[hehe]《知音人》: 九十：提點

Horace演唱《我的宣言》片段被上載至學生會的Facebook專頁，隨即換來了數以千計的讚好和數以十計的分享，這個網上「成績」比冠軍還要好。
 
當Horace在周六回到唱片公司時，亦獲得同事熱烈的祝賀，包括練習生同學們和歌唱老師，在課堂前都送上恭賀和讚賞說話。
 
上完上午的課離開公司準備午飯的時候，他被接待處的Joanne截住。
 
Joanne：「喂，Horace。」
Horace：「做咩呀靚女？」
Joanne：「《我的宣言》正喎。」
Horace：「你又有聽呀？」




Joanne：「一返到公司就個個討論緊啦。」
Horace：「哈哈，多謝。」
Joanne：「晏晝仲使唔使練？」
Horace：「要呀，同Kenneth哥第一次練新歌。」
Joanne：「咦，佢好似病左返唔到喎。」
Horace：「係咩？老師無通知我既？」
Joanne：「我都係聽講咋。」
Horace：「好啦，我食飯先啦。」
 
Horace如常到公司附近的茶餐廳一人吃飯，點完餐後便拿出手機，看到Kenneth的訊息。




 
Kenneth：「唔好意思，我病左開唔到聲，今朝同老師請左假，今日返唔到黎練。」
 
Horace見狀，唯有回一句：「Oh，take care呀。」
 
然而，他沒有收到通知說練習取消，所以吃完飯後他也得返回公司，一進去就見到音樂總監在接待處附近。
 
張總監：「Horace，入一入黎呀。」
 
聽完這句，他就尾隨張總監進入其辦公室。




 
 
張總監：「Horace，坐低先啦。本身今日安排你同Kenneth第一次練歌既，咁今朝收到Kenneth通知話佢病左要請假。」
Horace：「我知道呀，佢頭先有通知我。」
張總監：「嗯，我會同同事再安排過練習日程，要夾埋監制時間，所以可能要你就一就。」
Horace：「OK呀。」
張總監：「係喎，你早兩日決賽條片又瘋傳喎。」
Horace：「哈哈，總監你都知啦？」
張總監：「我都要留意下旗下人士既動向既。《我的宣言》，好Sweet喎。」
Horace：「唔係啦，投入首歌既感情啫。」
張總監：「嗯，我地唔會點干涉你地既私人生活既，何況只係練習生唔會對我地公司形象有好大影響，但遲少少你有機會出歌既話，而家你做、你講既野就有機會成為傳媒炒作既話題，所以記得要留意下。」
Horace：「嗯，明白既。」
張總監：「就係因為我地睇好你，所以先會係咁早既階段提一提點你，正如你見Kenneth咁，呢幾個月都無咩花邊新聞，希望大家將重點放返去佢既音樂上。」
Horace：「係既。」
張總監：「好啦，今日晏晝個練習會延期，同事會再通知你新既安排，黎緊會辛苦你啦。」




Horace：「無問題，唔該哂。」
 
從總監房間離開，他決定先到茶水間坐坐，再想想這段突然多出來的空檔時間有什麼好做。
 
他拿起手機，向Jordan發一個訊息：「喂，陣間練習取消左呀，你得唔得閒呀？」
 
等了一會他也未收到Jordan的回覆，他也決定先離開公司，準備回家。
 
回家途中，他突然收到Charlie的電話。
 
Charlie：「喂？Horace？」
Horace：「Charlie？做咩呀？」
Charlie：「你係咪同Jordan一齊呀？」
Horace：「唔係呀，我返緊屋企，點解咁問？」
Charlie：「我本身約左佢同Nick一齊去買野食野，佢話補完習到，但而家唔見人，電話又唔聽，咪問下你囉。」




Horace：「下？佢好少咁無交帶喎，但我頭先WhatsApp佢都無覆。」
Charlie：「嗯，我再搵下佢先，你有佢消息就通知我啦。」