[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: CH.24(2)

眼前嘅少女外表非常狼狽，似係曾經見過大場面嚇到急急腳走人，然後頭髮飛黎飛去，而家個樣成個貞子咁。

頭髮全部向前，遮掩咗佢嘅面容。

喺黑暗嘅環境之下，真係格外恐怖。

佢鼓起勇氣，緩慢咁撥開額前嘅頭髮，生怕見到眼前嘅我，並非一個正常人。

「唔使驚架，快啦，跟我行啦。」





「唔⋯唔好，我驚。」

「真係冇事架，我會保護你。」

「真⋯真嘅？」

「嗯。」

「信住你先啦。」





我再次向十三確認。

「十三，搵到一個倖存者女仔，我會保佢上車，你接應。」

「收到收到。喂，老實講靚唔靚架。」

「妖，咸濕到你。」

「玩下啫，唔使認真。」





對講機連線中斷。

「係喎，你叫咩名啊。」

「你呢。」

「我叫M，係一個倖存者據點嘅領導人，同時都係一個學生。」

「你好，我係阿月，我都係個學生。」

「吓，睇唔出，你個樣好成熟，我仲以為你讀緊大學。」

「唔係講笑，我啲friend同親戚都話我特別成熟，似20幾歲嘅女仔。」

「唔講呢啲住，我今次出黎係搵人嘅，唔係搵你，係搵緊一對夫婦。」





我將夫婦嘅相比咗阿月睇。

「嗱，就係佢地兩個，你有冇見過？」

「吓！係佢地兩個？頭先我見到佢地兩個架！

我嗰陣偷偷地走落黎搵嘢食，就啱啱好見到佢地兩公婆一齊行樓梯落樓。

我同佢地都有見到大家，多個人多一個照應，我同佢地就一齊行，落到地面層，佢地就同我分散咗，如果我冇睇錯，佢地好似入咗M記，至於有冇再轉地方匿埋，我就唔知啦。

我搵搵下就比一隻感染者嚇到走咗入去戲院啦，之後嘅情況我就再冇見到。」

「咁樣啊，好啦，咁我送返你上車先，我會再去搵佢地。」





「唔好再亂咁行啊！再行入去，你會亂到更加多恐怖嘅嘢啊！到時你唔單止救唔到人，反而仲會將條命都交低喺嗰邊。」

佢好似一個媽媽咁，擔心完呢樣，又會擔心嗰一樣。

「唔使擔心我，我話咗要做嘅事，冇人可以阻止我去實踐。」

呢句說話，似乎超自然地型。

中二病同時爆發。