[hehe]《知音人》: 四十八：解鈴

Horace在A宿樓下等了約五分鐘，就見到一個男生從遠處走來。
 
Horace：「Wilson？」
Wilson：「你係Horace？」
Horace：「嗯，Oscar係我間房同我朋友傾緊計。我帶你上去先啦。」
Wilson：「唔好意思，介唔介意我問一樣野。」
Horace：「OK呀，做咩呀？」
Wilson：「Steven無解得好清楚，淨係話Oscar要我開解下同比左你電話我叫我搵你，我想知道發生咩事啫。」
Horace：「我頭先返到房見到Oscar同我Roommate呀Roy傾緊計，咁我地幾個本身一齊夾Band幾熟既，見到Oscar好沉重好大壓力，然後Steven就同我講，要靠你先幫佢減到壓。」
Wilson：「點解指定要我既？你地唔係同佢仲熟咩？」




Horace：「呢層我答你唔到，但我同Oscar由中四識到而家，或者呀Roy同佢咁多野傾都幫唔到佢，或者真係要靠你。」
Wilson：「其實我OK呀，只係有D好奇啫。」
Horace：「上去先啦，我同呀Roy比D空間你地兩個傾下，我都想我好兄弟可以開心返D。」
Wilson：「好啦。」
 
Wilson跟著Horace上到512室。當Oscar見到Wilson突然出現時露出了驚訝的表情，說了聲：「點解…？」
 
Roy馬上起來，說了聲：「我同將軍比間房你地兩個傾下啦，籃球既野我真係唔係好識。」然後，他拿了電話銀包，跟Horace離開房間。
 
Horace：「希望佢地兩個傾得掂。」




Roy：「OK既，我都好擔心Oscar，但頭先我好似點講佢都唔入耳咁。」
Horace：「佢好似鑽緊牛角尖咁，以前既佢明明好爽朗。」
Roy：「我都覺呀，其實同佢多計傾都係佢升左year 3之後，或者Edmund開始拍拖、你又忙到癲左，佢多左搵我傾計，覺得佢好似好大壓力咁，今個sem唔知點解要爆cred，又去籃球校隊，搞到自己好忙咁。上年既佢好似好casual咁。」
Horace：「希望呀Wilson幫到佢啦，Steven話佢先係個解鈴人。」
Roy：「你知唔知佢地兩個既野？」
Horace：「知少少，Oscar話Wilson係佢組仔，一齊打波，一齊選拔入校隊。頭先上黎講陣同Wilson傾兩句，佢反而好似唔知咩事咁。」
Roy：「我諗都唔係咩秘密啦。Oscar同我講，佢好在意Wilson點睇佢，所以好想證明自己既能力。佢成績好似普普通通無咩特別，唱歌又好似配角咁唔起眼，所以打波想做出D成績。」
Horace：「即係…？」
Roy：「我諗佢都未必清楚自己同Wilson想點，聽你頭先咁講，Wilson似乎真係當佢好朋友，但Oscar有少少沉船既感覺。」
Horace：「雖然之前都有呢種預感，但真正見到果下我都有D呆左。」




Roy：「見到Wilson真人？」
Horace：「同埋Oscar見到佢個反應，佢果種尷尬咁多年我都未見過。」
Roy：「話說我岩岩都係第一次見Wilson真人，同相相差好遠，哈哈。」
Horace：「你睇過佢既相？」
Roy：「stalk佢Facebook啫，好奇邊個可以令楊俊朗搞成咁。」
Horace：「真人又幾靚仔既哈哈，雖然望落斯斯文文，唔似打波，同Steven好大對比。」
Roy：「係，文青look。」
 
兩人說著走著，不知不覺走到附近商場的M記，叫了杯飲品坐下。
 
Roy：「聽日去唔去睇開幕戰？撐下Oscar同Steven？」
Horace：「我練完野趕去啦。」
Roy：「嗯，Jordan呢？」
Horace：「佢今朝早機去左台灣啦。」
Roy：「你唔同佢去既？」




Horace：「我要練歌啦，之前考試前既堂調左去月尾。」
Roy：「哦，真係可惜。」
 
說到這時，Roy的電話響起了。