終部曲《你聽說過嗎？莫斯科秘密地鐵》實體化出書: 地鐵失蹤案
彥曦為怕醉酒女走光，用自己的大衣遮蓋住她露出的大腿。
「點解走唔到呢？」Angus認真對待醉酒女的醉話，輕輕拍打她被大衣阻隔的大腿，像哄小朋友般笑著說：「唔好話我知，你哋本地人都信嗰個都市傳說呀？」
他脫下圍巾放到醉酒女腿上，再替彥曦穿回她的大衣。該扮演風度翩翩的時候，他還真的做足。
醉酒女彷彿沒有聽見他的問題，垂下頭像唸經般重覆呢喃：「唔好留喺度⋯⋯唔好搭地鐵呀⋯⋯」
聲音在死氣沉沉的通道裡迴盪，儼如亮起代表危險的紅色信號燈一樣，令我們一時間不懂反應。
她一定還在恍惚狀態才會胡言亂語，為免嚇怕彥曦，我斥責 Angus道：「無啦啦做乜要提恐怖嘢！唔好亂講呀！」
彥曦好奇問他：「咩都市傳說呀，關我哋事嘅？」好吧，我好像低估了她的膽量。
Angus收起吊兒郎當的神情，點點頭，「我嚟莫斯科之前做過資料搜集，網上流傳好多關於地鐵站嘅都市傳說。其中一個好出名，叫做『莫斯科地鐵集體失蹤案』，當時好哄動！」
忽然變得嚴肅，不知道如何辦到，他猛眨眼讓本來的單眼皮皺成雙眼皮，令他看起來更顯認真精明。
彥曦噗嗤一笑，「唔好玩，正正經經講啦！」
「幾十年前某一晚，」Angus凝重地巡視我們，「莫斯科一架地鐵載滿幾百個乘客出發去下一站，本嚟需要十幾分鐘，但過咗半個鐘都唔見架車，甚至無晒信號，憑空消失咗咁⋯⋯」
他說故事技巧不錯，懂得善用表情動作和語氣，把事件描述得很繪形繪聲。
Angus頓一頓，「地鐵公司即刻安排人去搵，過咗幾個鐘，終於發現鐵路隧道入面有條分岔路軌，上面正正停咗嗰架失蹤地鐵！」
彥曦輕呼，「咁入面啲乘客有無講返究竟發生咩事呢？」
他舉起食指搖了搖，「列車上面一個人都無！只有散落一地嘅雜物！件事仲有好多疑點，詳細我唔記得喇，總之架車停喺嗰條分岔路軌，其實係類似密室咁，入咗去好難出返嚟。咁到底裡面百幾個人去晒邊呢？」
「下——！」彥曦瞪大雙眼高聲問：「唔通係穿越時空？」
醉酒女在他們對話期間經已清醒不少，眼神得以聚焦，把我披在她身上的大衣和圍巾穿上。抬臉來回看著 Angus和彥曦。
「或者啦，」他聳聳肩，「呢件事直到今時今日都仲係個不解之謎。大家一提起世界十大神秘失蹤事件，一定會數呢單嘢。」
算不算是職業病呢？Angus和彥曦兩人如此一唱一和，使我有種正在看 Youtube短片的錯覺，也許他們可能考慮跨頻道合拍一輯關於都市傳聞的影片。
醉酒女慢慢站起來順了順裙，似乎想找機會插話。
忽然，Angus湊近彥曦，陰聲怪氣問：「你估下，當時班列車係幾點開出？」
彥曦嚇得後仰，拉開與他之間的距離，「唔⋯⋯唔會係⋯⋯凌晨一點半呀嘛？」
「Exact7ly！」他剎那大聲喊道，嚇了大家一跳，「所以本地人咁夜係唔敢搭地鐵，你見呢度無乜人就知啦！」
不會吧，怎麼可能如此巧合？
「假㗎。」焉然，醉酒女鐵定地說。
她雙目有神地打量我們，「呢個故事係憑空捏造出嚟，喺莫斯科瘋傳過一排，我哋當笑話咁聽。」
她的酒氣總算完完全全退去了。以我所知會說英語的俄羅斯人不多，她說得算蠻流利，果然是當 CEO的材料。
她把圍巾還給 Angus，語間沒有怪責他亂說的意思，皺起擔憂的眉頭解釋道：「莫斯科地鐵站與站之間無可能搭十幾分鐘咁耐；仲有，根本搵唔到任何新聞報道過呢件事，如果有幾百人失蹤，當時點可能無傳媒報道過呢？」
「我都覺得假假地，」冷不防 Angus爽快承認，儼如提出這個都市傳說的人不是他似的，「而且架車係一點半開出呢點，係我自己加上去㗎。」他再度乾笑，狀極似隻咧嘴笑的狗在擺尾。
彥曦露出憐憫的表情，提醒 Angus，「你唔好再咁樣傻笑喇，好似傻仔呀。」她故意補充道：「雖然你係。」
說得好！
大叔打量醉酒女，猜疑地問：「小姐，咁點解你話唔好落去搭地鐵、話唔好殺你呀？」他似乎習慣稱呼女士做「小姐」，之後他同樣稱彥曦為「小姐」。
=待續=
如果想睇多少少故事提過嘅「莫斯科地鐵集體失蹤案」，可以去在下 IG story望望~
👇Instagram: greenizmstory👇
https://www.instagram.com/greenizmstory/
👇Facebook: 橘子綠茶👇
https://www.facebook.com/greenizmstory