「就係咁，我同咗李白拍拖？」: 第一章「係吖穿越吖」

「我本楚狂人，鳳歌笑孔丘。 」
‌
‌啊！！！佢到底想表達啲咩情緒呀！！！
‌
‌呀~大家好我係李楚楚,係一個中五嘅文學生。今年16歲，A0，目前看破紅塵中。之所以會成仙，係因為呢個世界上有太多溝仔攻略嘅存在。例如無論係秒讀定遲讀都可以推理成佢好在意你同佢想保持神秘感比你，最後都等於佢鐘意你（亦因為咁我每次都會錯意）
唉，傷心嘢唔講啦。如你哋所見我而家最大嘅難題就係我眼前呢一份功課，其實呢我覺得呢...個詩人根本就冇表達啲咩情緒，純粹係呢個世界上有一種叫文學家嘅職業為咗自己份人工，而家夾硬屈個詩人畀啲情感佢。
‌即係好似網上面流行嗰幅圖咁呀，作者用藍色嘅窗簾表達自己悲傷嘅情緒。係喺作者嘅心目中可能嗰幅真係一幅藍色嘅窗簾呢。
‌而呢個理解情緒嘅部分每次都成為咗文學生同埋中文卷最厭煩嘅部分，大部分文學生讀到最後其實就已經完全唔鍾意文學，反而係一見到啲詩人就想喊出嚟。
‌因為咁呢位李白先生已經對住咗我兩年，呀！唔係計埋之前嘅11年免費教學，佢總共對咗我十年有多。我諗我對佢嘅認識程度（仲有對佢啲詩嘅幻想程度）應該仲多過佢。
‌我啲朋友成日都開玩笑咁問我，你對咗李白咁耐，會唔會已經情不自禁愛上咗佢。我同你講一定唔會，假設你係理科生你會唔會對啲化學品有感情呀，你會唔會愛上啲元素啊。假設你係商科生，你會唔會愛上錢呀... sorry呢個例子好似唔係好啱。其實我想表達嘅係總之就唔會啦，同埋就算會產生感情都好我都會係憎李白多啲囉...




‌其實呢...同你講吖我成世人最後悔嘅就係一開始選科嘅時候揀咗文科，每日望到理科同商科嗰邊啲情侶成雙成對咁樣行出行入，話唔羨慕都一定係假㗎。再望一望自己文科入面，成班都係女仔...我對得最多嘅男人仲要係個仙遊咗嘅人，看破紅塵喎...
‌
如果可以我一定要親口叫李白寫多篇解釋，話畀後世嘅所有文學家知佢冇諗過任何嘅多餘嘅意義！
如果可以我想要個男朋友...

［天：放心啦細路我已經收到你嘅旨意㗎啦
#李白#親口#男朋友］

係囉，諗諗下我就瞓著咗喇
一醒返，同所有穿越小說嘅開頭一樣。我係一個陌生嘅房間嗰度...




房入面嘅佈置好古風，理所當然咁樣我梗係會學穿越小說嘅主角懷疑下自己係咪入咗喺個真人show入面啦，咁我發現唔係之後呢就為下自己係咪發緊夢啦。
咁發覺兩樣嘢都唔係喎，作為一個文學生兼一個小說愛好者我係非常容易咁樣接受自己穿越咗㗎。但係循例上都要扮下...

吓咩話？？？？我真係穿越咗唔係啩，咁呢個係咩朝代，我係魂穿定成個人穿咗過嚟呀！咁我啲功課點算呀！我仲未搵到男朋友㗎！！！

「姑娘，你醒啦？」

「吓！你係乜水呀」

「姑娘，你欲喝水？」





係喎呢度古代嚟㗎喎，平時講開啲話唔work㖭唉今次幣啦...好彩我都有少少文學嘅知識旁身，簡單嘅文言文都算係用到嘅...
人哋學日文學韓文係為咗去旅行去讀書用...我文言文居然係為咗返古代用？

「先生汝為誰？」

「在下李...李白」

李白，人如其名佢真係好白。咩話？我遇到李白？

「你...好白」

「李好白？吾欲一個字名，正好姑娘一提」

等陣，李好白？？？唔係吖唔係吖，我唔係呢個意思。不過如果我幫佢改咗個筆名....




啲文學家咪又懶係有意思咁亂解佢？
我咪又要再讀過啲詩史？唔好吖！兄台你冷靜啲

「 李白，字太白。你都係叫李太白啦」

只係見佢輕輕咁一笑，呢一下揮袖。顯得多咗一番嫵媚，詩仙大人果然係個靚仔👍🏻


「姑娘，你此是取笑吾太白？果然..吾欠缺男子之風嗎」

「唔係吖唔係吖！有...有意景㗎！」

「太白星，指金星」

「係吖係吖！金星夠浪漫吖嘛！」





「謝過姑娘賜名...咁又未知姑娘你係？見你如此言行，又非似本地人」

「我叫...李酒楚，或者你可以叫我女兒紅」

「楚楚姑娘真風趣，見姑娘又似文學之人，未知姑娘你可有興趣陪李白作作試，解解悶？」

都話我有文學相㗎啦！詩仙都欣賞我喎，不過都好咁就可以禁止李白作埋晒啲多餘嘢，我又唔使學咁多~
香港嘅文科同學！唔使多謝我~

「好吖！作詩係咪要作個筆名㗎？你哋係咩話？號？你叫詩仙，咁我叫情仙啦！」

「姑娘請勿咁講李白！詩仙李白實在不敢當...但可知姑娘何解叫自己情仙此等看似風流之名？」

「人到情多情轉薄，而今真個不多情，情呢啲嘢係人世間最複雜嘅存在，有時有情似無情。你修為高啲你就明㗎啦」





「李白知道，情仙姑娘果真高手」

溝唔到仔就高手...咁啲單身魔法師嘅咪成得仙？