《夾出一個她》: 第十集-平安夜不平安（中）
阿妹：「呼！好飽吖！」
-
我：「食飽飯不如玩個遊戲？」
-
楚翹：「好！玩咩先？」
-
阿妹：「唔使問阿貴，梗係猜包剪揼啦，輸咗嗰個洗碗。」
-
我：「冇錯！」
-
楚翹：「嚟啦！驚你啊！」
-
「包剪揼」
-
我：「哎頂！輸咗㖭！肯定你兩個夾埋嘅。」
-
楚翹：「夾埋又點吖！願賭服輸，你去洗碗啦！」
-
我：「聽日你哋就知死。」
-
阿妹：「話知你吖！拿拿淋去洗碗啦！」
-
我：「哎！啲女人真係好古惑。」
-
「講咩吖你！」
-
佢哋兩個突然異口同聲，我嚇到標一標冷汗。
-
我：「冇…冇嘢吖，我而家去洗碗！你哋兩位千金公主休息下啦！」
-
死喇死喇，屋企最大嘅地位開始不保，我好似由一家之主變成一家之「煮」，係吖，煮飯佬嗰個煮。
-------------
我：「啱先洗碗，聽到你哋兩個雞啄唔斷，究竟喺度傾啲咩吖？」
-
阿妹：「八卦！我哋Ladies talk關你咩事吖！做你嘅洗碗佬啦！」
-
我：「歐陽蕊心，你越嚟越大膽喎。」
-
阿妹：「邊夠你大膽吖！帶個女朋友嚟屋企，仲要長住㖭！」
-
楚翹：「喂喂喂！我幾時有話我係浚彥女朋友先？」
-
阿妹：「唔知吖、我唔清楚、我唔知、我唔理。」
-
楚翹：「浚彥吖！同你講聲先，聽日我同阿妹去行街，你煮定餸等我哋喇喎。」
-
我：「是但你啦，聽日你哋幾點返嚟？」
-
阿妹：「大概夜晚6點到啦！」
-
我：「咁聽日就整牛肉飯啦，啱先聽咗楚翹話食意大利燴飯，聽日就食牛肉飯啦。」
-
阿妹：「阿哥，雖然我想食牛肉飯，但冇理由平安夜食牛肉飯㗎？都冇氣氛嘅？」
-
我：「咁食咩吖！」
-
楚翹：「你決定啦，大廚！」
-
阿妹：「係囉，大廚，邊有大廚要食客自己諗食咩㗎？」
-
我：「咁聽日我自己發板啦，就一人一碗餐蛋麵啦！」
-
楚翹：「你係咪唔識寫個死字？」
-
我：「問你，你又唔俾意見，咁你想點？」
-
「吖！」
-
阿妹：「呢一巴，係令你知道身為男人嘅你，聖誕節係要為我哋兩位千金負責嘅。聽住，我唔要食頹飯，更加唔要餐蛋麵，知唔知？」
-
我：「奴才遵命。」
-
阿妹：「算你啦！」
---------------
阿妹：「阿哥，我出門口喇！」
-
楚翹：「我走喇！」
-
我：「路上小心喇！」
-
話咁快，今日已經係平安夜。佢哋兩個走咗冇耐，我都出咗去太古城Leon買今晚晚餐嘅食材、買交換禮物嘅禮物，仲有去便利店買最重要嘅…
-
「先生，麻煩出示身份證吖！」
-
我：「好吖，冇問題。」
-
「先生多謝你$72.1。」
-
我：「Master吖，唔該！」
-
大家唔好心邪，我唔係買condom，我係去買啲啤酒，大家今晚啤啤佢啫。放心，我正人君子嚟，我唔會搞3P嘅，亦都唔會亂倫。倒返轉諗，我俾便利店啲員工查牌係咪證明我好後生呢？
-
返到屋企，第一時間打開YouTube，煲一煲《霍哥廚房》先。
-
「哎！歡迎各位嚟到霍哥廚房，今集嘅女嘉賓…」
-
頂你個肺，又有切洋蔥兼抽水環節，羨慕死啲單身狗。
-
無可否認，《霍哥廚房》煮啲餸又簡單，又有睇頭，今晚嘅餸菜都係參考《霍哥廚房》。
----------------
楚翹：「我返嚟喇。」
-
阿妹：「嘩！好豐富吖！」
-
我：「使乜講，今晚晚餐犀利喇！有南瓜湯、有焗牛仔骨啦、有火雞、有千層麵、仲有甜品㖭！」
-
楚翹：「啲裝飾好靚吖！好有聖誕feel！」
-
我：「你鍾意嘅，以後年年都整俾你。」
-
楚翹：「你講㗎，應承我先。」
-
我：「好！我應承你。」
-
阿妹：「喂！兩位情侶唔好放閃，就嚟閃盲我喇！」
-
「邊個話我哋拍緊拖！」
-
［我哋兩個竟然異口同聲吖！］
-
楚翹再次紅都面晒，我feel到我塊面都好熱，唔通呢啲就係愛？
-
（待續 To be continued）
IG：chingchingstory