男神呢個稱號令我食左唔少女(有甜）: M

第二日我就好早起左身，應該係我中學六年以黎第一次咁想返到學校，六點半就醒左。

訓係我隔離嘅Emily仲訓到成隻豬咁，於是我諗住拍醒佢，佢起身望左我一眼，然後即刻就再訓過。

咁我惟有比佢訓多陣，自己出左去刷牙洗面，抱住一個期望嘅心情去整到自己靚靚仔仔。

我仲整埋兩份早餐出黎，今日個狀態真係特別好，諗到就黎可以解決困擾左我六年嘅野，就算想忍定忍唔到自己個嘴向上勾。

總之搞左一大輪野之後，我就同Emily一齊搭車返學，沿途仲拖下佢隻手仔。



好快我地就行到學校對門口，拍完卡準備行樓梯，並唔係返課室，而係行上八樓到。

不過八樓真係好污糟，都唔明學校都唔諗住清理下用黎做其他野，定係...校長知道呢間中學嘅秘密係八樓到...？所以先唔理佢，為左唔好比人發現。

Emily：「我地真係要行入去...？我想講其實我有潔癖...」佢縮係我後面，好似唔太想入去。

我：「咁一係你係到等我，或者你都係驚嘅就自己返課室先啦。」我行前一步再同佢講。

Emily：「唔好唔好，我企係到等你啦，你快啲睇完快啲出返黎啦。」



然後我就繼續行，八樓同其他樓層唔一樣，只係有三間課室，所以每一間都好大下。

我入到去第一間，我用張紙巾墊住黎試下去開燈，但係理所當然就係無發反應嘅，好彩宜家係朝早有太陽射過黎姐。

入面只係得啲Locker，有一個黑板，但上面全部都係灰塵，真係令人掂都唔想掂到。

如果要我黎形容呢到嘅話，我覺得同啲荒廢左嘅鬧鬼地方差唔多，只不過呢到係一間正常學校。

我慢慢行到去啲Locker到，全部都係開哂嘅，但係無一個係有野係入面，而且周圍附近都無野，所以我諗應該唔係呢一間。



我出返去，Emily就好期待咁問我係咪已經搵到可以走，我只係搖搖頭咁去第二間到繼續探索。

第二間同第一間一樣，都係乜野都無，惟一嘅發現就係有好多隻死老鼠係地下，老實講都真係幾噁心，我聞到陣味都差啲嘔左出黎。

我開始有少少心灰意冷，諗緊其實個嗰女仔係咪到最後都要玩一玩我，臨走之前都要比個惡作劇我。

不過既然都黎到最後嘅一間，都係睇埋先啦，最多咪得個吉，反正我都已經迷茫左六年，唔差在埋之後嘅幾個月。

我行到入去最後嘅一間，上面嘅窗好似比人用啲野封住左，我睇唔到入面有啲咩。

我諗住打開對門，但係鎖住左，不過好彩我識得爆課室啲門鎖姐，所以我好快就搞掂入到去。

我一開就即刻比眼前嘅野令到我呆撚左，我個心宜家好多感覺係入面，驚慌、恐嚇、疑惑、好奇、迷亂，我唔知自己要做啲咩。

因為係我眼前出現嘅，就係個嗰女仔條屍...係邊個...係邊個搬左佢條屍上黎...？



我再睇清楚啲，佢隻手係拎住一張紙，我鼓起最大嘅勇氣去拎黎睇，其實宜家嘅我好想即刻調頭跑走。

張紙寫左好多字，類似一封信咁，而且寫呢張野嘅作者好似一早就預左會有人黎呢到，應該就係比個嗰人睇，又或者可以話係比我睇。

「你好呀，我諗睇呢封信嘅你就係蔡煒燕，又或者燕仔啦何？希望唔係第二個人啦。

我估你會黎呢到嘅原因，係因為下面個嗰死左嘅女仔同你講，呢到有所有野嘅真相。

你宜家嘅心情應該會好複雜，係咪？有好多問題會係你個腦到出現，就睇下我可唔

可以為你解答一部份問題啦，你行到第一個Locker然後打開佢，放心入面唔係裝炸彈。」

點解佢會知係我黎...？而且佢又係邊個...？點解佢好似會知到咁多野...？唔通佢就係訂呢個規則嘅人...？



我跟隨佢嘅指示行到第一個Locker，我想講呢到好乾淨，同正常課室一模一樣，我估應該係佢黎過呢到清理打掃過。

我打開就個Locker，入面有一張紙同一本筆記簿，我決定睇左張紙先再打開本筆記簿。

「呢到應該有本筆記簿，無嘅話就可能比人偷左，到時佢就會知道所有野，希望

唔會發生啲咁嘅事啦不過。你打開本筆記簿嘅第一頁，入面會寫住呢一切嘅背景，

你慢慢睇埋落去，你嘅問題就會慢慢拆解哂，不過惟一拆解唔到嘅，就係我到底

係邊個，我亦都唔會同你講，但係你可以稱呼我做M，M For Mysterious，祝

你好運啦，燕仔。」

屌你咩，臨到最尾都要扮一扮野，中二病咩條友，我係F呀咁，F For Fuck，不過最重要嘅係本筆記簿。



我拎起本筆記簿，上面有少少灰塵，吹一吹就飛走哂，我再次鼓起最大嘅勇氣打開第一頁。

老實講我一打開完，咩都未睇就合返埋，我好驚會出現一啲好恐怖嘅野，而且我未有心理準備去知道真相。

但係我唔黎都黎左，唔通仲有逃避嘅機會咩？學啲On9仔話齋，我黎得呢到就預住無命行返出去，但係我就唔撚驚喎。

宜家嘅我就好似打開潘朵拉嘅盒子一樣，希望入面嘅野唔會令到我有創傷後遺症。