[hehe]《知音人》: 二十九：開口

晚飯後，Oscar回家，Edmund和Steven二人世界，而Horace和Roy則一同踏上返回宿舍的路上。
 
Roy：「將軍你無事嘛，你個樣唔係好舒服咁既。」
Horace：「無咩野呀，有D攰囉。」
Roy：「呢排係唔係好大壓力呀，你好少會咁既樣架wor。」
Horace：「少少啦。係呢，我頭先係唔係嚇左你地呀？」
Roy：「哈哈，少少啦，係Oscar唔知點算啫。」
Horace：「唉，真係Sorry呀，我都唔知果下做咩突然會咁樣。」
Roy：「唔使Sorry，大家擔心你多過嬲你啦。你知你啦，咩都收埋唔講。」
 




兩人又靜下。Horace想著，的確他很少會跟朋友說他自己的感受，即使感到很累，也自己一個承受著，更別說有關Jordan的事了。
 
Horace：「Roy。」
Roy：「嗯？」
Horace：「HERO入面，我好似同你比較少講野，你知啦，Edmund同我上堂、Oscar我中同，同你除左Jam歌之外真係無咩點傾得好deep。」
Roy：「哈哈，又唔係既，起碼你肯同我part房，又肯忍我係房D壞習慣。」
Horace：「信得過你先同你做Roommate啦，有D野應該話你知既。」
Roy：「咩先，你搞到我好期待。」
Horace：「雖然我無講過，但我覺得Edmund同Oscar都知知地。」
Roy：「關於頭先佢地講個男仔？」




Horace：「嗯。」
 
之後路上，Horace向Roy如實告訴了他中六時如何認識Jordan、如何發現自己喜歡他、如何相戀、如何分手，之前如何在今年初的Sing Con重新相遇，以致兩人一同去見唱片公司的事。
 
Roy：「所以你地而家未正式係埋一齊？」
Horace：「未呀，佢始終未同我講佢點樣過去屋企果關，我唔想又重新開始，然後又同一個原因又散。」
Roy：「但你係咪中意佢先？」
Horace：「話唔係就呃你既，但好多野唔係中意就大哂既。」
Roy：「如果你咁驚佢又過唔到佢呀媽果關，咁你不如直接問佢啦，好過而家咁樣拖住拖住。」
Horace：「好難開口呀。」




Roy：「你連對住我都開到口，而你又覺得你地互相都中意對方，不如坦誠一齊去面對啦。」
Horace：「嗯，我諗下啦。」
Roy：「係wor，話時話，前晚你帶埋佢上黎我地房，你真係以為我唔會返房架？」
Horace：「拿，雖然我真係諗住你唔會係房，但我真係諗住請佢上黎坐下飲杯野同比本書佢咋。」
Roy：「果日Oscar扯我出去就叫我留間房你地，唔好阻住你地二人世界。」
Horace：「我都唔知Oscar佢幾時知，上次食飯我有事早走，都係佢見到我收到Jordan電話好擔心，叫我去搵佢。Sing Con果陣佢好似仲未知。」
Roy：「哦，佢識左你咁多年，我諗佢一直都大約估到，之前唔出聲啫。」
 
一路說著，兩人不知不覺已回到宿舍512室。
 
Roy：「你好好休息下啦，難得呢兩星期唔使返唱片公司練習。」
Horace：「嗯。係wor，多謝你聽我講咁多野。」
Roy：「傻啦，一場兄弟，你肯同我講代表你信我啦。」
Horace：「話時話，知道左我同Edmund都係hehe，有咩感覺？」
Roy：「其實無咩特別，因為都知少少，Edmund你知佢啦，自從Hall樓下果件事之後，我地一講起Steven佢就面紅或者心心眼樣，所以佢一講我都無咩驚訝；你呢，sing con果陣估到少少，但前晚係Oscar講完我先串連到，所以你而家講我都覺得好正常。」




Horace：「哈哈，你唔聲唔聲原來都幾好觀察力架wor。」
 
Roy給他一個淺淺的笑容，沒有回應。
 
Horace躺在床上，突然覺得有點釋懷，或是將一些埋藏在心底已久的事說了出來，有效移除了心底部份壓力。