」
我&Miki男仔：「仲差劉德華同張學友呢。」
Miki：「係呢你地兩個打唔打牌啊？一唔一齊玩呀？」
Leon：「係啦人多熱鬧喎！一齊啦。」
本來我興致勃勃，想游下乾泳。不過Claudia突然講：「下次先啦！我都想返去休息下！今日都有啲攰呀！你兩個玩得開心啲呀！」
Leon：「好啦咁喂下次不如一齊出嚟食飯同打牌啊！」
我：「好啦好啦！我哋走先啦你哋玩得開心啲！」
Miki：「咁到時見啦！拜拜！」
之後Miki同Leon手拖手行左入去間佢獨立屋到，而我哋都開車走人
我：「原來Miki個男朋友都幾有錢架喎！」
Claudia：「係呀佢屋企做生意架，喺東南亞、香港同大陸都有廠嘅。Miki同佢行埋左好多年啦，後來佢畢咗業之後去咗英國讀Electric Engineering。佢依家放緊暑假咪返嚟囉。」
我：「人哋就好啦係高富帥同埋咁nice。我有佢一半咁有錢就好啦！」
Claudia：「你都唔係好差姐原居民！起碼有地比你起屋呀！」
我：「哎呀你個林雅晴又玩嘢啦係咪啊？」
Claudia:「玩你唔起啊依家？」
今次我就決定反客為主，係咁摸Claudia個頭
Claudia好怕醜咁講：「喂呀衰人咪摸我個頭啦！你搞我個頭亂晒呀！我仲要返去洗頭架！」
我：「反正你都要返去洗頭架啦，整唔整亂你個頭都係一樣姐。」
Claudia：「唔制啊！唔制啊！我唔要整亂個頭先返屋企啊！」佢又乘乘機機打我膊頭
我：「好啦唔好再打啦我唔同你玩啊！我投降啦！」
雖然摸佢個頭嗰陣佢扮嬲，但係其實佢好似好享受咁。
唔知係咪人哋所講嘅「口裏說不，身體卻很誠實。」呢？
Claudia：「Aaron，可唔可以唔好返屋企住？」
我：「咁你想去邊呀？」
Claudia：「游車河呀。你依家返去都唔會瞓得着架啦！你唔出聲嘅話就當你應承架。」
我冇出聲，只係繼續揸車，默認左今晚唔會返屋企。
我就補多句：「你想留喺九龍定係過返港島啊？」
Claudia：「隨便你啦我無所謂，不過唔好去新界同大嶼山就得啦。」
我：「咁樣我帶你去一個地方啦！」
Claudia：「邊度先？會唔會賣我豬仔架？」
我：「轉頭你咪知囉！攰嘅話可以瞓一陣先。到左叫醒你啊。」
Claudia冇出聲就訓著左........我就繼續揸車.....
去到一個紅燈位，我就停左車。
見到Claudia訓到好霖，為免驚佢凍親。我就幫佢披翻件外套。呢個時候我就乘機偷影佢瞓覺嘅樣，黎報復上次佢偷影我之仇
之後轉左綠燈，就入左紅隧過返港島，然後行東廊落柴灣，往石澳方向行駛。
去到一個沙灘，我就停左車。
「到啦！」
Claudia就起左身：「我地而家係邊啊？我係咪訓左好耐啊？」
我：「唔係呀你訓得啱啱好啊，依家係石澳啊！」
Claudia：「你做咩車我黎呢到既？」
我：「你話叫我唔好去咁遠咋嘛！所以係咪嚟咗呢度囉！」
Claudia：「你都幾識揀地方啵！以前成日同你女朋友黎呢到架？」
我：「又唔係成日黎嘅，不過呢到係我同佢表白既地方。呢個地方對我來講好有特別意義。」
Claudia：「Oh你都幾識揀呢啲地方個喎。唔怪得帶我來呢度啦！」
我：「你黎過呢到未啊？」
Claudia：「以前小學嗰陣係旅行來過。都成10年前嘅事呀。咁你地平時多數會去邊啲地方？」
我：「唔係好多架，因為當時我哋仲係讀緊中學同大學。冇錢去外地旅行，所以我哋喺放假多數都係去吓香港其他地方或者去行下街咁樣啦，最遠都係同佢去過澳門同台灣嘅咋。我以前曾經承諾過要帶佢去香港每一個地方，只可惜。。。」我開始眼濕濕......
Claudia見到我咁樣，即刻比張紙巾我。估唔到佢真係好善解人意。
我：「唔該你！」
Claudia：「唔洗客氣！其實你而家係咪都係未放得低佢啊？Sorry，我唔應該提及你啲傷心事！」
我：「可能佢係我心目中佔左一個好重要嘅位置！如果要講有幾傷心，不如講下同佢有幾多開心既回憶啦。傻啦我都冇怪過你，我都知你無心嘅！唔好講我啦不如講下你同你男朋友之間啲嘢啦！識在你咁耐都未聽過你講喎？」
Claudia:「吓好悶個喎唔好講啦！」
我：「講咗我最痛嘅野比你聽喎，你唔係唔講吖嘛？」
Claudia：「唔講唔講唔講唔講......」
我一路摸佢塊面一路對佢講：「唔講呢我就我就繼續擠你塊面。」
Claudia：「哎呀唔好啦好痕架！好啦好啦我講啦我講啊！」
我：「好啦好啦我放手啦！」
Claudia：「其實呢我同佢係聯校ball到識既，份人都係乖乖仔。之後佢就成日約我出嚟行街睇戲食飯，直至到有一次我哋去到海旁佢就同我表白左。咁我哋係埋一齊。或者可能佢係我第一個男朋友啦，所以特別愛佢。不過我地行左唔夠三個月佢就去左外國讀書。自此之後就keep住Long D。開頭大家都日日有傾計嘅，後尾........」
我：「咁你地兩個感情咪變淡左囉？」
Claudia：「開頭都唔怕嘅，後尾慢慢因爲大家都好忙。所以感情咪開始淡囉。不過我講明先啊我係處女黎架！後來我發現到佢偷食，搞左我個好姊妹，我咪同佢分手囉！」
我：「因為咁嘅原因先去做組媽啊？」
Claudia：「其中一個原因啦，不過最主要嘅原因就係想係大學四年咩都嘗試下。始終青春不留白，希望儘量減少啲遺憾，至少起碼自己唔會覺得後悔。咁你呢？你又會做組爸既？」
我：「我本來冇報架。後來因為有個組爸甩左底。於是Oscar咪叫我頂左佢個位囉。開頭我都冇咩興趣，但因為Oscar同我好friend，在情在理我都會幫佢手既。」
Claudia：「你都幾有義氣個喎！其實我都開始慢慢欣賞你。」
我：「多謝你先喎！」
Claudia:「多謝我d咩？」
我：「多謝你幫我解圍。其實佢哋話我做a記戈d經紀真係好唔開心。同埋點解你會估到我會做律師樓嘅？」
Claudia：「都唔係好難估嘅啫。嗱因為你係讀法律嘅，你哋最多都係律政司或者律師樓Trainee，之後比我真係估中咗喎。我係咪好了解你呢？」
我：「係呀，其實我真係返律師樓架。不過我唔想俾太多人知道姐，出嚟做嘢要低調啲呀嘛。加上我希望自己能夠做到啲成績先再同人哋講。」
Claudia：「又唔係唔見得光有乜所謂啊？你又唔係偷扼拐騙同埋做非法野。不過你低調都唔喺唔啱嘅，始終如果太高調嘅話會招人妒忌架。加油啊我永遠都支持你。我有咩法律問題嘅話或者有咩生意第一個搵你先。」
我：「話你咁睇得起我呀！俾我講多次多謝你先！」
Claudia：「我問多你一個問題啊？」
我：「咩問題先？」
Claudia：「你幾年出世架？」
我：「1994年12月24日。你呢？」
Claudia：「咁啱嘅我同你同年同月同日出世架！我都係1994年12月24日出世架！不過你係咪留過班架？」
我：「你又知我冇留過班？我遲入學啊！」
Claudia：「我都係囉！我同你同一屆考DSE架。不如咁啦我哋今年生日一齊慶祝啦。」
聽完Claudia話一齊慶祝生日，我個心有啲暗爽，原來呢個世界真係好細，竟然有一個女仔會喺同我同年同月同日生日，唔知大家係咪同一間醫院、同一個時間出世呢？
我哋傾吓傾吓，太陽已經逐漸升起.....
Claudia：「你睇吓好靚呀！」
我：「係呀係呀好靚呀！」
Claudia即刻攞左部電話，影低個太陽
Claudia：「我地不如一齊selife啦。」
我：「唔唔........你有冇自拍神棍？」
Claudia：「有啊。」
我：「Nice。」
Claudia：「我地數1....2....3就㩒快門啦。」
我：「ok，1...2...3」咁就影左。
我地影左好多張，大家就互相影相
我：「睇吓我影得你幾靚。」
Claudia：「係呀係呀最叻係你啦！算啦你影得算OK 」
呢個時候我哋都開始眼瞓.......我就開始伸懶腰
Claudia：「不如返屋企啦我哋。開始有少少眼訓。」
我：「係呀我都攰啊。」
於是我哋離開咗石澳，返咗屋企。
去到停車場泊好車
我問Claudia：「眼瞓未啊？」
Claudia：「未啊我驚瞓唔着添。依家仲係好掛住嗰個太陽。過幾日去camp一齊再睇啊。」
我：「好啊到時再睇啊！」
突然間有人敲我車門.......睇真啲.....原來係.....妹妹
佢用一副好惡嘅眼神望住我同Claudia......
Claudia：「有個靚女搵你喎？」
我：「唔使理佢嘅。」
妹妹扯住我隻耳仔，好大聲咁講：「死仔你夠膽再講多一次？ 琴晚去咗邊度黎？」
我：「好痛啊......關你咩事呀？話時話你做咩係到既妹妹？」
Claudia完全冇理到我，只係嫣紅一笑
妹妹：「媽咪叫我落嚟喺架車度攞返啲嘢上去。係呢個姐姐係邊個嚟架？」
我：「叫Claudia姐姐啦。唔可以咁冇禮貌架！」
妹妹：「Hello Claudia姐姐。」
Claudia：「Hello，你叫咩名啊？」
妹妹：「我叫梁曉晴，英文名Angela。今年17歲半，黎緊升中六。」
Claudia：「我叫林雅晴啊，今年21歲。同你哥哥一齊讀書架。」
妹妹：「係啊，姐姐你係咪都係住呢度架？」
Claudia：「係啊，我住你地樓上架，24樓D。得閒上黎搵姐姐玩啦。我屋企有好多公仔同玩具架。你鍾意咩公仔架？」
妹妹：「Er....我鍾意海賊王，比卡超同Keroro囉，仲有哈姆太郎。」
Claudia：「真架？我都係啊！下次一齊玩啦！同埋我可唔可以同你上契做兩姊妹啊？」
妹妹：「當然可以啦，如果我阿哥比的話？」
我：「我冇所謂架。」
Claudia：「好啦由今日開始你梁曉晴就係我林雅晴既妹妹啦！如果你哥哥蝦你嘅話你就同我講啦！」
妹妹：「好嘢我有多咗個姐姐啦！」
我：「你地兩個真係。。。」
Claudia：「好啦時候都唔早啦我哋都返去啦！都眼瞓啦。」
我：「咁到時去camp見啦。」
我地一齊搭lift，之後到咗嗰層
Claudia：「好啦拜拜啦Aaron，拜拜啦Angela！」
妹妹：「拜拜啦Claudia姐姐！」
之後Claudia行埋我耳邊同我講：「今日真係多謝你呀！拜拜！」
我：「拜拜！」之後我同妹妹出左lift，而Claudia就上返去自己嗰層，臨走前佢仲同我單左眼添，嗚啊！
我：「我同姐姐啲嘢千祈唔好同媽咪講啊！」
妹妹：「知啦長氣鬼！！不過阿哥？」
我：「做咩啊？」
妹妹：「姐姐以前係咪讀DGS架？」
我：「我冇問佢啊！做咩咁問？」
妹妹：「我以前係田徑隊同排球隊到好似見過佢架！」
我：「係咩？入去啦！」
一開到門，見到阿爸阿媽坐咗喺度
見到我就捉左我坐低
爹地：「阿仔琴晚去咗邊度啊？成晚唔見你嘅？」
我：「冇啊約咗O Camp啲組仔組女食飯吖嘛。再過幾日我要帶camp，所以要同佢哋講啲重要事項，順便咪佢哋玩咗幾個小型game。所以咪遲咗返嚟囉！」
媽咪：「夜返唔緊要，不過最緊要注意安全同埋要樣樣小心。你知屋企得你一粒仔，所以樣樣野要小心。唔好令我地擔心！」
我：「知道。」
我講到未講完，妹妹就大叫：「佢琴晚同個靚女姐姐出街啊！仲玩到天光先返嚟啊！」
今次大鑊啦！！！！
我即刻暗住妹妹把口，唔俾佢講.......
唔知佢一野甩咗我隻手，唔夠佢抽同大叫：「個姐姐仲要住我哋樓上添架，仲要好靚添喎！」
爹地：「咦啊仔你終於有拖拍啦？」
媽咪：「終於飲得杯落囉！自從嘉穎過左身之後我直到好擔心你呢世都唔會再拍拖！」
我當時想解釋：「事實唔係咁架！我同佢冇野架！我哋只不過係O Camp既partner同鄰居嘅咋。千祈唔好聽妹妹亂咁講啊！」
今次真係比妹妹玩死啦！
爹地：「阿仔慢慢嚟唔使急！」
媽咪：「啊仔你如果去追女仔就快架啦錯過咗就冇架啦！」
我由於是扮眼瞓，就走返入房瞓覺.......不過其實我係想避開屋企人嘅視線.....
諗住即刻瞓覺啦......突然間
「Claudialamngaching傳送了一張照片給您」
我打開來睇下啦，原來係我同佢一齊睇日出嘅相
睇落去我哋兩個好似情侶咁。。。
Claudia：「喂訓唔訓得着啊你？」
我：「本來諗住瞓覺架啦，不過你send咗張相俾我。 所以就瞓唔着啦。」
Claudia：「係呀，今次真係多謝晒你！你比左我一個咁特別嘅回憶。」
我：「都唔算係啲咩特別回憶嘅，好啦我真係要訓啦咁到時見面再講啦！」
Claudia：「咁我都瞓覺啦，如果唔係嘅話個樣會好殘架！到時會比班仔女笑架！好啦早啲瞓啦！講多一樣野比你聽呀！」
我：「乜嘢啊？」
Claudia：「你阿妹幾靚喎！」
我：「係呀佢好靚架。就好似你咁靚。」
Claudia：「口花花！」
我：「不過你地好多野都好似囉。好似真係兩姊妹咁。」
Claudia：「可能我哋前世係姊妹呢。我真係要訓啦早抖！」
我：「早唞啦！」跟住我就瞓着咗......
唔知點解，自從做咗組爸之後。覺得自己嘅責任感重咗好多
因為除咗對自己負責任之外，對我嘅partner同自己嘅組仔組女亦都要有一份責任感。我覺得既然佢哋跟得我，應該要好好咁愛護佢哋而唔係大家所諗嘅獸父食女。唯一可以做嘅就係希望比佢哋一個美好嘅回憶。
最重要嘅就係又可以同Claudia既關係又邁進一步，唔知點解我竟然可以同佢談天說地，好多關於大家嘅嘢。唔知佢係咪對我有好感呢？但係最估唔到嘅係原來我同佢同年同月同日出世，話唔定大家係同一間醫院都唔定。
或者呢啲可能叫做［臭味相投］？