野味小精靈: 準備

「哈......」樂樂抱住我同謎擬Q成功逃跑，跑到出去已經喘曬氣。

雖然許諾言剛才幫樂樂爭取到唔少逃跑嘅時間，但樂樂身為一個女仔，喺體能上都有些小輸蝕。而且仲要抱住我同謎擬Q，身後好快就出現唐澤追上嚟嘅身影。

樂樂嚇到即刻加快腳步，轉彎跑到附近嘅兒童公園，爬入滑梯上邊嘅隧道匿埋。

唐澤都加速追上去，但一轉彎已經唔見咗樂樂嘅身影。佢知道樂樂一定喺附近，所以煩躁咁揉亂自己嘅頭髮，唔耐煩咁講：「許忻悅！我知你喺度，快啲出嚟！」

樂樂聽得出唐澤嘅語氣好嬲，聽到佢叫自己全名嘅時候，自己都嚇一嚇，更加唔夠膽出去。





「喂！好啦喎！我唔知我個妹得罪你啲咩，但唔該你對住女仔啲態度好少少啊！」許諾言一直跟住唐澤身後，一齊追到呢度。

「許忻悅係你個妹？」唐澤詭異咁望住眼前嘅一團黑影。

唐澤的確係有少少靈感，但佢睇唔清靈體嘅真面目，所以對許諾言講嘅嘢充滿懷疑。

「係啊......我係佢阿哥，許諾言。」許諾言大約解釋自己嘅身分。

「哈哈......哈哈哈哈......我今次真係俾你兩兄妹玩死啊！」唐澤聽完之後，語氣開始有啲自暴自棄。





「咁到底發生咩事啊？」許諾言皺住眉，忍住心裡邊嘅煩躁，佢真係好唔鍾意人用呢個語氣講嘢。

「發生咩事？問你個妹啦，我都想知發生咩事啊！」唐澤講完之後，佢哋雙方都陷入沉默。

樂樂聽到外邊好似有嘈交嘅聲，所以偷偷伸出頭偷望外邊嘅情況。佢居然發現唐澤自己一個人，對住空氣自言自語。

樂樂見到之後，諗起唐澤今日嘅行為同說話都好古怪。佢越諗就越覺得可怕，抱緊我同謎擬Q，對我哋自言自語：「唐澤佢會唔會係痴咗線啊？」

唐澤冷靜過後，終於打破沉默：「總之樂樂......你個妹咁突然要搶返小精靈走，一定係遇到咩危險或者危急嘅事，所以先會咁。」





「我都識咗許忻悅一段時間，大約都了解佢嘅性格。衝動魯莽，而且佢一定會怕連累人，將危險嘅事自己攬曬上身。」唐澤慢慢咁回想住，慢慢咁講。

唐澤對住衝動嘅樂樂其實一直都覺得好無奈，如果呢個靈體真係樂樂個哥，應該會更加可以理解。

「如果真係遇到危險嘅事，佢自己一個一定處理唔到。所以我追上嚟並唔係要阻止佢，而係要幫佢。」唐澤呢句說話唔單止係對許諾言講，更加想喺附近嘅樂樂都可以聽到，乖乖地出返嚟，解釋返到底發生咩事。

樂樂聽到唐澤嘅說話之後，內心都開始動搖。

的確，自己又衝動而且好蠢，自己一個未必可以救到黃思。

樂樂慢慢咁抱住我同謎擬Q，喺隧道爬返出嚟。佢爬到滑梯上邊，好似做錯事嘅小朋友咁低住頭，輕聲叫前面嘅男仔：「唐澤......」

「樂樂！」唐澤終於見到樂樂，即刻緊張咁走過去。

因為黃思嘅事，樂樂自己一個驚咗好耐。見到唐澤原來一直都幫自己，關心自己。委屈嘅眼淚就忍唔住一滴一滴咁順住臉頰流落嚟，滴落我同謎擬Q嘅頭上面。





我好奇咁抬起頭，純淨嘅雙眼清晰咁倒影住，喊到有啲狼狽嘅樂樂。我擔心咁用頭頂嘅毛髮幫佢輕輕擦一擦佢嘅臉，安慰佢。

「乜你咁易喊嫁......」見到流淚嘅樂樂，唐澤好無奈同苦惱，因為佢根本唔善長去安慰其他人。

「最衰都係你，咁惡兇人哋女仔。」許諾言喺旁邊幸災樂禍。佢其實唔係唔想幫手安慰樂樂，但樂樂根本聽唔到佢把聲。

唐澤覺得許諾言所講嘅都唔係冇道理，於是順住滑梯旁邊嘅柱，爬到上去滑梯上邊，坐喺樂樂身邊，嘗試氹佢：「好啦好啦，我以後都唔再兇你。你同我講到底發生咗咩事，我一定會幫你。」

「都係因為我，累到油油佢俾人捉咗......」因為好驚黃思嗰邊嘅情況，樂樂嘅身體忍唔住抖震，聲音都越講越細聲。

「你冷靜啲先，試吓講詳細少少。」唐澤盡量俾足耐性去聽樂樂講。

「有人要捉我，但佢哋以為油油係我，所以捉錯人。佢哋最終嘅目標係謎擬Q，為咗救返油油，我真係冇辦法先咁做。」樂樂內疚咁摸一摸謎擬Q個頭，抱緊佢：「對唔住啊，謎擬Q。」





謎擬Q無辜咁擺一擺頭，好似完全聽唔明佢哋嘅對話咁。但更加似聽得明，但依然順從樂樂佢哋嘅安排，乖到令人心痛。

「唔好咁悲觀住，仲有其他方法嘅。有冇話幾點前要交謎擬Q俾佢哋啊？」唐澤拎起手機開記事簿，記低重點。

「今晚六點，佢哋話五點左右先通知我地址。」樂樂不安咁講。

「而家都就快天光啦，樂樂你返屋企休息吓先，小精靈就暫時交返俾我。你唔洗擔心太多，我會諗辦法。」唐澤安撫咁拍一拍樂樂個頭。

「好，麻煩你啦。」唐澤係唯一一個知道小精靈存在嘅隊友，所以樂樂而家只能夠相信同依靠佢。

「唐澤，你計劃好點做啊？」許諾言對而家嘅情況依然一頭霧水。但自己個妹好似遇到危險，而唐澤又係唯一一個幫到手嘅人，許諾言唯有暫時相信佢。

「光明正大咁跟過去就冇可能嫁啦。雖然暫時未知地點，但佢選擇嘅位置應該都會比較偏僻，又近住大陸，類似新屋嶺位置。」唐澤打開Google map睇，記低幾個比較大機會嘅位置。

「新屋頂？」許諾言第一次聽呢個地方名，一時間都聽得唔太清楚。





「你未聽過？介唔介意講我聽，你係咩日子死？」基本上上年9月之後，香港人都會聽過新屋嶺呢個地方。新屋嶺，都可以算係所有香港人嘅惡夢。所以唐澤見許諾言唔知，都有啲驚訝。

「我都唔知道，感覺前一秒仲在生，下一秒就上咗你身，之後就發現自己變咗鬼。」就算到咗呢一刻，許諾言依然覺得好唔真實。

「唔緊要，我之後再慢慢同你講返今年發生嘅事，你再睇下自己邊段時期開始冇印象。」唐澤打斷許諾言嘅思緒，因為而家有更加重要同危急嘅事要處理。

「總之諗埋最壞打算，到時信號、GPS、一啲偷拍或者錄音裝置都未必用到。我又冇辦法跟埋去，到時要靠哥哥你跟住樂樂，去保護佢。」唐澤認真咁望住眼前嘅一團黑影。

「你叫我哥哥......」俾一個陌生人叫自己哥哥，許諾言有啲無奈。

「哥哥你除咗可以上身，仲做到啲咩啊？」唐澤覺得自己呢方嘅底牌仲未夠，面對實力深不可測嘅對手，呢邊嘅勝算連一成都未必有。

但許諾言嘅出現對唐澤嚟講係一個意外，運用得好嘅話，勝算就會增加。





「唔清楚......我都係誤打誤撞先上咗你身，我自己都唔知發生咩事。」許諾言一臉迷惘，好似咩都唔知同唔清楚咁。

「放鬆啲，你總有你嘅用處嘅。既然係咁，你就幫手睇住樂樂。有咩事就即刻搵我通知我，我會盡量試吓跟唔跟到你哋。」唐澤安慰佢。

「而佢哋暫時好似冇提過比卡超，目標應該都只係謎擬Q。所以謎擬Q你就跟住樂樂，到時隨機應變。而比卡超就做底牌，跟住我。」唐澤轉身對我同迷擬Q講。

之後唐澤拍一拍我哋嘅頭，鼓勵我哋：「你哋兩個都要加油，安全返出嚟，就請你哋食好嘢。知道嗎？」

「比卡！」「謎擬Q。」我用謎擬Q異口同聲咁講。

「真係神奇啊......」許諾言一臉好奇咁望住我同謎擬Q。

我對呢個陌生嘅靈體有啲恐懼，所以將自己嘅身影匿埋喺謎擬Q後邊，用無辜嘅大眼偷望佢。

「我都覺啊......」唐澤專心睇手上嘅文件，所以都係心不在焉咁回應。

「你唔休息吓先？」許諾言見識到工作狂狀態嘅唐澤，都有啲膽心佢嘅健康。

「而家冇時間瞓覺。」唐澤雙眼專注咁望住電腦螢幕，完全唔轉移目光。

「喂，你真係好勁喎。」許諾言探頭過去，八卦吓佢手上嘅資料。

「還好，不過越接近真相就會越危險。」唐澤都只係根據上次喺狗屋聽到嘅人名，用些微嘅資料追查到呢一步。

辛先生呢個人，已經可以確定係大陸知名嘅生物學家。而且睇返之前P4研究室嘅報導，都出現過佢嘅名。

雖然冇足夠証據証明比卡超同謎擬Q係嚟自武漢研究所，但呢個叫辛先生嘅人親自嚟香港，又派咁多人手搵謎擬Q，就足夠証明謎擬Q身上有佢哋重大嘅秘密。

唐澤都估唔到佢哋咁快就查到樂樂身上，而樂樂嘅朋友唔好彩俾佢哋認錯捉走。

有網民喺遠距離咁啱影到黃思被人捉走上車，雖然張相影得好模糊，但黃思被捉嘅時間同地點都吻合。放上網之後，大量嘅網民都幫手去追查。佢哋查到車牌「RB 7639」嘅狗車，好大機會就係捉走黃思嗰架。

唐澤知道車牌之後，都事不宜遲。佢匿名喺網上留言，慫恿佢哋幫手去查而家架車嘅去向。果然人多好辦事，網民好快就查到架車而家停泊咗喺邊界區警察總部門口，近住新屋嶺。

呢個位置其實好危險，好偏僻，收唔到信號。而且又近住大陸，但佢哋而家目的都係捉返謎擬Q返上去，所以都並唔意外。

「出發啦！」唐澤拎起自己嘅背囊，叫謎擬Q同我入埋去。

「吓？而家先朝早7點炸喎，而且你真係唔洗瞓吓啊？」許諾言擔心咁望住唐澤。

「我上車瞓。」唐澤無所謂咁講，佢做得做得記者，其實都習慣咗長期喺車度瞓，佢甚至覺得喺車瞓舒服過喺自己張床。

每次出去做嘢，如果有一定危險性，唐澤都會打電話俾同事交代清楚先，而呢次可以話係咁多次裡邊最危險，都令佢最驚嘅一次。唐澤怕自己返唔到嚟，所以拎起手機嘅一刻，都有少少猶豫打唔打電話好。

唐澤拎起手機，設定時間send msg俾同事。佢並唔想連累班同事，但如果過咗聽朝6點自己都未上水取消msg，就証明自己已經有危險。唐澤會將自己辛苦搜集返嚟嘅所有資料同証據都send俾同事，代替自己公開俾全世界知。