病態城市小說場系列: 車震震得冧，唔係講避震……

樓下有個冬菇亭，係我每晚頽飯必然之選。以前食飯，呢度嘈到爆，呢排卻係超冷清，冇所謂，冬菇亭價錢，食到法國高級餐廳嘅冷清感，正。今晚對面枱坐咗兩個阿叔，聲音唔算大但卻低估咗冷清度，啲說話傳晒入我耳。佢哋嘅對話節錄係……

「你有冇乜嘢避震推介呀？屌，我架車條避震唔掂呀。」金髮阿叔同鬍鬚阿叔講。
「你架車我同你睇㗎喎，避震冇乜問題吖，你（架車條避震）有乜嘢問題呀？」鬍鬚阿叔反問。
「嗰次同Kathine（應該係呢個名）出去玩，畀佢搞X到條避震彎咗，前低後趷。」金髮阿叔話。
「X你啦！車震就車震啦，乜嘢出乜X嘢去玩。不過你架話晒都係旅行車，避震應該夠用喎……你有幾重呀？」鬍鬚阿叔放低杯凍檸茶問。
「我咪同條女體重差唔多，都係幾十公斤咁囉。」金髮阿叔話。
「冇理由喎，我同你計計嘞，重力條公式係『F = ma』，咁你同條女加埋最多二百公斤……（跟住佢拎咗張馬經喺度寫），嗱，計X埋條避震老化吖，都冇理由玩爛條避震喎。」鬍鬚阿叔好滿意咁話。
「其實我條女有百二公斤重……」金髮阿叔尷尬話。


「……（忍笑）其實呢，我覺得呢，車震唔係講避震，係你條女幾公斤，哈哈……」鬍鬚阿叔仰天大笑。

究竟鬍鬚阿叔有冇幫金髮阿叔度條避震？我唔知，因為喺鬍鬚阿叔大笑嗰陣，畀金髮阿叔發現我望住佢，繼而怒睥我，見到佢想開口，我梗係搶先極速埋單走人啦！話時話，鬍鬚阿叔條「方妙拿」啱唔啱嘅呢？