男神呢個稱號令我食左唔少女(有甜）: 重新
我一個人返到屋企，佢地兩個本身想跟埋過黎，但係我話想一個人靜下，我好驚我會見到佢地有人會再離開我。
我打開雪櫃，家姐之前買左好多啤酒，宜家嘅我無問過佢就拎左全部出黎飲，飲完一罐又一罐，我相信自己應該飲得哂。
屋企得返我一個人，Emily同家姐都出左去玩，佢地應該正玩得樂不可支。相反，我就自己一個心如刀割、悲痛欲絕。
眼淚，已經無辦法再流出。心臟，卻依舊繼在跳動。腦海、恨不得一切都只是場夢。手掌，疼痛代表這裡仍是現實。
我：「到底...我做錯左啲咩...？點解...點解個天要我成為一個食家...？點解就唔比我做返一個普通人...？」
即使怨天怨地，都無辦法改變現實，埋怨只會使人後悔，接受只會使人傷心，無視只會使人麻木，內疚只會使人自責。
我：「桐桐...以男...珮恩...仲有你...一個我都唔知應該恨...定係愛嘅女仔...全部都係因為我而死...」
桐桐為左救我...以男為左救我...珮恩為左救我...老師為左救我...全部都係為左救我...點解要為一個罪人而死...？點解佢地要咁傻...？
宜家嘅我，已經黎到接近沮喪絕望嘅邊緣，我只有一個小小嘅心願，我好想死，我好想死，我真係好想死。
當我準備係屋企個窗到跳落去個陣，呢個時候我聽到有人開門，我拎轉頭望一望原來係家姐返黎，佢企左係到呆左咁望住我。
佢用神速一下子將我拉返落地下，就連我反應都反應唔切，我已經比佢成個人壓住左，佢咁樣我先知原來佢都好撚重。
家姐：「你係咪癡撚左線呀？！！邊撚個比你用條命黎玩呀？！！發生咩事呀屌你？！！」
我：「以男...佢...佢為左救我...幫我擋左一刀...最後...最後...」當我一諗起以男訓左係地下個嗰畫面，我隻眼不由自主地流下一滴又一滴嘅眼淚。
我講完佢之後，佢慢慢企返起身，一野將我扔落張沙發到，我都唔知佢咁大力，佢拎左兩罐啤酒坐左係我隔離，比左一罐我。
我：「我係咪好無用...連自己身邊嘅人都保護唔到...我覺得自己...真係好撚廢...」
家姐：「我只係覺得佢地救你一定會有個理由，寧願用自己條命去換你仲可以生存，佢地係幾咁愛你先做得出。」
我：「唔值得...一切都唔值得...我只係一個壞左嘅人...一個無資格比人愛嘅人...一個一早就應該死嘅人...」
家姐：「有時候要判斷一個人仲有無生存嘅價值，並唔係取決於當事人點諗，而係其他人覺得佢應唔應該死。」
我：「咁...咁你覺得我應唔應該死...？」我望住佢好認真咁講。
家姐：「你係我細佬黎，我又點會覺得你應該要死呀？而且你又唔係一個超級衰嘅人，罪不致死囉。」
我一時唔知講啲咩好，只係一直係到飲啤酒，佢可能以為我諗緊野，但係其實我個腦宜家係一片空白。
所有問題都得唔出一個正確答案嘅時候，你會點做？我會選擇逃避問題，所以我決定訓教，希望訓醒就咩都唔記得哂。
老師：「我咪同你講左囉，我地係唔可以愛人或者比人愛架，所以你唔可以愛我架。」佢摸一摸我個頭再講。
我：「但係我真係好鍾意老師你喎，真係一次都唔得咩？我好想同老師你拍拖呀。」我嘗試拖起佢隻手。
老師：「你知唔知個後果係好嚴重架，如果我地愛人嘅話，就無人去處理個樣野架啦。」佢鬆開左我隻手。
我：「我地偷偷地拍拖都唔會有人知架啦，可能咁樣件事會快啲解決呢，唔試下又點知喎。」
老師：「總之你係唔可以愛我，而我亦都唔可以愛你，就係咁簡單嘅一個道理。」
我：「到底點解姐？我真係唔明喎，你又唔講清楚啲，你都要比一個理由我去唔愛你架。」
老師：「燕仔，你要記住，愛我地嘅人，佢地最後全部都會「死」...」
然後，我就醒左，估唔到我訓教居然會夢到我同老師之前嘅對話，我再一次見到佢個樣，雖然只存在於夢境。
張開眼睛，又如何？你已消失在我的生活，我再也無法看見你一面，難怕只是一隻眼，一隻耳，一張嘴，也只會在我腦海回味。
失落，使我流下眼淚。心痛，使我身心受創。死亡，使我悲痛欲絕。以男，使我不甘愛上。男神，使我失去所有。
因為今日仲係放緊假，聽日先返學，為左散一散心，於是我約左阿彥出黎打波。
阿彥：「唔好咁唔開心啦，你諗下佢係上面都唔想見到你宜家咁樣。」如果有人咁樣同你講，你實會想打柒佢。
我：「射下波比我一個人靜下啦。」明明係我約佢出黎，但係我叫佢比我一個人靜下，諗返都覺得好白痴。
不過我射左好多球，無一球係入到，射到心灰意冷嘅我一野將粒波扔落個天到，「Boom！」一聲，唔講仲以為有炸彈爆炸。
我坐左係一邊，只係一直係到飲水唔出聲，一諗起以男我又忍唔住流眼淚，但係我已經唔知自己係流緊嘅係汗水、定係淚水。
阿彥係我隔離，用隻手搭住我膊頭到，盡量去安撫我，好似一個大哥哥一樣，雖然佢真係大過我幾個月。
阿彥：「人生就係咁苦短，日日都會有意外發生，有人死，我地都無辦法避到咁多。」
我：「但係佢可以唔洗死...佢為左救我...次次都係佢地救我...」
阿彥：「佢地都係愛你，唔想你受傷，你應該要感激佢地咁愛你，比你一個機會去重新做人。」
我：「嗯...我明白架啦...你都係想我可以重新出發，唔好辜負佢地對我嘅愛意。」
雖然講就咁講，但係我真係好自責，乜...我仲有重新做人嘅機會咩...？無...一切都已經返唔到轉頭...