《我想做你一世守護神》: 序章（二）

終於等到放學嘅時候。我好快就汁好咗書包，然後行去晴晴個位到幫佢手。「晴晴bb豬呀，不如我地...唔好去睇戲，我地去行街好唔好呀？」

「唔得喎！我今日淨係想睇戲！」佢望住我，對住我扁嘴撒嬌，好似喺到投訴緊我講野唔算數。我一早就知道今次可能好難說服到佢，除咗我應承咗佢之餘，亦都因為佢平時好鐘意睇戲，無論咩戲佢都啱睇。

見到佢扁嘴，我就起咗憐憫之心，有少少心軟。我唔想佢唔開心，但我更加唔想佢有咩事，所以點都好，我都唔希望我今朝夢到嘅野有機會發生。我繼續努力勸佢：「唔好啦，你知我入到戲院實訓着架嘛，下次先睇啦，我地去買聖誕禮物！」

我嘗試喺背後攬住佢，點知佢竟然推開我。「你成日都係咁，講過啲野又唔算數，次次都臨時轉計劃，我唔想理你呀！」講完佢就即刻攞埋個書包行出班房。

我企咗喺原地發呆，同佢一齊呢段時間佢從來冇試過就咁走咗去。我追出課室，但係出到去已經唔見咗佢。佢講得冇錯，一齊咗之後我成日都信口雌黃，原本講好咗做嘅野到最後都會因為我改變主意而變咗。其實晴晴已經好就我，即使係咁佢都冇俾過說話我聽，今次係第一次佢發我脾氣，可能係因為冇得去睇戲？定係因為我已經令佢失望太多次？





晴晴就好似保特上身咁，我追到出學校都仲未見到佢。可能佢只係匿埋冷靜下，照道理冇理由佢會跑得咁快。我打電話俾佢，因為我好想氹番佢，但係佢都算乖乖女，平時番學根本唔開機，無論我打幾多次都打唔通。我真係冇辦法，唯有喺學校門口等佢，希望佢只係匿埋咗，仲未離開學校。

時間慢慢咁過去，電話我都打咗不下五十次，我都仲未見到佢行出嚟。個天都開始黑，可能佢真係走咗？定係...佢自己一個去咗睇戲？諗到呢到，我即刻睇下時間，17:42。

「仆街！」我好似發咗癲咁跑去截的士，搭去佢屋企附近果個商場，而一路上我依然打緊電話俾佢，希望佢突然間開番機然後話俾我知佢實際嘅位置。

我一落到車，即刻拔腿狂奔，已經冇再理街上人嘅奇異目光同閒言閒語。我知道已經六點，但係我印象中記得佢出事嘅時間係六點零六分，所以我應該仲有幾分鐘跑到去戲院。

我見到戲院入面陸陸續續有人行緊出嚟，同時都有好多情侶手拖手好甜蜜咁行出嚟，貼心嘅男朋友們就為各自嘅女朋友抹眼淚。呢個畫面真係似曾相識，同樣嘅情境，同樣嘅時間。我個心越跳越快，目光不自覺咁望住個女廁。我開咗佢張相，然後咁啱見到有位女職員，就想叫佢幫我睇下晴晴喺唔喺入面。





突然，女廁有人大叫。「唔好呀...真係唔好呀...」我嘅淚水已經奪眶而出，喺手上面嘅手機都跌咗落地。個女職員跑咗過去，而我就一步一步膽顫心驚咁行過去，一直祈求見到嘅唔係夢入面嘅畫面...

我跪咗係地下，雙手抱住訓咗喺地下嘅晴晴，畢生嘅淚水都釋放緊出嚟。我好大力咁摑咗自己一巴，一來想確定到底係咪發緊夢，二來我嬲自己點解咁蠢，咁遲先諗到。我跪咗好耐，喊咗好耐。其實我仲有一絲希望，希望佢即刻醒番，對住我笑，然後同我講只係惡作劇，為咗懲罰我激嬲咗佢又唔氹番佢。好可惜，都只係自欺欺人。