我地既相識紀念日就係結婚紀念日

唔知大家信唔信一見鍾情？好老實，我自己以前都唔信。我以前覺得見一眼最多都係有基本既好感，無咩可能一下就話鍾意左一個人。不過三年前發生左一件事，徹底改變左我呢個觀念，甚至可以話改變左我既一生。

2017年2月12號，本身對我黎講平平無奇既一日。呢日唯一比較特別既係我約左人唱K。係呀，對於毒撚黎講去唱K已經算係特別節目黎架啦。而且今次並唔係普通既唱K，今次唱K竟然有女！你試下想像下中學讀男校，成班麻甩仔逼埋係一間細K房度用人妖咁既聲線唱Neway熱唱榜d男女合唱歌既日子，你就會明我係幾咁興奮。

咁你都知我以前讀男校，身邊成班都係男性朋友，又係死毒撚一條，咁點解會咁好彩有女同我唱K呢？理由好簡單，因為班女根本唔係黎為左同我唱K。我有個中學老友，咁多年黎一直傻下傻下，係圈子入面負責搞笑搞氣氛既角色。以為佢一直都唔會出pool啦，點知佢叻仔呀，俾佢溝到個空姐，脫毒成功。不過呢個老友真係唔話得，自己脫左苦海，佢竟然仲會擰返轉個頭望下尚係度浮沉緊既兄弟，然後伸出援手！佢叫佢女朋友介紹女仔俾我地！如果我有份，我一定提名佢攞諾貝爾和平獎。如果我係教宗，我一定會將佢封聖！

就係咁，一場聯誼味甚濃既唱K聚會就約定左。而我當中倒塔咁早已經起左身，Jer定個靚頭，換好左一身斯文look，戴埋副黑色仿木粗框眼鏡，誓要留個好既first impression 俾班女女。心急既我就好比早起既鳥兒，雖然未知有無蟲吃，但都比約定時間早左差唔多半個鐘到達目的地。我係第一個到，緊隨我後面既係我另一個中學同學L，同埋佢既女朋友。係呀，你無睇錯，的而且確係女朋友。呢個又係一個出左pool既死仔。咁我同佢打招呼既同時，發現左有d野唔對路 - 點解佢帶住兩條女黎既？仆你個街一皇二后！？

L：我同你介紹，呢個係我女朋友C。呢位係佢家姐。





哦，原來係家姐。咁由於我都係第一次見我L既女朋友，所以都好自然望多兩眼。嗯，無咩特別。跟住我就將視線轉過去家姐嗰邊啦。嘩，我feel到我個心突然用力跳左兩下。呢個家姐絕對唔係你想像中嗰種成熟中女feel既大姐姐，但又唔係好細路女好𡃁妹嗰種。佢係可愛得黎又唔會令人覺得幼稚，生同熟平衡得恰到好處嗰種女仔。我唔係好識反應，淨係隱約聽到佢同我打招呼，就好生硬咁同佢say左個hi。我呢一刻覺得，陣間就算有100個空姐黎都已經唔重要。

係基本既招呼之後，我同家姐就無再交流。鬼咩，毒撚邊敢亂咁同人講野。不過我一直都暗中留意住家姐。我都講唔上原因，淨係覺得佢有一種吸引力拉扯住我既視線。所以我地點樣入房，其他人幾時黎，我已經無咩印象了。