[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: 番外篇（七）

「得啦，遲下我幫你補習，你幫我搞好比賽之後乜都得。」

「你話架，我等你啲notes啊。」

佢所講嘅notes當然唔係老師比嗰種啦！

啲老師淨係識同你講，呢頁，呢頁同呢頁係重點，要背曬，記得highlight。

搞搞下成本書原來都係重點，我中過一次伏之後就冇再聽過啦。





呢啲嘢當然要靠平時自己做架啦，聽住佢講嘅書，自自然然就會知道會出咩題目，每年嘅舊卷都玩一次，咁咪得曬囉。

重點呢樣嘢，好容易搵到嘅。

「得啦，我係邊個先得架。」

「叮噹叮噹～噹叮噹叮～」

傾咗兩句咋喎，咁快放飯？





望下隻表，真係12:30

「喂，阿火，今日去邊度食。」

「你想呢？我呢排食得太多油膩嘢，想食啲清淡少少嘅。」

「好啊，咁我地去食魚蛋河？」

「啱曬口味啦，仲唔快啲行，食完我地練下先啦，今日我咁啱有帶結他啊。」





「咁啱都有？好啦，早去早回。」

（轉場）

「唔該姐姐，一個魚蛋河多腩汁。」

「我都係。加埋凍檸茶少冰少甜。」

「咁我飲凍鴛鴦啦，少甜啊，唔該你。」

「收到，等憶（一）陣。」帶有口音的姐姐說。

又係口音，點解咁多地方都請佢地嘅？

有冇身分證架。





唔想理，算數。

我用光速去完成碗裏面嘅食物，旁邊嘅阿火都食得非常之快。

「哇，乜你咁快。」阿火嚇了一跳。

「想練歌，係要咁啦。」我笑道。

「你又啱。行啦，買單。」

15分鐘嘅過程，我地又返到學校。

「難道我可以扭轉宿命重遇你一次～」





「難道故事終結早已注定，沒法制止。」

仲有45分鐘，咁當然要租間band房啦。

「沿路滿地佈着刺，也沒有在意，即使傷過無數次，仍會願意。」

厚重嘅聲音喺band房不斷輪迴。

吉他美妙嘅旋律聲聲入耳。

音樂正在燃燒，我地兩個嘅青春，亦都消耗緊。

「不怕跌入恐怖漩渦，不懼不累，就憑團火～」

「那怕這是禍，滴血都不會痛，未怕跌墮。」





「衝破界限問誰能阻，你是我活着的希望。」

「盼望有日會回到最初～」

話咁快，呢個happy hour就咁完咗。

真係好耐都冇認真過。

好似，從中一開始就冇試過。

還好，技術都未完全生疏。

「頭先勁喎，一直唔覺你唱歌好聽，你啱啱All in咗？」





「咁就梗係冇啦，唔好玩先得架，我邊有極限架大佬。」

「係喎，差少少唔記得咗你係無敵嘅存在。」

「係囉係囉。明明頭先都只係濕濕碎啦，點會咁快要All in。

我話曬都係傳說中嘅男神，有好多技能未完全show出黎，之後睇我表演啦，我一個可以同一百個人挑機啊，根本就冇乜難度。」

「係咪架，你有冇咁鬼勁啊，識你咁耐，咪又係個毒仔宅男。」

「你識條鐵咩，我夜晚喺屋企做乜都要話你知咩。」

「好囉，你勁你勁，我睇好戲，唔好到時上到台自己核爆，我會比人笑死。啊，係我會笑死你。」

「得啦，你唔會有機會笑死，我唔會比呢件事發生。你笑死咗，我去邊度搵返個新朋友。」

「係啦，點解你會咁突然想報名？斷估唔止係你講嘅咁簡單，你從實招來，如果唔係我唔撈啊。」

「唔係啊，又玩威脅？最憎你咁玩我。算數，我講啦。我鍾意咗個人啊！初戀啊！你明唔明啊。」


「你初戀？咪同我講笑啦，你肯定私底下唔知拍過幾多次拖啦，仲扮A0，呃3歲細路仔？定係你想呃自己？」

「真係初戀啊，小學嗰種你都唔會計啦。」

「咁⋯好似又係，信住先啊。」

「係先好，如果唔係我切咗你。」

「嗯⋯」

之後嘅日子，好似每日都一樣咁。