野味小精靈: 上身
「小姐！我而家對你作出第一次警告，你再唔離開就屬於阻差辦公啊！」幾個軍裝警圍住個女仔，大聲恐嚇佢。
但女仔冇理佢哋，企喺原地，用佢瘦弱嘅身軀阻擋住班軍裝警拆花壇。
旁邊嘅唐澤一眼就認出個女仔上次喺醫院見過，為咗樂樂而威脅佢嗰個護士。唐澤雖然有啲驚訝，但都冷靜咁打開直播拍住現場情況。
唐澤覺得個頭有少少痛同暈，佢用力咁搖一搖頭，迫自己精神集中返。自從831事件之後，佢感覺到太子站內嘅陰氣重咗好多，每次路過都覺得好唔舒服。
唐澤自細都有少少靈感，只係感覺到，但睇唔到。對上一次樂樂差啲俾車撞，佢睇到謎擬Q嘅大手保護樂樂。當時有一刻，佢以為自己終於都見到鬼。
其中一個軍裝警開始唔耐煩，拎起胡椒噴霧，開始上下搖晃。女仔戒備咁望住佢，但依然唔肯讓開。現場氣氛都開始緊張，為個女仔擔心。
唐澤轉注咁影住前面嘅情況，突然見有一個黑影喺鏡頭閃過。但實在太快，快到唐澤以為自己眼花，而冇去深究。
「啊！」防暴對準女仔嘅臉，噴胡椒噴霧。女仔痛苦咁尖叫，四肢冇力咁倒地。但黑警依然冇放過佢，向住佢嘅臉狂噴胡椒噴霧。
唐澤原本仲專心咁錄影住，突然見到有個黑影向佢嘅鏡頭直衝過去。佢感覺一陣強風向佢撲臉而嚟，然後就眼前一黑。
「呃？」當'唐澤'再次抬起頭，佢嘅眼神有啲迷惘。
但當見到前面被軍裝警不停噴胡椒嘅女仔，'唐澤'即刻掉低正喺度直播嘅手機。
「砰！」
手機螢幕一落地，即刻碎出幾條嚴重嘅裂痕。
'唐澤'衝埋去個女仔度，伸出手，將佢拉起，拉到自己懷裡保護住。任由黑警向自己嘅背脊狂噴胡椒噴霧，都堅持帶住女仔快步離開。
「陳韻悠！」走出咗班黑警攻擊範圍之黎，'唐澤'微微推開懷裡嘅陳韻悠，想睇睇佢嘅情況。
'唐澤'自己都中咗唔少胡椒，所以根本擘唔開眼。中咗椒嘅皮膚同眼都火辣辣，好辛苦。
當被'唐澤'抱住嘅一刻，陳韻悠突然覺得呢個懷抱同場景都好熟悉。
陳韻悠中咗大量胡椒，根本冇可以睇到對方係邊個。而且自己又開始出現過敏反應，皮膚發紅，好似俾火燒咁。四肢冇力，想大口大口呼吸，可惜做唔到。
聽到對方叫自己個名，陳韻悠有啲迷惘，勉強用最後一口氣，輕聲叫出一個已經離開咗嘅人名：「許諾言......」
「唐澤！你哋冇事嗎？」樂樂執返起唐澤直播中嘅手機，跑過去睇佢哋嘅情況。
剛才樂樂見到唐澤突然掉低手機嘅一刻，佢都覺得好驚愕。
「阿悅？」聽到熟悉嘅聲音，'唐澤'微微抬起頭，但被胡椒噴霧噴到嘅雙眼，根本擘唔開，表情好痛苦。
樂樂聽到'唐澤'對自己嘅稱呼之後，有啲失神。
「我幫你哋沖眼先。」黃思喺背囊拎一支水出嚟，小心翼翼幫中椒嘅兩人洗眼，FA都走過嚟幫手處理。
但陳韻悠依然出現過敏反應，難以呼吸，痛苦咁瞓喺地下。剛才中咗胡椒嘅皮膚，已經發紅發熱。
「白車好快到，個女仔有冇熟人可以跟埋車啊？」FA見'唐澤'咁緊張，以為佢係陳韻悠嘅熟人。
「我識佢，我可以跟車......」'唐澤'講到一半，衫角就突然被樂樂拉住。
「阿悅？」'唐澤'奇怪樂樂點解中斷佢。
「咁你嘅直播點？」兩邊嘅直播都俾樂樂暫時暫停咗，處理咗眼前情況比較優先。
「直播？」'唐澤'表情迷惘，完全未搞清楚情況。
「當然！你係new新聞記者啊！」樂樂難得見'唐澤'咁唔專業，有啲嬲，想一拳打醒佢。
樂樂將唐澤嘅手機塞返落佢隻手，拖住黃思轉身離開。
'唐澤'接過手機，下意識低頭一望。黑色嘅屏幕倒影住一個陌生嘅臉，令佢嚇一跳。
“我......係邊個？”
「呃......先生，如果你唔方便，我可以搵一個FA去跟車。」FA見'唐澤'呆滯咁企喺原地，於是鼓起勇氣打斷佢嘅思緒。
「嗯......麻煩你哋啦。」'唐澤'將陳韻悠交俾FA照顧之後，就跑上前線搵返樂樂佢哋。
樂樂見'唐澤'居然追過嚟，感覺佢由剛才開始就變得好奇怪。
「哼！雖然唔知你做咩跟住我，但我哋兩個之間除咗小精靈，真係冇咩好傾。」為防黃思同四圍嘅人聽到，樂樂扯一扯'唐澤'隻手，示意佢低頭，然後喺佢耳邊細細聲講。
「小精靈？」'唐澤'嘅表情好疑惑，暗地裡思考住小精靈係咩嚟。
「唔好扮傻啦，既然你冇諗住俾返我，就唔好嚟搵我。」樂樂仲未嬲完唐澤，啖氣仲卡喺喉嚨，冇法發洩出嚟。
「好，我還返俾你。」'唐澤'冇所謂咁講，佢以為小精靈係類似毛公仔咁嘅死物，而呢個身體嘅原主人借咗阿悅嘢唔還。'唐澤'由短短幾句對話，猜測而家嘅情況。
「吓？認真咩？」樂樂震驚咁望住眼前呢個善變嘅男人。
樂樂覺得眼前嘅'唐澤'真係好古怪，明明之前仲死都唔肯還返比卡超同謎擬Q俾自由。
而且'唐澤'嘅動靜同神情都好古怪，但邊一方面古怪，樂樂一時間又睇唔出。望佢嘅眼神好溫柔，而且夾雜住複雜嘅情緒。樂樂雖然睇唔透，但總覺得感覺好熟悉，令人安心。
「一言為定！你唔好諗住反口啊！」樂樂怕'唐澤'反口，所以就算有幾古怪，佢都決定要返兩隻小精靈先。
「唔會反口。聽日拎俾你？」'唐澤'溫柔咁拍一拍樂樂嘅頭。
「好！」樂樂自然咁接受'唐澤'嘅接觸，兩個人之間流露出溫馨嘅氣氛，連佢哋兩個都冇發覺。
黃思下意識越行越慢，將前方嘅位置留俾佢哋二人世界。佢覺得自己好似做咗電燈膽，好尷尬好唔自在。
「油油，你做咩？要行快啲啦。」樂樂突然發覺黃思越行越慢，好似已經開始脫離自己同'唐澤'。
「樂樂，呢個係你男朋友啊？我會唔會阻住你哋......」黃思有啲尷尬咁傻笑。
「唔係！我同唐澤只係普通朋友。」樂樂臉同耳仔都紅曬，有啲激動咁否認。之後拖住黃思嘅手加快步速，掩飾自己加快嘅心跳。
'唐澤'聽到之後反而冇咩特別嘅反應，因為佢根本唔係真正嘅唐澤。佢都加快腳步，跟上前方兩個女仔。
「唐澤，差唔多要開直播啦。」樂樂臉仲有啲紅，盡量扮到語氣正常，扮到剛才嘅事好似冇發生過。
「直播？」'唐澤'拎起自己胸前嘅記者証，先意識到自己而家係個記者。
記者証中嘅男仔叫唐澤，頭髮有啲天然卷，所以顯得有啲亂。
“我......係邊個？”
「啊......」'唐澤'覺得自己個頭一諗嘢，就開始好痛。痛楚令佢有啲承受唔到，痛苦咁抱住頭，跪喺地下。但佢冇停止去回想，佢好心急想知道而家係咩情況。
「發生咩事啊？唐澤！唐澤！」樂樂緊張咁蹲下身，睇佢嘅情況。
“我唔係唐澤......我係......許諾言......”
“我記起啦！全部記起......”
'唐澤'雙眼恢複清明，心裡面好激動，抖震咁抬起頭，望住睇前嘅妹妹。
「唐......」樂樂被佢熱切嘅眼神望到有啲心慌，未開聲講完，已經被'唐澤'抱到懷裡。
「阿悅，我返嚟啦。」'唐澤'緊緊咁抱住樂樂，怕再一次失去。
樂樂其實應該推開'唐澤'，但佢並冇咁做。淚水唔知點解，默默由眼眶流出，完全控制唔到。
「呃......」
旁邊嘅黃思尷尬開聲，先將樂樂驚醒。樂樂推開'唐澤'，同黃思一齊快步離開。
'唐澤'只係望住樂樂嘅背影，冇再追上去。直到佢嘅電話響起，先回過神。
「喂！唐澤你去咗邊啊？冇事嗎？要我嚟搵你？」唐澤嘅同事喺另一邊開直播，睇留言先知唐澤出咗事。
「......」'唐澤'有啲迷惘，聽到一連幾個問題，都唔知點答好。
「你嚟搵我啦！我剛到咗太子站出口，你過返嚟啊。」同事未等佢回應，就趕住收線，繼續返自己嘅工作。
'唐澤'唔太清楚呢個身體嘅主人，而家要做咩工作，唯有跟返實佢嘅同事。
到咗太子站黨鐵出口之後，'唐澤'更加迷惘。佢見到好多人，但根本唔知邊個先係呢個身體主人嘅同事。
「唐澤！你搞咩啊？」同事喺'唐澤'身後，用力咁拍一吓佢嘅背脊。
「好少見你咁失魂喎，我哋今日一齊直播啦。」同事覺得今日嘅'唐澤'好古怪。呆呆滯滯咁，剛才自己企正喺佢面前都見唔到。
「唔好意思，今日有啲唔舒服，麻煩你啦。」'唐澤'微笑住，好客氣咁對同事講。
同事聽到之後難以置信咁望住'唐澤'，眼神好似發現一隻大怪獸咁。見'唐澤'對自己無奈又溫和咁笑，佢就覺得更加大壓力。
今日班黑警依然瘋狂，而且好驚險，好彩黃思同樂樂都冇受傷。而示威者已經散得七七八八，佢哋都熄咗直播準備返屋企。
「油油，幫我睇住啲嘢啊，我去個廁所先。」樂樂除咗自己個記者証，順手就掛喺黃思條頸，然後將個背囊交埋俾佢。
「好啊。」
黃思坐喺廁所附近嘅石壆，乖乖地碌住手機，等樂樂出嚟。
突然有兩個男人行到黃思面前，黃思都下意識抬起頭，佢哋問：「你好，請問你係唔係連登直播嘅記者許忻悅啊？」
「嗯......」黃思知自己仲掛住樂樂嘅記者証，唔想解釋太多，所以就含糊咁回應。
「哈哈，係啊？」其中一個男人笑一笑，之後快速咁喺衫袋拎出一條手巾，掩住黃思嘅口同鼻。
「啊......」
黃思想尖叫求救，但已經趕唔切。喺手巾掩住佢口鼻嘅一刻，佢嘅身體瞬間變得酸軟冇力，連個腦都思考唔到。
「真係順利。」另一個男人都笑住回應佢嘅同伴。
“救命......邊個可以救我啊......樂樂......”
兩個男人扶住黃思，上咗附近一架私家車。其間四圍都冇路人，黃思唯有一直望住女廁門口，希望樂樂出嚟救佢。